تامىرى تەرەڭ تۇركى مادەنيەتى

ءىس-شارا بارىسىندا تۇركى حالىق­تارىنىڭ مادەني مۇراسىنا ارنالعان جانە تۇركى مەملەكەتتەرى باسشىلارى بەكىتكەن «تۇركى الەمىنىڭ كەلەشەگى – 2040» جانە «TURKTIME» ستراتەگيالىق قۇجاتتارىنا سايكەس دايىندالعان «تۇركى الەمىنىڭ مادەني كودى» اتالعان كەڭىستىك مادەني مۇراسىنىڭ كاتالوگى, سونداي-اق وزبەكستان رەسپۋبليكاسى پرەزيدەنتى شاۆكات ميرزيوەۆتىڭ تاپسىرماسىمەن جانە تۇركى ەلدەرى باسشىلارىنىڭ قولداۋىمەن جۇزەگە اسقان كوپتىلدى, كوپتومدىق «تۇركى فولكلورلىق مۇراسى» انتولوگياسى تانىستىرىلدى.

يۋنەسكو-نىڭ 43-سەسسياسىندا قابىل­دانعان شەشىمگە سايكەس «15 جەلتوقسان – دۇنيەجۇزى تۇركى تىلدەرى كۇنى» (World Turkic Language Family Day) بولىپ جاريالانعانى بەلگىلى. وسىعان بايلانىس­تى وتكەن جيىندى تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا اشىپ, يۋنەسكو مەن وزبەكستان رەسپۋبليكاسىنا ءىس-شارانى جوعارى دەڭگەيدە ۇيىمداستىرۋعا كورسەتكەن قولداۋى مەن قوناقجايلىعى ءۇشىن العىسىن ءبىلدىردى. ول قور شىعارعان «تۇركى الەمىنىڭ مادەني كودى» كاتالوگى مەن كوپتىلدى, كوپتومدىق «تۇركى فولكلورلىق مۇراسى» انتولوگياسى تۋرالى بايانداپ, وسى جوبالاردى جۇزەگە اسىرۋعا ۇلەس قوسقان مامانداردى, عالىمداردى جانە كونسۋلتاتيۆتىك كوميتەت مۇشەلەرىن شىن جۇرەكتەن قۇتتىقتاپ, ولاردىڭ ەڭبەگى مەن ادالدىعى ءۇشىن ريزاشىلىعىن ءبىلدىردى.

«تۇركى الەمىنىڭ مادەني كودى» جوباسىنىڭ كۋراتورى رۋستام مۋزافاروۆ پەن «تۇركى فولكلورلىق مۇراسى» انتولوگياسىن ازىرلەۋگە قاتىسقان وزبەكستاننىڭ بەلگىلى عالىمى جاببور ەشەنقۇلوۆ تا ءسوز سويلەپ, ۇسىنىلعان ەڭبەكتەردىڭ ماڭىزىن اتاپ, قوردىڭ تۇركى الەمى مادەني مۇراسىن ساقتاۋ جولىنداعى قاجىرلى ەڭبەگىن جوعارى باعالادى.

قۇرمەتتى قوناقتار قاتارىندا قىرعىز رەسپۋبليكاسى پرەزيدەنتىنىڭ كەڭەس­شىسى ارسلان كويچيەۆ, تۇركيا رەسپۋب­ليكاسىنىڭ ادىلەت جانە دامۋ پارتياسى توراعاسىنىڭ ورىنباسارى, پروفەسسور كۇرشاد زورلى, وزبەكستان عىلىم اكادەمياسىنىڭ ۆيتسە-پرەزيدەنتى, پروفەسسور باحروم ابدۋحاليموۆ بولدى. ولار بۇل تاريحي شەشىم تۇركى تىلدەرىنىڭ بايلىعىن حالىقارالىق دەڭگەيدە مويىنداتۋعا ىقپال ەتەتىنىن جانە قوردىڭ بۇل باعىتتا اتقارعان ەڭبەكتەرىن ەرەكشە اتادى.

ءىس-شارادا ازەربايجان رەسپۋبلي­كاسىنىڭ يۋنەسكو جانىنداعى تۇراقتى وكىلى, ەلشى ەلمان ابدۋللاەۆ, قازاقستان رەسپۋبليكاسىنىڭ عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ, تۇرىكمەنستاننىڭ فرانتسياداعى ەلشىسى جانە يۋنەسكو جانىنداعى تۇراقتى وكىلى ماقسات چاريەۆ, سونداي-اق ماجارستاننىڭ يۋنەسكو جانىنداعى تۇراقتى وكىلىنىڭ ورىنباسارى كينگا سيمون ءسوز سويلەدى.

القالى جيىندا سونىمەن قاتار قازاقستان رەسپۋبلي­كاسىنىڭ يۋنەسكو جانىنداعى تۇراقتى وكىلى اسقار ابدراح­مانوۆ, قىرعىز رەسپۋبليكاسىنىڭ فرانتسياداعى ەلشىسى جانە يۋنەسكو جانىنداعى تۇراقتى وكىلى سادىق شەر-نياز, تۇركيا رەسپۋبلي­كاسىنىڭ يۋنەسكو جانىنداعى تۇراق­تى وكىلى گۇلنۇر ايبەت, وزبەكستان رەسپۋبليكاسىنىڭ يۋنەسكو جانىنداعى تۇراقتى وكىلى كامول مۋحتاروۆ, سونداي-اق تۇركيا يۋنەسكو ىستەرى جونىندەگى ۇلتتىق كوميسسياسىنىڭ توراعاسى, پروفەسسور وجال وعۋز مىنبەرگە كوتەرىلىپ, ءوز پىكىرلەرىن ءبىلدىردى.

ءىس-شاراعا بەلگيا, ەكۆادور, فرانتسيا, لاتۆيا, ومان, قاتار, ۆەنەسۋەلا جانە چەحيانىڭ يۋنەسكو جانىنداعى تۇراقتى وكىلدىكتەرى, وزبەكستانداعى اككرەديتتەلگەن ديپلوماتيالىق كورپۋس پەن حالىق­ارالىق ۇيىمدار مۇشە­لەرى, تانىمال عالىمدار, مادەنيەت ينستيتۋت­تارىنىڭ وكىلدەرى, تۇركى مادەنيەتى مەن مۇراسىنا قىزىعۋشىلىق تانىتقان شەتەلدىك قوناقتار جانە باق وكىلدەرى جيىننىڭ ماڭىزىن ارتتىرا ءتۇستى.