ءۇندىستاننىڭ چەنناي قالاسىندا وتكەن ازيا چەمپيوناتىندا (Asia Masters Athletics) جەرلەسىمىز, جەڭىل اتلەت تولەگەن قوجاحمەتوۆ ءوز جاس ساناتىندا تولايىم تابىسقا قول جەتكىزدى.
71 جاستاعى سپورتشى قۇرلىق دوداسىنان بەس مەدال ولجالادى: 400 مەترلىك قاشىقتىققا جۇگىرۋدە چەمپيون اتانسا, 200 مەترلىك قاشىقتىقتا, سونداي-اق 4×400 مەترلىك ەستافەتادا كۇمىس مەدال ەنشىلەدى. 100 مەترلىك قاشىقتىققا جەكەلەي سايىسپەن 4×100 مەترلىك ەستافەتادا قولا مەدال الدى.
بيىلعى «Asia Masters Athletics» سايىسى «Masters Athletics Federation of India» ۇيىمىنىڭ قولداۋىمەن ءوتتى. «Masters Athletics» – ءباسى جوعارى, اۋەسقويلار مەن بۇرىنعى كاسىبي سپورتشىلاردى بىرىكتىرەتىن حالىقارالىق سايىس. ازيا قۇرلىعى چەمپيوناتى ەكى جىل سايىن ۇيىمداستىرىلىپ, 35 جاستان اسقان سپورتشىلار قاتىسادى. دوداعا قاتىسۋشىلار تەك مەدال ءۇشىن باق سىناپ قويماي, سالاماتتى ءومىر سالتىن ناسيحاتتاۋعا دا ۇلەس قوسادى. زەينەتكەر تولەگەن قوجاحمەتوۆ وسى تابىسىمەن جەتىستىككە جەتۋدە جاس شەكتەۋى جوقتىعىن كورسەتتى. ازيا چەمپيوناتىنا «Almaty Management University»-ءدىڭ قولداۋىمەن اتتانعان سپورتشىنى الماتى اۋەجايىندا وقۋ ورنىنىڭ ستۋدەنتتەرى زور قوشەمەتپەن قارسى الدى.
«Almaty Management University» الەۋمەتتىك باستامالار مەن سپورتتىق ءىس-شارالارعا ءاردايىم قولداۋ كورسەتەدى. بيىل ءۇشىنشى مارتە سولتۇستىك قازاقستان وبلىسى, ايىرتاۋ اۋدانى, لوبانوۆو اۋىلىندا «مۋسين-يۆانوۆ تراسساسى» اتتى شاڭعى جارىسى وتەدى. جارىستىڭ ماقساتى – شاڭعى سپورتىن ناسيحاتتاپ, جاستاردى تارتۋ. ءىس-شاراعا تانىمال سپورتشى, ليللەحاممەر قىسقى وليمپياداسىنىڭ جەڭىمپازى, ءتورت دۇركىن الەم چەمپيونى ۆلاديمير سميرنوۆ قاتىسادى دەپ جوسپارلانىپ وتىر.