استانادا كولىك مينيسترلىگىنىڭ قولداۋىمەن «Kaztraffic-2025» كورمەسى ءوتىپ جاتىر. بيىل ەلىمىزدە 21-ءشى مارتە ۇيىمداستىرىلعان ءىس-شارادا قىتاي, تۇركيا, يتاليا, فرانتسيا, كانادا, وزبەكستان جانە باسقا مەملەكەتتەردەن 200-دەن استام كومپانيا باس قوستى. ولاردىڭ ىشىندە جاساندى ينتەللەكتىنىڭ كومەگىمەن جولداعى قاۋىپسىزدىكتى كۇشەيتۋگە باسىمدىق بەرگەن «استانا تازالىق» سەرىكتەستىگى بار, دەپ حابارلايدى Egemen.kz.
كورمەدە جاھاندىق ءىرى وندىرۋشىلەر جول-قۇرىلىس تەحنيكاسىنىڭ, ماتەريالدار مەن جابدىقتاردىڭ جاڭا تۇرلەرىن ۇسىندى. ال ەلوردانىڭ تازالىعىنا جاۋاپتى «استانا تازالىق» جشس قالا كوشەرىن, اسفالت جولدارىن تاۋلىك بويى تازالاۋعا جاردەمدەسەتىن, قاۋىپسىزدىكتى ساقتايتىن جاڭا ەكولوگيالىق جابدىقتاردى كورسەتتى. ونىڭ ىشىندە جاساندى ينتەللەكت شەشىمدەرى ءوندىرىس ۇدەرىستەرىن جەدەلدەتۋگە, باقىلاۋ دالدىگىن ارتتىرۋعا جانە ادامي فاكتوردى تومەندەتۋگە مۇمكىندىك بەرەدى.
«استانا تازالىق» سەرىكتەستىگى تەحنيكانى پايدالانۋ ءبولىمىنىڭ باسشىسى تيمۋر احمەتوۆتىڭ ايتۋىنشا, قالا تازالىعىنا جاۋاپتى مەكەمەنىڭ جي تەحنولوگياسىن ەنگىزگەنىنە 3 ايعا جۋىقتاپتى. سودان بەرىگە دەيىن وزىق قۇرىلعى جول بويىندا قالعىپ كەتكەن 6 جۇرگىزۋشىنى سول زاماتتا وياتىپ العان.
«استانا تازالىق» جشس باسشىلىعى كورمەگە جي-ءدىڭ كوممۋنالدىق سالاداعى مۇمكىندىگىن كورسەتۋگە كەلىپ وتىرعاندارىن ايتتى. ياعني وسى ارقىلى ەلدەگى تازالىققا جاۋاپتى مەكەمەلەردى جي-ءدىڭ وزىق مۇمكىندىكتەرىن پايدالانۋعا شاقىرىپ وتىر.
«مەملەكەت باسشىسىنىڭ تاپسىرماسى بويىنشا قازىر ەكونوميكانىڭ ءاربىر سالاسىنا جاساندى ينتەللەكت تەحنولوگيالارى ەنگىزىلىپ جاتىر. قالانىڭ تازالىعىنا جاۋاپتى مەكەمە بولعان سوڭ, ءبىز جي-ءدى كولىكتەرىمىزگە ەنگىزۋدى ۇيعاردىق. جۇمىسشىلاردىڭ قاۋىپسىزدىگى ءۇشىن بارلىق جي شەشىمدەردى ءبىر ەكوجۇيەگە توعىستىردىق. ول ءۇشىن ءاربىر كولىككە داتچيك, بەينەكامەرا ورناتامىز. نەگىزى, مەكەمە بالانسىندا 400-گە جۋىق تەحنيكا بار. ونىڭ ىشىندە قار تازالايتىن, قار تيەيتىن كولىكتەردەن بولەك, شاعىن تەحنيكالارىمىز سايلانعان. قازىر 100 كولىككە بەينەكامەرا ورناتىپ, جي مەن بايلانىستىردىق, باسقا كولىكتەرىمىز دە كوپ ۇزاماي كامەرامەن قامتىلادى», دەيدى مەكەمەنىڭ ءبولىم باسشىسى ت. احمەتوۆ.بىلسەڭىزدەر, سەرىكتەستىكتە جۇمىسشىلار تۇنگى اۋىسىمعا دا شىعىپ, قالانى قاردان تازالايدى. تۇندە قالادا كەپتەلىس جوق. ال تەحنيكالىق ماقساتتاعى كولىكتىڭ سالماعى اۋىر, جىلدامدىعى تومەن. مۇنداي جاعدايدا جۇرگىزۋشىلەر جولدا ءجيى شارشايدى, ۇيقى قىسادى.
ەندى كولىكتەرگە ورناتىلعان تەرمينال جۇرگىزۋشىنىڭ جانارىن باقىلاپ وتىرادى. ەگەر قالعىپ-مۇلگىپ كەتكەن جاعدايدى بايقاسا, نەبارى 3 سەكۋندتا جۇرگىزۋشىنى وياتىپ الادى. سول سەكىلدى جۇرگىزۋشى جىلدامدىقتى شامادان تىس اسىرسا, تەلەفونمەن سويلەسسە دەرەك بىردەن باسشىلىققا تۇسەدى. مۇنىڭ بارلىعىن اۋەلى جۇرگىزۋشىنىڭ, جولداعى باسقا دا كولىكتەردىڭ, تۇرعىنداردىڭ قاۋىپسىزدىگى ءۇشىن جاسالعان قادام دەپ تۇسىندىك.