استاناداعى ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ كونتسەرت زالىندا «شابىت» XXVIII حالىقارالىق شىعارماشىل جاستار بايقاۋىنىڭ شىمىلدىعى ءتۇرىلدى.
بۇگىنگە دەيىن تاماشا داستۇرگە اينالعان بايقاۋدان تالاي تالانت تۇساۋىن كەسىپ, ونەر الەمىنە قانات قاقتى. سوندىقتان بۇل فەستيۆالدىڭ ورنى بولەك.
سالتاناتتى ءىس-شاراعا مادەنيەت جانە اقپارات ۆيتسە-ءمينيسترى ەۆگەني كوچەتوۆ پەن استانا قالاسى اكىمىنىڭ ورىنباسارى ەسەت بايكەن قاتىسىپ, قۇتتىقتاۋ ءسوز سويلەدى.
بيىل فەستيۆالعا 800-دەن استام قاتىسۋشى كەلگەن. ولاردىڭ اراسىندا الەمنىڭ 9 ەلىنەن كەلگەن تالانتتى جاستار دا بار. قازاق ۇلتتىق ونەر ۋنيۆەرسيتەتىنىڭ عىلىمي جانە شىعارماشىلىق جۇمىستارى جونىندەگى پرورەكتورى راۋشان نۇرتازا بۇل – بايقاۋ جاس شىعارماشىلىق يەلەرى ءۇشىن ەڭ ۇلكەن الاڭ ەكەنىن ايتادى.
ونەر بايگەسىنە كەلگەن جاستار 8 اتالىم بويىنشا باق سىنايدى. ولار:اكادەميالىق ءان ايتۋ, كامەرالىق مۋزىكا, فولكلورلىق مۋزىكا, بەينەلەۋ ونەرى, پوەزيا جانە ەسترادالىق ۆوكال. قاتىسۋشىلاردىڭ دەنى – حور, انسامبل جانە شىعارماشىلىق توپ سەكىلدى ۇجىمدىق قۇرامدار. ال قازىلار القاسى قىتاي, يتاليا, ازەربايجان, رەسەي جانە وزبەكستان ەلدەرىنەن كەلگەن بىلىكتى ماماننان قۇرالعان.
مادەني ءىس-شاراعا سوناۋ قىرعىز جەرىنەن ات ارىتىپ كەلگەن قاتىسۋشىنىڭ ءبىرى – ۋرمات ساتىبالديەۆ. ول ارىپتەسىمەن بىرگە «ەسترادالىق ۆوكال» اتالىمىندا ونەر كورسەتەدى. «بايقاۋ تۋرالى جاقىندا ەستىدىم. سودان بىردەن جينالىپ, وسىندا كەلدىك. ءبارى دە جوعارى دەڭگەيدە ۇيىمداستىرىلعان. كوڭىلىمنەن شىعىپ جاتىر», دەدى ول.
استانانى اسەم ءان مەن عاجاپ كۇيگە بولەيتىن ونەر فەستيۆالى باس شاھارداعى بىرنەشە كونتسەرت الاڭىندا وتەدى. بايقاۋدىڭ جابىلۋ ءراسىمى مەن گالا-كونتسەرتى 22 قاراشادا بولادى.
ازامات قۇسايىن