اسحات ايماعامبەتوۆ بالالاردىڭ الەۋمەتتىك جەلىگە تىركەلۋىن شەكتەۋ تۋرالى ۇسىنىس ءبىلدىردى

«ولاردىڭ TikTok, YouTube پەن Instagram-نان كورىپ جۇرگەن كونتەنتتەرىن اتا-انالارى كوبىنەسە باقىلاي المايدى, قاجەت سۇزگىدەن دە وتپەيدى. ياعني, 4-5-6 جاستاعى بالالاردىڭ قولىنا سىرىڭكەدەن دە قاۋىپتى قۇرىلعى دەپ ايتۋعا بولادى», دەپ جازدى دەپۋتات.

دەپۋتات الەۋمەتتىك جەلىلەردە زورلىق-زومبىلىق, كيبەربۋللينگ سياقتى مازمۇنداعى اقپاراتتىڭ مولدىعىن, بۇل قالىپتاسۋ ۇدەرىسىندەگى بالا پسيحيكاسىنا تىكەلەي اسەر ەتەتىن فاكتور ەكەنىن تىلگە تيەك ەتكەن.

«الەۋمەتتىك جەلىلەردىڭ الگوريتمدەرى بالالاردى ەكرانعا بايلاپ قويۋ ءۇشىن ارنايى جاسالعان. زەرتتەۋلەر گادجەتتەردى شامادان تىس قولدانۋ زەيىندى شوعىرلاندىرۋدى قيىنداتاتىنىن, ۇيقى رەجيمىن بۇزاتىنىن, مازاسىزدىق پەن اگرەسسيانى ارتتىرىپ, ءتىپتى سۋيتسيدكە دەيىن اپارۋى مۇمكىن ەكەنىن كورسەتىپ وتىر. بۇل تاقىرىپتا دجوناتان حايدتىڭ The Anxious Generation كىتابىن وقۋعا كەڭەس بەرەمىن», دەپ جازدى ا.ايماعامبەتوۆ.

دەپۋتاتتىڭ ايتۋىنشا بۇل ءبىزدىڭ ەلگە عانا ءتان ماسەلە ەمەس. مىسالى, قىتايدا بالالارعا ارنالعان قوسىمشالارعا ۋاقىت شەكتەۋى قويىلىپ, تەك ءبىلىم بەرەتىن كونتەنت ۇسىنىلادى. كوپتەگەن ەلدەردە دە زاڭنامالىق رەتتەۋ ءجۇرىپ جاتىر. بۇل – تىيىم ەمەس, سانالى ءارى جاۋاپتى ءتاسىل.

«ال بىزدە – شەكسىز «بوستاندىق», ونى ەشكىم ناقتى رەتتەمەيدى. بىزگە جۇيەلى شەشىمدەر كەرەك. مۇمكىن, زاڭنامالىق رەتتەۋ تۋرالى اشىق ديالوگتى باستايتىن ۋاقىت كەلگەن شىعار؟ الەۋمەتتىك جەلىلەرگە تىركەلۋ ءۇشىن جاس شەكتەۋى كەرەك پە, جوق پا (10-12-14 جاس)؟ بالالار ۇستايتىن تەلەفوندارداعى كونتەنتكە اۆتوماتتى فيلترلەر قاجەت پە, جوق پا؟», دەپ جازدى ا.ايماعامبەتوۆ.

ماجىلىسمەننىڭ سوزىنشە, ماسەلە تەك تىيىم ارقىلى شەشىلمەيدى. مۇندا ءبىلىم بەرۋ, بالالارمەن اشىق سويلەسۋ, تسيفرلىق گيگيەنانى ءتۇسىندىرۋ, سىني ويلاۋ قابىلەتىن دامىتۋ اسا ماڭىزدى.

«بىزگە تەك شەكتەۋ ەمەس, بىرلەسكەن شەشىمدەر قاجەت: فيلترلەر, گادجەتتەردى بىرگە پايدالانۋ, اعارتۋ, ەرەسەكتەردىڭ ناقتى نازارى جانە بالاما پايدالى بەلسەندىلىكتەر. قالاي بولعاندا دا, باستىسى – مۇنداي شەشىمدەر عىلىم مەن دالەلگە سۇيەنىپ قابىلدانۋى ءتيىس» دەپ تۇيىندەگەن اسحات ايماعامبەتوۆ.