اۋىل بالالارىن قۋانىشقا بولەدى

قايىربەك قوجاعالي ۇلى – وسى اۋىلدا تۋىپ-وسكەن پاراساتتى ازامات. ول كەزىندە قورعان قالاسىنداعى اۋىل شارۋاشىلىعى ينستيتۋتىنىڭ اۋىل شارۋاشىلىعىن مەحانيكالاندىرۋ فاكۋلتەتىن بىتىرگەن. ەڭبەك جولىن 1974 جىلى «وبرازتسوۆىي» كەڭشارىندا قاراپايىم مەحانيزاتور بولىپ باستاعان. ودان ارعى ءومىرى اسكەرلىك مىندەت, ينستيتۋتپەن جال­عاسادى. جوعارى ءبىلىم العان سوڭ «باي ەڭبەككە» بولىمشە باسقا­رۋ­شىلىعىنا تاعايىندالادى. جەر­لەستەرىنە جانى اشىپ, قول ۇشىن بەرىپ جۇرەتىن بولعان سوڭ اۋىلداستارىنىڭ اراسىندا ۇلكەن بەدەلگە يە. سوندىق­تان دا 90-جىلداردىڭ باسىندا كەڭ­شار تاراعاندا جەرلەستەرى وزدەرىنە تيەسىلى جەر پايىن قايرەكەڭە بەرىپ, ول «ەڭبەك» شارۋا قوجالىعىن اشادى. سودان بەرى بىرەۋدەن كەيىن, بىرەۋدەن ىلگەرى بولىپ ءوزىنىڭ شارۋاشىلىعىن دامىتا بەرەدى. 1997 جىلى اۋىلدىڭ ەجەلگى اتى «باي ەڭبەكتى» الىپ, سەرىكتەستىك قۇرادى.

قايىربەك قوجاسوۆتى ۇلكەن جەر يەلەنگەن, ءىرى شارۋالاردىڭ قاتارىنا قوسا المايسىڭ. ونىڭ استىق ەگەتىن بارلىق جەر كولەمى 3 600 گەكتار عانا. الايدا ەلگە, جەرگە جانى اشىپ, شا­رۋا­شىلىعىن دوڭگەلەتكەن سايىن تابى­سى جىلدان-جىلعا ارتىپ كەلەدى. ونىڭ ۇستىنە ءبىلىمى مەن تاجىريبەسى وزىق ازاماتتىڭ ءىسى العا باسىپ تۇر. اگ­رو­تەحنولوگيالىق تالاپتار تولىق ەگىس القاپتارى سوڭعى جىلدارى گەك­تا­رى­نان 30 تسەنتنەرگە جۋىق ءونىم بەرەدى.

كەيبىرەۋلەر سياقتى تابىسىن قالاعا تاسۋعا, جاقسى كولىك, جايلى ءۇي الۋعا شىعىنداماي, تۋعان جەرىن كوگەرتۋگە جۇمساپ وتىرعان قايرەكەڭ بۇعان دەيىن ءوز قاراجاتىمەن اۋىلداستارىن تازا اۋىزسۋمەن دە قامتاماسىز ەتكەن ەدى. جاڭا تۇرعىزىلعان اۋىل ۇيلەرىنە سۋ كىرگىزىپ, سانتەحنيكالىق قۇرالداردى دا ورناتىپ بەرگەن. جىل سايىن ارنايى بريگاداعا اقى تولەپ, اۋىلداستارىنىڭ ۇيىنە جوندەۋ جۇمىسىن دا جۇرگىزىپ بەرەدى. جۇمىسكەرلەرىنە پاي ۇلەسىن بەرۋمەن قاتار, جەم-ءشوپتى دە تومەندەتىلگەن باعاعا جەتكىزەدى. اۋىلدى اباتتاندىرۋ اياسىندا جىل سايىن كوشەت ەگۋ, اۋىل ىشىندەگى قورشاۋلاردى, جولداردى جاڭارتۋ بويىنشا دا جۇ­مىس جۇرگىزەدى. 2024 جىلى 1 مىڭ­عا جۋىق كوشەت ەككەن كورىنەدى. اۋىل­داستاردىڭ ايتۋىنا قاراعاندا, شا­رۋاشىلىق ارداگەرلەر, كوپبالالى جانە از قامتىلعان وتباسىلارعا, ومىرلىك قيىن جاعدايعا تاپ بولعان جاندارعا دا كومەك قولىن سوزادى.

