فۋتبولدان 2026 جىلعى الەم چەمپيوناتىنا ىرىكتەۋ كەزەڭىنىڭ J توبى اياسىندا قازاقستان قۇراماسى ءوز الاڭىندا بەلگيامەن 1:1 ەسەبىمەن تەڭ ءتۇستى, دەپ حابارلايدى Egemen.kz.
ويىن «استانا ارەنا» ستاديونىندا ءوتتى. كەزدەسۋدى ليتۆا ەلىنىڭ تورەشىسى دوناتاس رۋمشاس باستاعان قازىلار القاسى باسقاردى.
العاشقى مينۋتتاردان-اق ەكى كوماندا دا جوعارى قارقىن كورسەتىپ, قوناقتار دوپتى كوبىرەك باقىلاعانىمەن, ەسەپتى قازاقستان اشتى. 9-مينۋتتا داستان ساتپاەۆ جويقىن شابۋىل جاساپ, ايىپ الاڭىنا ەنىپ, جاقىن بۇرىشتى ءدال نىساناعا الدى — 1:0. العاشقى تايمدا تەمىرلان اناربەكوۆ قاقپادا سەنىمدى ويناپ, بىرنەشە قاۋىپتى سوققىنى قايتارا ءبىلدى.
ەكىنشى تايم باستالىسىمەن-اق بەلگيالىقتار قىسىمدى ۇدەتە ءتۇستى. 48-مينۋتتا حانس ۆاناكەن جاقىن قاشىقتىقتان باسپەن ءدال سوققى جاساپ, ەسەپتى تەڭەستىردى. ودان كەيىن بەلگيالىق كوماندا بىرنەشە شابۋىل ۇيىمداستىردى, الايدا قازاقستاندىق قاقپاشى تاعى دا ەرەكشە شەبەرلىك تانىتتى.
79-مينۋتتا يسلام چەسنوكوۆ جەرەمي دوكۋعا قارسى ەرەجەبۇزۋشىلىق جاساپ, قىزىل قاعاز الدى. قالعان مينۋتتاردى قازاقستان ون ويىنشىمەن وتكىزدى. سوعان قاراماستان, الاڭ يەلەرى قورعانىستا جيناقى ويناپ, فاۆوريت سانالاتىن قارسىلاسقا قارسى تەڭ ناتيجەنى ساقتاپ قالدى.
وسىلايشا, قازاقستان قۇراماسى ىرىكتەۋ كەزەڭىن سەگىز ۇپايمەن اياقتاپ, J توبىندا ءتورتىنشى ورىنعا تابان تىرەيدى.