بالقاش اۋدانىندا «باۋىرجان-7» جاۋاپكەرشىلىگى شەكتەۋلى سەرىكتەستىگىنىڭ القاپتارىندا كۇرىش جيناۋ ناۋقانى قارقىندى جۇرگىزىلىپ جاتىر. الا جازداي كۇتىپ-باپتاعان اق مارجاندى ىسىراپسىز جيناپ الۋعا قاجەتتى بارلىق اۋىل شارۋاشىلىعى تەحنيكاسى تولىق جۇمىلدىرىلعان.
ەگىس القابىنداعى كومباينداردىڭ تىنىمسىز قوزعالىسى ەڭبەك كورىگىن قىزدىرۋمەن قاتار وراق ناۋقانىنىڭ ۋاقتىلى, ساپالى جۇرگىزىلۋىن قامتاماسىز ەتىپ وتىر. شارۋاشىلىق باسشىسى تالعات سۇلتانوۆ دالا توسىندەگى ديقانداردىڭ جۇمىسىن ۇيلەستىرىپ, وندىرىستىك ۇدەرىستىڭ ءتيىمدى ۇيىمداستىرىلۋىنا ءجىتى كوڭىل بولەدى.
كۇرىش ءوسىرۋدىڭ شەبەرى اتانعان شارۋاشىلىقتىڭ سۋارمالى جەرلەرىنىڭ جالپى كولەمى 730 گەكتاردى قۇرايدى, ونىڭ 247 گەكتارى – كۇرىش, 205 گەكتارى – بيداي, 278 گەكتارى – كوپجىلدىق شوپتەر. ەگىن جيناۋعا ەكى كومباين, ءبىر «كاماز» جۇك كولىگى, سونداي-اق «متز-80», «متز-1221» تراكتورلارى تارتىلعان. بۇگىنگى كۇنى 110 گەكتار كۇرىش ورىلىپ, ورتاشا ونىمدىلىك گەكتارىنا شامامەن 40 تسەنتنەردى قۇراپ وتىر.
– جەر ەڭبەكتى جەمەيدى. سوناۋ كوكتەمنەن باستالاتىن تىنىمسىز ەڭبەكتىڭ وتەۋى كۇزگى جيىن-تەرىمدە كورىنەدى. بيىلعى ءتۇسىم جامان ەمەس. كوڭىل توعايتار ءونىمدى ىسىراپسىز جيناپ الۋعا جۇمىسشىلار بىلەك سىبانا كىرىسىپ كەتتى. بۇل ۇجىمنىڭ بىرلىگى مەن تىنىمسىز تىرلىگىنىڭ ناتيجەسىن ايعاقتايدى, – دەيدى شارۋاشىلىق باسشىسى.
بيىل بالقاش اۋدانىنداعى سۋارمالى ەگىستىك جەرلەردىڭ جالپى كولەمى 27 مىڭ گەكتاردان استى. ونىڭ ىشىندە 7 مىڭ گەكتاردان استام جەرگە كۇرىش ەگىلسە, 5 مىڭ گەكتاردان استامى – بيداي مەن ارپا ەگىسى. قالعان القاپتارعا كوكونىس, باقشا, مال ازىقتىق داقىلدار وسىرىلگەن.
ءشوپ دايىنداۋ ناۋقانى بارىسىندا 160 مىڭ توننادان استام پىشەن, 40 مىڭ توننادان اسا سۇرلەم-ءشوپ, شامامەن 33 مىڭ توننا سابان, 85 مىڭ توننا سۇرلەم دايىندالعان. ءداندى داقىلداردان جينالعان ءونىم كولەمى 9 مىڭ توننادان اسىپ, ورتاشا ونىمدىلىك گەكتارىنا 18 تسەنتنەردى قۇرادى. قازىرگى ۋاقىتتا 6 مىڭ گەكتاردان استام كۇرىش القابى ورىلىپ, ورتاشا ونىمدىلىك گەكتارىنا 42 تسەنتنەرگە جۋىقتادى.
كۇز مەزگىلى – ءداستۇرلى تۇردە اۋىل شارۋاشىلىعى ماۋسىمىنىڭ قورىتىندىسىن شىعاراتىن ۋاقىت. بالقاش اۋدانىنىڭ بەرەكە مەن مولشىلىقتىڭ بەلگىسىنە اينالعان كۇرىش ءونىمى – ديقانداردىڭ تىنىمسىز ەڭبەگى مەن جوعارى كاسىبي شەبەرلىگىنىڭ ناتيجەسى. ەگىنشىلەر ءوڭىردىڭ اگرارلىق سالاسىن تۇراقتى دامىتۋعا, ازىق-ت ۇلىك قاۋىپسىزدىگىن نىعايتۋعا ەلەۋلى ۇلەس قوسىپ كەلەدى.
الماتى وبلىسى,
بالقاش اۋدانى