قايىربەك قوجاسوۆتىڭ اۋىلى ەجەلدەن «باي ەڭبەك» اتالعان. ويت­كەنى بۇل اۋىلدىڭ ورنالاسقان جەرى تاماشا. ءدال ەسىل وزەنىنىڭ جاعاسى, ءشوبى شۇيگىن, توپىراعى قۇنارلى. بىراق جاناشىر يە بولماسا, قانشا قۇنارلى جەردە تۇرسا دا اۋىل شاشىلىپ قالار ەدى. سولتۇستىكتىڭ تا­لاي اۋىلى سولاي توزىپ كەتكەن. قايىر­بەكتەي بالاسى بولعان «باي ەڭبەك­تىڭ» باعى بار. قازىر قايرەكەڭ اۋىل­دىڭ ادام سانىن كوبەيتۋ ماقسا­تىمەن قونىس اۋدارۋشىلارعا ارناپ بىرنەشە ءۇي سالدى. ازىرگە 50 وقۋشى­عا شاقتالعان جاڭا باستاۋىش مەك­تەپتى دە بالا سانى كوبەيسە كەڭىتۋدى ويلاپ قويعان. ازىرگە 20 شاقتى ادام­عا جۇمىس ورنىن اشقان مەكتەپ زامانعا ساي جابدىقتالعان. وقۋ وشاعى ءتورت سىنىپ پەن مەكتەپكە دەيىنگى دايارلىق توبىن قامتيدى. ءار سىنىپ ەرەكشە تۇسپەن بەزەندىرىلگەن. عيماراتتا سپورت زالى, زاماناۋي جي­ھازدارى بار, وقۋ قۇرالدارى تولىق­تاي جەتكىزىلگەن. بۇل عيمارات تەك ءبىلىم سالاسىنا عانا ەمەس, اۋىلدىڭ الەۋمەتتىك-ەكونوميكالىق دامۋىنا قوسىلعان زور ۇلەس ەكەنى داۋسىز.

بۇعان دەيىن اۋىل بالالارى ياۆ­لەن­كا, پوكروۆكا اۋىلدارىنا قاتى­ناپ وقۋعا ءماجبۇر بولاتىن. ولار ءۇشىن ارنايى تاسىمالداۋ ۇيىم­داستىرىلعانىمەن, بۇل ۋاقىت پەن شىعىندى تالاپ ەتەتىن ەدى. ەندى بالا­لار تۋعان توپىراعىندا, اتا-اناسى­نىڭ قاسىندا انا ءتىلى مەن ۇلتتىق قۇندىلىق اياسىندا ءبىلىم الادى.

قايىربەك قوجاسوۆ «ەڭبەك اردا­گەرى» مەدالىمەن, اۋىل شارۋاشىلىعى ءمينيسترىنىڭ قۇرمەت گراموتاسىمەن, سولتۇستىك قازاقستان وبلىسى اكىمىنىڭ, ەسىل اۋدانى اكىمىنىڭ قۇرمەت گراموتالارىمەن ماراپاتتالعان, «پارىز-2019» سىيلىعىنىڭ جەڭىم­پازى. سولتۇستىك قازاقستان وبلىسى ەسىل اۋداندىق ءماسليحاتىنىڭ ءى, ءىىى شا­قىرىلىمىنىڭ دەپۋتاتى بولعان. رەس­پۋبليكا كۇنىنە وراي ول «ەرەن ەڭبەگى ءۇشىن» مەدالىمەن ماراپاتتالدى.

جاڭا مەكتەپتىڭ اشىلۋ سالتاناتىنا وبلىس اكىمى عاۋەز نۇرمۇ­حامبەتوۆ تە قاتىسىپ, مەتسەناتتىڭ باستاماسىنا ريزاشىلىعىن ءبىلدىر­دى. «بۇل – بيزنەستىڭ الەۋمەتتىك جاۋاپ­كەرشىلىگى مەن تۋعان اۋىلدىڭ دامۋىنا قوسقان زور ۇلەسىنىڭ ايقىن مىسالى», – دەدى ول ءوزىنىڭ سوزىندە.

سولتۇستىك قازاقستان وبلىسى