پرەزيدەنت قاسىم-جومارت توقاەۆ وزبەكستانعا مەملەكەتتىك ساپارى كەزىندە قازاق پەن وزبەك باۋىرلاس حالىقتار, ەجەلدەن ەنشىسى ءبىر تاتۋ كورشىلەر ەكەنىن اتاپ ءوتتى. سونداي-اق مەملەكەت باسشىسى قازاق-وزبەك شەكاراسىندا اشىلاتىن حالىقارالىق ونەركاسىپ كووپەراتسياسى ورتالىعى ءوزارا ساۋدانى دامىتۋعا سونى سەرپىن بەرەتىنىنە توقتالدى.
قازاقستان مەن وزبەكستان پرەزيدەنتتەرى قول قويعان «ورتالىق ازيا» حالىقارالىق ونەركاسىپتىك كووپەراتسيا ورتالىعىن (حوكو) قۇرۋ جونىندەگى جول كارتاسىن ىسكە اسىرۋ بويىنشا تۇركىستان وبلىسىنىڭ اكىمدىگىمەن اۋقىمدى جۇمىستار جۇرگىزىلىپ كەلەدى. ورتالىقتا 7 الەۋەتتى ينۆەستور ءوز جوباسىن جۇزەگە اسىرۋعا قىزىعۋشىلىق تانىتىپ وتىر. ناتيجەسىندە, 123 ملرد تەڭگە ينۆەستيتسيا تارتىلىپ, 3 مىڭنان اسا جۇمىس ورنى قۇرىلادى. بيۋدجەتكە قوسىمشا 355 ملن تەڭگە سالىق تۇسەدى. ورتالىقتى ينۆەستيتسيالىق جوبالارمەن تولتىرۋ ماقساتىندا اكىمدىك 8 دايىن ءوندىرىس عيماراتىن سالۋ جۇمىسىن جۇرگىزۋدە. قازىرگى تاڭدا 5 عيماراتتىڭ قۇرىلىس جۇمىسى تولىعىمەن اياقتالىپ, 3 عيماراتتىڭ سەندۆيچ-پانەلدەردى مونتاجداۋ جۇمىستارىن قاراشا ايىنىڭ سوڭىندا تولىق اياقتاۋ كوزدەلگەن.
سونداي-اق كورشى ەلمەن قارىم-قاتىناستى نىعايتۋ, ايماقارالىق ارىپتەستىكتى كەڭەيتۋ, تۋريزم سالاسىنداعى بىرلەسكەن جوبالاردى جۇزەگە اسىرۋ جانە تاجىريبە الماسۋ ماقساتىندا جۋىردا تۇركىستاندىق دەلەگاتسيا وزبەكستاننىڭ بىرقاتار قالاسىندا بولىپ قايتى. تۇركىستاندا جىل سايىن 3 ملن-نان اسا جولاۋشىعا قىزمەت كورسەتەتىن حالىقارالىق اۋەجاي جۇمىس ىستەيدى. اۋە قاتىناسىن دامىتۋ ماقساتىندا ءبىز جەڭىلدىگى بار ارنايى باعدارلاما ازىرلەدىك. ورتالىق ازيانىڭ ەجەلگى رۋحاني ورتالىقتارى اراسىنداعى تۇراقتى اۋە رەيستەرى ترانسشەكارالىق ءتۋريزمدى دامىتۋعا جانە قازاقستان مەن وزبەكستان وڭىرلەرى اراسىنداعى ىنتىماقتاستىقتى كەڭەيتۋگە قوسىمشا سەرپىن بەرەدى. سونىمەن قاتار اۋىل شارۋاشىلىعى ونىمدەرىن تەرەڭ وڭدەۋ, ماقتا-توقىما كلاستەرىن دامىتۋ باعىتىندا ينۆەستورلارمەن بىرقاتار كەلىسىمگە قول جەتكىزىلدى.
نۇرالحان كوشەروۆ,
تۇركىستان وبلىسىنىڭ اكىمى