قازاقتىڭ رۋحاني الەمى قولىنا قالام ۇستاعالى ۇلتىن ءسۇيۋ مەن ۇلتقا قىزمەت ەتۋدىڭ وزگەشە ۇلگىسىن قالىپتاستىرعان كۇلاش احمەتوۆا ەسىمدى قايتالانباس عاجايىپ اقىنىنان ايىرىلعانىن سەزىنىپ وتىرمىز.
ءبىز, جاراسقان ايتقان «سوعىستان سوڭ تۋعان», ورتەڭدە وسكەن وركەنى مىقتى, ءورىسى كەڭ بۋىننىڭ ءتولى ەدىك. بويىمىزدا ادامزاتقا ءومىردىڭ قادىرى مەن قاسيەتىن ۇعىندىرعان جەڭىمپاز اكەلەر مەن جار جولىن سارعايا كۇتىپ, مىنا ۇلى عالامدى وزدەرىنىڭ ۇلى ساعىنىشىمەن تەربەتكەن انالاردىڭ ماحابباتى مەن قۇشتارلىعى بار ەدى. ءبىزدى ادەبيەت دەيتىن سىرى مەن سيقىرى ۇشان-تەڭىز سول قايىپبەرەن مىنەزدى الەمگە اكەلەرىمىز بەن انالارىمىزدىڭ ومىرگە دەگەن سول ماحابباتى مەن سول قۇشتارلىعى الىپ كەلىپ ەدى.
كۇلاش سول بۋىننىڭ اق بانتيگىن اق جاۋلىققا اۋىستىرىپ, وتباسى باقىتى مەن اقىندىقتىڭ ازاپقا تولى شىنايى مەحناتتى باقىتىن نازىك جۇرەگىمەن قايىسپاي كوتەرگەن, قازاق جىرىن الەمتانۋ مەن ادامتانۋدىڭ نۇرلى, سىرلى, سونى سيپاتتارىمەن بايىتقان دارا ءبىتىمدى, اسا كورنەكتى سيرەك اقىندارىمىزدىڭ ءبىرى ءھام بىرەگەيى ەدى. كۇلاش قازاق ولەڭىندە تامىرىن تەرەڭنەن تارتار ۇلتتىق نانىم-سەنىم مەن الەمدىك پوەزيانىڭ مادەنيەتتى جىر جازۋ مەكتەبىن ۇيلەستىرۋدىڭ ءساتتى ۇلگىسىن قالىپتادى.
ول قازاق ولەڭىنىڭ كەڭىستىگىن ءوزىنىڭ ەشكىمگە ۇقسامايتىن وزگەشە ورنەگىمەن, قايىپبەرەن مىنەزدى كوركەم الەمىمەن بايىتتى. كۇلاش احمەتوۆا دەيتىن ەسىمنىڭ ەندى ەكىنشى – ۇلت كوگىندە جۇلدىز بوپ جارقىراپ جانار ماڭگىلىك ءومىرى باستالدى. حالقىمەن بىرگە جاسايتىن ولەڭىنىڭ ولمەس ءومىرى.
رۋحى پەيىش تورىندە شالقىپ, ارتىنداعى ۇلتى مەن ۇرپاعىنا ۇلى جاراتۋشى باياندى جول بۇيىرتسىن!
نۇرلان ورازالين,
مەملەكەتتىك سىيلىقتىڭ لاۋرەاتى