پەداگوگيكالىق قولداۋ ورتالىقتارىندا اتا-انالارعا ارنالعان 3.0 باعدارلاماسى جالعاسىپ جاتىر. سانالى اتا-انا بولۋ داعدىلارىن دامىتۋ جانە مەكتەپ پەن وتباسى اراسىنداعى ءوزارا بايلانىستى نىعايتۋدى ماقسات ەتكەن باعدارلاما اياسىندا وقۋ جىلىنىڭ باسىنان بەرى پەداگوگيكالىق قولداۋ ورتالىقتارى 30 مىڭنان استام ساباق وتكىزىپ, وعان 1 ميلليوننان استام اتا-انا قاتىسقان, دەپ حابارلايدى Egemen.kz.
وركەن» كەاق پرەزيدەنتى ەلەنا ساكەنوۆانىڭ اتۋىنشا, اتا-انا بالا ءومىرىنىڭ ءبىر بولىگىنە اينالعاندا عانا بالا قولداۋدى سەزىنەدى. ءوز-وزىنە سەنىمى ارتادى. وسىنداي سەنىمدى قارىم-قاتىناس ەموتسيونالدى جاعىنان تۇراقتى, باقىتتى بالا جانە ۇيلەسىمدى وتباسىنىڭ قالىپتاسۋىنا ىقپال ەتەدى.
باعدارلاما اياسىندا اتا-انالارعا ارنايى دايىندىقتان وتكەن پەداگوگتار مەن پسيحولوگتار ءدارىس بەرىپ جاتىر. بۇگىندە ەلىمىزدەگى وتباسىلاردى «تاربيەلەۋ – جەكە ۇلگى ارقىلى» جانە «بالالاردىڭ قاۋىپسىزدىگى – ەرەسەكتەردىڭ قامقورلىعى» سياقتى تاقىرىپتار تولعاندىرادى. وسى تاقىرىپتاردا وتكەن ساباقتاردا اتا-انالار سەنىمدى نىعايتۋ, بالامەن ەموتسيونالدى بايلانىس ورناتۋ جانە تاۋەكەلدەردىڭ الدىن الۋ بويىنشا پايدالى كەڭەستەر الادى.
ساۋالناما ناتيجەسى كورسەتكەندەي, بۇگىندە اتا-انالاردىڭ بالالارىمەن قارىم-قاتىناسى جاقسارعان. زەرتتەۋ سۇراقتارىنا سايكەس, اتا-انالاردىڭ 72,6 پايىزى بالالارىمەن كۇندە سويلەسە باستاعانىن, 89,6 پايىزى قيىندىقتارعا دەر كەزىندە جاۋاپ بەرىپ ۇيرەنگەنىن, 78 پايىزى بالانىڭ ورتاسىن جاقسى تاني باستاعانىن اتاپ وتكەن. ال ءاربىر ەكىنشى اتا-انا تاربيەلەۋ ءتاسىلىن قايتا قاراۋعا دايىن ەكەنىن بىلدىرسە, شامامەن ۇشتەن ءبىرى بالالاردىڭ وقۋ جانە مادەني دامۋىنا بەلسەندى قاتىسا باستاعان. «ادال ازامات» باعدارلاماسى اياسىندا 2023 جىلدان باستاپ ەلىمىز مەكتەپتەرىندە اتا-انالارعا پەداگوگيكالىق قولداۋ ورتالىقتارى جۇمىس ىستەپ جاتىر. ورتالىق اتا-انالاردى قولداۋ ماقساتىندا بالانى تاربيەلەۋ مەن دامىتۋعا باعىتتالعان ءىس-شارالار وتكىزىپ, پراكتيكالىق قۇرالدارمەن قامتاماسىز ەتىپ كەلەدى.