فۋتبولدان ەلىمىزدىڭ ۇلتتىق قۇراماسى كەلەسى جىلى وتەتىن الەم چەمپيوناتىنا ىرىكتەۋ اياسىنداعى سوڭعى ماتچىن وتكىزدى. «استانا ارەنا» ستاديونىندا بەلگيا ۇلتتىق قۇراماسىمەن تارتىسقا ءتۇسىپ, ۇپاي ولجالادى.
ماتچ الدىندا ۇلتتىق قۇرامانىڭ باس باپكەرى مىندەتىن اتقارۋشى تالعات بايسۋفينوۆ تاس بۇركەنىپ قورعانىستا بۇعىپ الماي شابۋىلمەن ويناۋعا باسىمدىق بەرىلەتىنىن ايتتى. ءارى سولاي دا بولدى.
– ءبىز بىرەر كۇن بۇرىن سىرت الاڭدا سولتۇستىك ماكەدونيا ۇلتتىق قۇراماسىنا قارسى تارتىسقا تۇسكەندە شابۋىلعا كۇش سالۋدى ماقسات تۇتتى. ءتىپتى ءبىرىنشى تايمنىڭ العاشقى 15 مينۋتىندا دۇركىن-دۇركىن شابۋىلداپ الاڭ يەلەرىنىڭ «ەسىن ەكەۋ, ءتۇسىن تورتەۋ» ەتىپ ءتۇتىپ جىبەردىك. جەڭىستى ج ۇلىپ الۋعا دا بولاتىن ەدى, ەكىنشى تايم ورتا تۇسىنان اۋعانشا الدا ەدىك. قورعانىسىمىز قوجىراپ 74-مينۋتتا قارسىلاستار ەسەپتى تەڭەستىردى. بەلگيا ۇلتتىق قۇراماسىنا «نە بەل, نە بەلبەۋ كەتەر» دەپ قايراپ شىعارامىز. ءبىز بۇل جولى دا الەم چەمپيوناتىنا جولداما الا المايتىنىمىز ايدان انىق. دەسە دە الەمنىڭ تاڭداۋلى قۇراماسىنا قارسى قورعانىپ ەمەس, شابۋىلداپ ويناۋدىڭ ۇلگىسىن كورسەتەمىز, – دەدى.
بىلىكتى مامان ءسوزىن جۇتقان جوق. ويىننىڭ 9-مينۋتىندا ءتۇبىت مۇرتى تەبىندەپ كەلە جاتقان 17 جاستاعى داستان ساتباەۆ گول سوعىپ, ۇلتتىق قۇراما ساپىنداعى العاشقى گولىن ەنشىسىنە جازدى. داستان ساتباەۆ ۇلتتىق قۇرامادا ويناپ, گول سوققان ەڭ جاس ويىنشى اتاندى. 15 قاراشا ول 17 جاستان 3 اي, 3 كۇن اسقان بولاتىن. بۇعان دەيىن بۇل مارتەبە ەركەبۇلان سەيداحمەتتىڭ ەنشىسىندە ەدى. ول 2018 جىلى 18 جاستان 1 اي 19 كۇن اسقاندا ماجارستان ۇلتتىق قۇراماسىنىڭ قاقپاسىنا گول سوققان ەدى.
بۇعان دەيىن كوبىنە بەس قورعاۋشى جۇيەسىمەن ويىندى ءوربىتۋدى قۇپ كورىپ كەلگەن ءبىزدىڭ قۇراما بۇل جولى قورعانىستى ءتورت ويىنشىعا تاپسىردى. ءسويتتى دە شابۋىلعا ءۇش فۋتبولشىنى قاتار سالىپ, تاكتيكالىق تاۋەكەلگە بەل بۋدى. شابۋىلدى مىعىم ەتۋگە داستان ساتباەۆتىڭ العاشقى مينۋتتاردان زور ەكپىن قوسقانى كوڭىل ءسۇيسىنتتى. 48-مينۋتتا بەلگيا قۇراماسىنىڭ ويىنشىسى ۆاناكەننىڭ ەسەپتى تەڭەستىرۋى ۋىستا تۇرعان ءۇش ۇپايدى سۋسىتىپ جىبەردى. بۇل ماتچ جىگىتتەردىڭ «بولات قايناۋدا شىنىعاتىنىن» كورسەتتى. 79-مينۋتتا شابۋىلشى يسلام چەسنوكوۆتىڭ قىزىل قاعاز الىپ الاڭنان قۋىلۋى دا جىگىتتەردىڭ جىگەرىن جاسىتا المادى.
ۇلتتىق قۇراما الەم چەمپيوناتىنا ىرىكتەۋ اياسىندا وتكىزگەن 8 ماتچتان 8 ۇپاي جينادى. بۇگىن بيىلعى جىلجابار ويىندى حورۆاتيانىڭ پۋلا قالاسىندا تۇيىندەپ, فارەر ارالدارى قۇراماسىنا قارسى جولداستىق ماتچ وتكىزەدى.