قوستاناي وبلىسىندا سوڭعى ەكى كۇننىڭ ىشىندە 3061 اكىمشىلىك قۇقىق بۇزۋشىلىق تىركەلدى. پوليتسيا 2 مىڭنان استام جول ەرەجەسىن بۇزۋ دەرەگىن انىقتاپ وتىر, دەپ حابارلايدى Egemen.kz.
وبلىستىق پد ءباسپاسوز قىزمەتىنىڭ مالىمەتىنشە, وتكەن سەنبى-جەكسەنبى كۇندەرى جول ساقشىلارى ماس كۇيىندە كولىك جۇرگىزگەن 18 ادامدى ۇستاعان. مىسالى, 16 قاراشادا قوستاناي اۋدانىندا «FAW» ماركالى كولىكتى ماس كۇيىندە جۇرگىزىپ كەلە جاتقان 23 جاستاعى اۋدان تۇرعىنى ۇستالعان. ونىڭ بۇعان دەيىن دە كولىك جۇرگىزۋ قۇقىعىنان ايىرىلعانى انىقتالدى. اتالعان ازاماتقا قاتىستى ەكى بىردەي اكىمشىلىك ءىس قوزعالدى.
قارابالىق اۋدانىندا دا وسىعان ۇقساس دەرەك تىركەلدى. اتالعان اۋداندا 37 جاستاعى تۇرعىن ۆاز-21099 اۆتوكولىگىن ماس كۇيىندە جۇرگىزگەنى ءۇشىن ۇستالدى. ول 15 تاۋلىككە دەيىن اكىمشىلىك قاماۋعا الىنىپ, 7 جىلعا جۇرگىزۋشى كۋالىگىنەن ايىرىلۋى مۇمكىن. سوڭعى شەشىم – سوتتىڭ قۇزىرىندا.
«وتكەن اپتا ىشىندە پوليتسيا 4810 جول قوزعالىسى ەرەجەسىن بۇزۋ دەرەگىن انىقتادى. سونداي-اق 49 ماس جۇرگىزۋشى ۇستالدى. جول قوزعالىسىن قاداعالاۋمەن قاتار, ءتارتىپ ساقشىلارى قوعامدىق قاۋىپسىزدىك باعىتىندا دا بەلسەندى جۇمىس جۇرگىزدى. ماسەلەن, اپتا ىشىندە 583 ادام مەديتسينالىق ايىقتىرعىشقا جەتكىزىلدى», دەيدى وبلىستىق پد ءباسپاسوز حاتشىسى كارينا بازارباەۆا.
پوليتسيا مالىمەتىنشە, قوعامدىق ءتارتىپتى قاداعالاۋ بارىسىندا بەينەباقىلاۋ كامەرالارىنىڭ كومەگى كوپ. مىسالى, 1263 قۇقىق بۇزۋشىلىق قالا ىشىندەگى, جول بويىنداعى كامەرالار ارقىلى انىقتالعان.
قوستاناي وبلىسى