جۇزدەگەن جاس مامانعا جاردەم بەرىپ, جول باستاۋشى بولعان «ديپلوممەن – اۋىلعا» باعدارلاماسىنا جۇگىنۋشىلەر جىل سايىن كوبەيىپ كەلەدى.
جوباعا اۋىلدار مەن اۋدان ورتالىقتارىنا جۇمىس ىستەۋگە كەلگەندەر قاتىسا الادى. نەسيە قاراجاتىن ءۇي ساتىپ الۋعا نەمەسە سالۋعا پايدالانۋعا مۇمكىندىك بار. 2025 جىلى نەسيەنىڭ ەڭ جوعارى سوماسى – 2 500 اەك نەمەسە 9 830 000 تەڭگە, مەرزىمى – 15 جىلعا دەيىن.
سونىمەن قاتار اۋىل تۇرعىندارى كوتەرمە جاردەماقى الا الادى. 2025 جىلى بىرجولعى تولەم 100 اەك نەمەسە 393 200 تەڭگەگە جەتتى. ول ءۇيدى جابدىقتاۋعا جانە العاشقى قاجەتتى زاتتاردى ساتىپ الۋعا ارنالعان. باعدارلامانى قارجىلاندىرۋدى مەملەكەت جۇزەگە اسىرادى.
ايان وتەتىلەۋوۆ قوستاناي وبلىسى بەيىمبەت مايلين اۋدانىنا قاراستى بايشۋاق اۋىلىندا, سپورت سالاسىندا ەڭبەك ەتىپ ءجۇر. اۋىلدىق جەردە باسپاناسىز قيىن. مۇنى جاس مامان جاقسى ءتۇسىندى. سول ءۇشىن دە ەڭبەك ەتىپ, پاتەر الۋدىڭ قامىن بۇرىننان ويلاپ جۇرگەن. سپورت باپكەرىنە «وتباسى بانكىنىڭ» اۋىل جاستارىن قولداۋعا باعىتتالعان «ديپلوممەن – اۋىلعا» جوباسى كومەككە كەلدى.
«جاس كەزىمنەن سپورت سالاسىنا جاقىن بولدىم. ءورت ءسوندىرۋشى قىزمەتىندە جۇرسەم دە, تاڭداۋىمدى وزگەرتۋگە شەشىم قابىلدادىم. ءسويتىپ, ارقالىق قالاسىندا سپورت ماماندىعى بويىنشا سىرتتاي ءبىلىم الدىم. اسكەري سامبو مەن گرەپپلينگتەن ءبىرشاما جەتىستىكتەرىم بار ەدى. ۋاقىت وتە كەلە اۋىلعا شاقىرتۋ الىپ, اكىمدىك ارقىلى سپورت نۇسقاۋشىسى بولىپ جۇمىسقا ورنالاستىم. سول كەزدە باسپانا ماسەلەسىن شەشۋدىڭ ناقتى جولى ۇسىنىلىپ, «وتباسى بانك» ارقىلى ءۇي الۋعا مۇمكىندىك تۋدى», دەيدى ايان نۇرلىبەك ۇلى.
«ديپلوممەن – اۋىلعا» مەملەكەتتىك باعدارلاماسىنا اۋىل تۇرعىندارى, اۋدان ورتالىعىنىڭ ماماندارى ءوتىنىش بەرە الادى. ايان وتەتىلەۋوۆ تە مامانداردىڭ كەڭەسىمەن Baspana Market (otbasybank.kz) تسيفرلىق پلاتفورماسى ارقىلى قۇجاتتارىن وتكىزدى.
«نەگىزى, اۋدان اكىمدىگى جىل سايىن ءوز وڭىرلەرىنە قاجەتتى مامانداردىڭ ءتىزىمىن جاسايدى. ۇمىتكەرلەر الدىمەن اكىمدىكتەن سۇرانىسقا يە ماماندىقتار تۋرالى اقپارات الىپ, كەيىن Baspana Market ارقىلى ءوتىنىش بەرەدى دەپ ەستيتىنمىن. بۇعان مەنىڭ دە قولىم جەتكەن سوڭ, مەملەكەتتىڭ شىنايى كومەگىن سەزىندىم. ءۇي الۋدا ەشقانداي قيىندىق بولعان جوق. بارلىعى جۇيەلى تۇردە شەشىلدى», دەپ ءتۇسىندىردى كەيىپكەرىمىز.
باسپاناسىنا قولى جەتكەن مامان بار ىنتا-جىگەرىن جۇمىسىنا, شاكىرت تاربيەلەۋگە ارناماق. «قازىر اۋىلداردا جۇمىس ىستەيتىن جاستارعا جاعداي جاسالعان. ەندى ءبىزدىڭ ماقساتىمىز – اۋىل بالالارىنا سپورتتى ناسيحاتتاپ, سالاۋاتتى ءومىر سالتىن قالىپتاستىرۋ. بىزگە مۇمكىندىك مولىنان بەرىلىپ وتىر. سونى پايدالانا بىلسەك, ەلىمىزدىڭ دامۋىنا ۇلەس قوسقانىمىز», دەيدى سپورت نۇسقاۋشىسى.
«ديپلوممەن – اۋىلعا» – اۋىلدار مەن اۋدان ورتالىقتارىنا جۇمىس ىستەۋگە كەلگەن, اۋىلدىق جەردى تاڭداعان ايان وتەتىلەۋوۆ سياقتى ماماندارعا تۇرعىن ءۇي ساتىپ الۋ ءۇشىن جەڭىلدەتىلگەن نەسيە, سونداي-اق كوتەرمە جاردەماقى بەرەتىن قولايلى باعدارلاما. تەك باعدارلاماعا قاتىسۋ ءۇشىن بۇرىن الىنعان نەسيەلەر بويىنشا مەرزىمى وتكەن بەرەشەكتىڭ بولماۋى شارت. بانكتە اتاپ وتكەندەي, نەسيە مولشەرلەمەسى نەبارى 1%-عا تەڭ بولسا, باستاپقى جارنا مۇلدەم تالاپ ەتىلمەيدى. بيىل باعدارلاما يگىلىگىن كورگەن 200 ازامات باسپانالى بولدى.
2023 جىلدان باستاپ باعدارلامانىڭ وپەراتورى – «وتباسى بانكى». ازاماتتارعا قولايلى بولۋ ءۇشىن ءوتىنىش بەرۋ جۇيەسى تولىقتاي ونلاين فورماتقا اۋىستىرىلدى. ناتيجەسىندە كەلىسىم مەرزىمى قىسقارىپ, قارجى ءبولۋ ۇدەرىسىنىڭ اشىقتىعى ارتتى. سونداي-اق قاتىسۋشىلار ءوتىنىش مارتەبەسىن ونلاين باقىلاپ وتىرادى.