الماتى وبلىسىنىڭ جاس كاسىپكەرى باعلان ولجاباەۆ مەملەكەت باسشىسى قاسىم-جومارت توقاەۆقا جاس كاسىپكەرلەر مەن IT-مامانداردىڭ دامۋىنا ەرەكشە نازار اۋدارىپ وتىرعانى ءۇشىن العىس ءبىلدىردى. كاسىپكەر ءوز سوزىندە پرەزيدەنتتىڭ باستامالارى جاڭا بۋىن كاسىپكەرلەرى مەن يننوۆاتورلاردىڭ قالىپتاسۋىنا زور سەرپىن بەرىپ وتىرعانىن اتاپ ءوتتى, دەپ جازادى Egemen.kz.
«قۇرمەتتى قاسىم-جومارت كەمەل ۇلى! قازاقستاننىڭ جاڭا ەليتاسىن – جاس كاسىپكەرلەردى, ينجەنەرلەر مەن IT-مامانداردى دامىتۋعا ەرەكشە نازار اۋدارىپ كەلە جاتقانىڭىز ءۇشىن ءوز العىسىمدى بىلدىرەمىن. مەن قازاقستاندىق ستارتاپتاردىڭ دامۋىنا, ينۆەستيتسيا تارتىپ, حالىقارالىق دەڭگەيگە شىعۋىنا قولداۋ كورسەتەتىن Pul.vc ۆەنچۋرلىك قۇرىلىمىنىڭ نەگىزىن قالاۋشىمىن. مەملەكەت پەن كاسىپكەرلەردىڭ بىرلەسكەن ەڭبەگى ارقىلى قازاقستان يننوۆاتسيالار سالاسىندا وڭىرلىك كوشباسشى بولاتىنىنا سەنىمدىمىن», دەلىنگەن حابارلامادا.
Pul.vc ۆەنچۋرلىك پلاتفورماسى بۇگىندە وتاندىق ستارتاپتاردىڭ دامۋىنا سەرپىن بەرىپ, ينۆەستورلار مەن جاس كاسىپكەرلەر اراسىنداعى ءوزارا بايلانىستى نىعايتۋعا ۇلەس قوسىپ كەلەدى.
«كاسىپكەردىڭ جولى وتە اۋىر, قۇلايسىڭ, ودان قايتا تۇراسىڭ. العاشىندا وتە قيىن كەزەڭدەردەن وتتىك. مىسالى, ينۆەستيتسيا تارتۋ ءۇشىن ۇزاق ۋاقىت كەتەدى. ستارتاپ باستاعان كەزدە كوپ نارسەنى بىلمەيتىنبىز. كوپ ستارتاپەرلەر بىردەن ءونىمىن جاساپ, ونىڭ نارىقتاعى سۇرانىسىن زەرتتەمەي جىبەرەدى – بۇل ۇلكەن قاتەلىك. مەن دە سولاي قاتەلەستىم. سوندىقتان ءبىز قازىر اقشا ەمەس, ەڭ الدىمەن ادامي رەسۋرس بەرەمىز. ياعني ءار جوبانى سول سالاداعى ماماندارمەن بىرىكتىرىپ, سۇرانىسقا يە ءونىمدى ىزدەيمىز», دەيدى كاسىپكەر باعلان ولجاباەۆ.
ونىڭ ايتۋىنشا, Pul.vc پلاتفورماسىنىڭ باستى ەرەكشەلىگى — جاس ستارتاپەرلەرگە باعىت-باعدار بەرىپ, ولاردىڭ نارىققا بەيىمدەلگەن يدەيالارىن جۇزەگە اسىرۋعا كومەكتەسۋ.
باعلان باۋىرجان ۇلى مەملەكەت باسشىسىنىڭ جاستار مەن يننوۆاتسيالىق كاسىپكەرلىككە كوڭىل ءبولۋى بۇگىنگى بۋىن ءۇشىن اسا ماڭىزدى ەكەنىن ايتادى.
