14–16 قاراشا ارالىعىندا اقش-تىڭ لەيك-پلەسيد قالاسىندا مانەرلەپ سىرعاناۋدان گران-پري ءتۋرنيرىنىڭ جالاۋى جەلبىرەيدى. وعان جەرلەسىمىز ميحايل شايدوروۆ تا قاتىسادى. جارىس قورىتىندىسىندا 5–8 جەلتوقسان كۇندەرى جاپونيانىڭ ناگويا قالاسىنداعى فينالدىق كەزەڭدە ونەر كورسەتەتىن ۇمىتكەرلەر انىقتالادى. كۇنشىعىس ەلىندەگى دودادا كەلەسى جىلى يتاليادا الاۋى تۇتاناتىن قىسقى وليمپيا ويىندارىنىڭ جولدامالارى ساراپقا سالىنادى.
مانەرلەپ سىرعاناۋدان وساكاداعى گران-پريدە ەلىمىزدىڭ 18 جاستاعى سپورتشىسى سوفيا سامودەلكينانىڭ سەنساتسيالىق ناتيجەگە قول جەتكىزىپ, كۇمىس مەدالدى يەلەنگەنى بەلگىلى. وسى تابىسىنىڭ ارقاسىندا ول ISU رەيتينگىندە بىردەن توعىز ساتىعا جوعارىلاپ, قازىر 28-ورىندا تۇر.
لوزاننادا (شۆەيتساريا) «Olympism 365» كوميسسياسىنىڭ وتىرىسى ءوتتى. وعان ەلىمىزدىڭ ۇلتتىق وليمپيادا كوميتەتىنىڭ (ۇوق) پرەزيدەنتى گەننادي گولوۆكين قاتىستى. شارانىڭ باستى ماقساتى – تەحنولوگيالىق, الەۋمەتتىك, گەوساياسي جاعدايلاردا وليمپيادالىق ينستيتۋتتاردىڭ تۇراقتىلىعى مەن وزەكتىلىگىن ساقتاۋ, ونىڭ باسەكەگە قابىلەتتىلىگىن ارتتىرۋ, وليمپيادا قوزعالىسىنىڭ ساياساتىن جاڭارتۋ ءارى باسقارۋ جۇيەسىن جەتىلدىرۋ.
تايلاند استاناسى بانگكوكتە دجيۋ-دجيتسۋدان وتكەن الەم چەمپيوناتىندا ەلىمىزدىڭ ۇلتتىق قۇراماسى 11 التىن, 16 كۇمىس, 13 قولا مەدالدى يەلەنىپ, جالپى كوماندالىق ەسەپتە جەكە-دارا كوش باستادى. ەكىنشى, ءۇشىنشى ورىنداردى بەيتاراپ قۇراما (10+7+17) مەن ۆەتنامنىڭ سپورتشىلارى (8+7+10) ەنشىلەدى. جەرلەستەرىمىزدىڭ اراسىنان تالانت توقتىباەۆ, اقبار ەلۋباي ۇلى, اقجۇنىس وتەباەۆا, ماقسات تولەندى, ماقسات مۇرات ۇلى, اتاكەلدى ەسەتوۆ, اسلان قاناتبەك, ءابۋ-باكىر جانىبەك, جىبەك ق ۇلىمبەتوۆا, شەرحان جاقسىلىق, بەكزات بايمۇراتوۆ تەڭدەسسىز دەپ تانىلدى.
وتكەن اپتانىڭ اياعىندا قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىستىڭ» ويىنشىلارى ەكى رەت مۇز ايدىنىنا شىقتى. العاشىندا ولار وۆەرتايمدا ەكاتەرينبۋرگتىڭ «اۆتوموبيلسىنەن» ايلاسىن اسىردى – 3:2. الايدا ودان كەيىن تۇراقتى بىرىنشىلىكتىڭ جارىس كەستەسىندە كوش باستاپ تۇرعان ماگنيتوگورسكىنىڭ «مەتاللۋرگىنە» ەسە جىبەردى – 1:4.