الەمگە ايگىلى كومپوزيتورلار ارۆو پيارتتىڭ 90 جىلدىعى مەن ۆەلو تورميستىڭ 95 جىلدىعىنا وراي «استانا وپەرا» ساحناسىندا ەستون مۋزىكاسىنىڭ كەشى ۇيىمداستىرىلدى, دەپ جازادى Egemen.kz.
كونتسەرتتە XX-XXI عاسىردا ءومىر سۇرگەن ەكى ۇلى تۇلعانىڭ شىعارمالارى ورىندالدى. مۋزىكالىق كەش ەستونيا پرەزيدەنتى الار كاريستىڭ قازاقستانعا مەملەكەتتىك ساپارى اياسىندا ءوتتى.
– بۇگىنگى كەشتە ءبىز ەستونيا مەن قازاقستان اراسىنداعى دوستىقتى مۋزىكا ارقىلى اتاپ وتەمىز. مۋزىكا – ەستون مادەنيەتى مەن بولمىسىنىڭ اجىراماس بولىگى. مەن جانە جۇبايىم سيرە, سونداي-اق بۇكىل دەلەگاتسيا ەرەكشە ىقىلاسقا بولەندىك. بۇل ءبىزدىڭ ەسىمىزدە ۇزاق ساقتالادى. ءاربىر ادەمى ەستەلىك – العىس ايتۋعا سەبەپ. سوندىقتان پرەزيدەنت توقاەۆقا جىلى قابىلداعانى ءۇشىن شىن جۇرەكتەن ريزاشىلىعىمدى بىلدىرەمىن. بۇكىل دەلەگاتسيامىزدىڭ اتىنان وسى ساپاردى ۇيىمداستىرۋعا اتسالىسقان بارلىق قازاقستاندىق ارىپتەستەرىمىزگە جانە ۇكىمەت وكىلدەرىنە العىس ايتامىن, – دەدى الار كاريس.
سونىمەن قاتار ەستونيا پرەزيدەنتى ەستون كومپانياسى ارقالىق قالاسىنداعى مەكتەپكە پيانينو سىيعا تارتقانىن اتاپ ءوتتى.
– شامامەن 670 شاقىرىم قاشىقتىقتا, جاقىن ارادا ەستونيانىڭ ەكى عاسىرعا جۋىق وندىرىستىك داستۇرىمەن جاسالعان اسپاپتىڭ ءۇنى شىرقالماق. وسىلايشا, ەستونيا مەن قازاقستان اراسىنداعى دوستىقتىڭ اۋەنى تەك استانادا عانا ەمەس, ودان تىس جەرلەردە دە تارايدى, – دەدى كاريس مىرزا.
ەستونيادان كەلگەن قوناقتار مەن مۋزىكانتتاردى مادەنيەت جانە اقپارات ءمينيسترى قارسى الدى.
– بۇگىنگى كەش – ەكى ءتۇرلى مادەنيەت پەن مۋزىكالىق ءداستۇردى بىرىكتىرىپ وتىرعان ەرەكشە وقيعا. مۋزىكا ءۇشىن, جالپى ونەر ءۇشىن, شەكارا جوق. ول جۇرەكتەردى بايلانىستىرادى, ۇلتىنا نەمەسە شىعۋ تەگىنە قاراماستان, بارشاعا ورتاق سەزىمدەردى جەتكىزەدى. ەستوندىق مۋزىكانتتاردىڭ «استانا وپەرا» ساحناسىندا ونەر كورسەتۋى – ءوزارا قۇرمەت پەن شابىتقا نەگىزدەلگەن مادەني ديالوگتىڭ جالعاسى دەپ بىلەمىن, – دەدى ايدا بالاەۆا.
كەشتە كورەرمەن ارۆو پيارت پەن ۆەلو ءتورميستىڭ تۋىندىلارىن تىڭدادى. ولاردى Vanalinna Hariduskolleegium ىشەكتى اسپاپتار وركەسترى مەن سكانديناۆياداعى بەلگىلى جاس مۋزىكانتتاردىڭ ءبىرى, شەبەر سكريپكاشى حانس كريستيان ااۆيك ورىندادى.
كونتسەرت ديريجەرى ەستون مۋزىكا جانە تەاتر اكادەمياسىنىڭ تۇلەگى, سيمفونيا, ەكى وپەرا, كانتاتتار مەن كوپتەگەن وركەسترلىك جانە كامەرالىق تۋىندىلاردىڭ اۆتورى, كومپوزيتور ءارى ديريجەر راسمۋس پۋر بولدى.