ينفلياتسيا باياۋلاي ما؟ ۇلتتىق بانك جاۋاپ بەردى

مۇناي باعاسى تومەندەيدى, بىراق ەكونوميكالىق وسىمگە سەنىم كۇشەيدى

ساۋالناماعا قاتىسۋشىلاردىڭ بولجامىنشا, Brent ماركالى مۇنايدىڭ باعاسى الداعى جىلدارى شامالى تومەندەيدى. 2025 جىلى ءبىر باررەل ءۇشىن ورتاشا قۇن 68,7 دوللار, ال 2026 جانە 2027 جىلدارى تيىسىنشە 63,8 جانە 64,1 دوللار دەڭگەيىندە بولادى دەپ كۇتىلەدى.

سوعان قاراماستان ساراپشىلار ەل ەكونوميكاسىنىڭ وسىمىنە قاتىستى كوزقاراسىن جاقسارتقان. ءىجو وسىمىنە جاسالعان جاڭا بولجامدار:

2025 جىل – 5,9% (بۇرىن 5,6%)

2026 جىل – 4,9% (بۇرىن 4,8%)

2027 جىل – 5% (بۇرىن 4,8%)

ينفلياتسيا بولجامى وزگەرىسسىز, بازالىق مولشەرلەمە جوعارىراق بولادى

ينفلياتسيا دەڭگەيى ايتارلىقتاي تۇزەتىلگەن جوق. 2025 جىلدىڭ سوڭىنا قاراي ونىڭ مولشەرى 12,3% دەڭگەيىندە بولادى دەپ پايىمدالادى. ال 2026 جانە 2027 جىلدارعا جاسالعان بولجامدار بۇرىنعىداي: 10% جانە 7%.

ال بازالىق مولشەرلەمەگە قاتىستى ساراپشىلار پىكىرى كۇشەيگەن. رەسپوندەنتتەر الداعى ءۇش جىلدا مولشەرلەمە قازىرگى دەڭگەيگە جاقىن, ءتىپتى جوعارىراق بولادى دەپ بولجايدى:

2025 جىل – 18% (بۇرىن 16,6%)

2026 جىل – 16% (بۇرىن 14,8%)

2027 جىل – 13% (بۇرىن 12%)

ساۋالناماعا كىمدەر قاتىستى؟

بۇل جولى ساۋالناماعا قازاقستان ەكونوميكاسىنىڭ باستى كورسەتكىشتەرىن زەرتتەۋمەن اينالىساتىن 14 ۇيىم قاتىسقان. ولاردىڭ قاتارىندا:

قارجى نارىعىنىڭ كاسىبي قاتىسۋشىلارى,

زەرتتەۋ ورتالىقتارى,

حالىقارالىق ۇيىمدار,

رەيتينگتىك اگەنتتىكتەر بار.

ۇلتتىق بانك ساۋالناما ناتيجەلەرىنىڭ رەتتەۋشىنىڭ ءوز بولجامىنا قاتىسى جوق ەكەنىن ەرەكشە اتاپ ءوتتى. بۇل – وتاندىق جانە حالىقارالىق ساراپشىلاردىڭ نارىققا قاتىستى تاۋەلسىز باعاسى مەن كاسىبي كۇتۋلەرىنىڭ جيىنتىعى عانا.