«قازىر كوپتەگەن جاس كاسىپكەرلەر مەن IT ماماندارى نەدەن باستارىن بىلمەي جۇرەدى. كوكەيلەرىندە سۇراق كوپ, بىراق كىمنەن سۇرارىن بىلمەيدى. سوندىقتان پرەزيدەنتتىڭ مەملەكەت تاراپىنان وسىنداي يمپۋلس بەرىپ جاتقانى قۋانتادى. بۇرىن مۇنداي مۇمكىندىكتەر از بولاتىن. تەك Astana Hub پەن Most IT Hub قانا بولاتىن. جاقىندا Higgsfield AI دەگەن ستارتاپ جارق ەتتى. كاپيتاليزاتسياسى ميلليارد دوللارعا جەتكەن. سول جاقسى تۇرتكى بولدى. ءبىز قازاقستاننان شىعاتىن وسىنداي ستارتاپتى ۇزاق كۇتتىك. ەندى مۇنداي جوبالارعا كورسەتىلەتىن قولداۋ كوبەيىپ, جاڭا ستارتاپتاردىڭ سانى دا ارتا باستايدى. سينگاپۋر, MENA ەلدەرىنەن قازاقستان ەكونوميكاسىنا دەگەن قىزىعۋشىلىق ارتادى. سول كەزدە مەملەكەت قولعا الا باستاسا نۇر ۇستىنە نۇر بولادى», دەيدى ول.
كاسىپكەردىڭ پىكىرىنشە, مەملەكەت پەن جەكە سەكتوردىڭ بىرلەسكەن جۇمىسى ەلىمىزدى يننوۆاتسيالار ورتالىعىنا اينالدىرادى.
بىلتىر باعلان ولجاباەۆ كومانداسىمەن بىرگە «Qazinnovations» يننوۆاتسيالاردى دامىتۋ جونىندەگى ۇلتتىق اگەنتتىگى ۇيىمداستىرعان گرانت بايقاۋىندا جەڭىمپاز اتانىپ, 20 ميلليون تەڭگەدەن استام قارجىلاي قولداۋ العان.
«سانات احانوۆ باستاعان اگەنتتىك كومانداسى ۇلكەن قولداۋ كورسەتتى. سول گرانتتىڭ ارقاسىندا يدەيامىزدى جۇزەگە اسىرىپ, جوبامىزعا ۆەنچۋرلىك ينۆەستيتسيا تارتا الدىق. كومپانيامىزدىڭ كاپيتاليزاتسياسى 10 ميلليون دوللارعا جەتتى. ءبىر جىل بويى نيۋ-يوركتەگى ۆەنچۋر بيلدەردە تاجىريبە جيناپ, ونى قازاقستاندا ىسكە اسىرىپ جاتىرمىز. ءبىز سينگاپۋر جۇيەسىمەن جۇمىس ىستەيمىز, مۇنداي فورمات ورتالىق ازيادا ازىرگە جوق», دەيدى ول.
كاسىپكەردىڭ ايتۋىنشا, كەز كەلگەن ستارتاپتىڭ تابىسى يدەيا مەن سەنىمدى كومانداعا بايلانىستى.
«جاستارعا ايتار كەڭەسىم – الدىمەن نارىقتى زەرتتەپ, ءوز كليەنتىڭدى تابۋ كەرەك. سوسىن مىقتى كوماندا قۇرۋ قاجەت. «سپروسي مامۋ» دەگەن جاقسى كىتاپ بار, سونى وقىسا, كوپ سۇراققا جاۋاپ تابادى. ەڭ باستىسى – يدەياڭدى جۇزەگە اسىرۋدان قورىقپاۋ جانە مىقتى كوماندا قۇرىپ ونى ارتىڭنان ەرتە الۋ», دەدى باعلان ولجاباەۆ.
Pul.vc ۆەنچۋرلىك پلاتفورماسى الماتى وبلىسى مەن وزگە وڭىرلەردەگى جاس كاسىپكەرلەرگە ارنالعان اشىق الاڭعا اينالىپ وتىر. مۇندا ءار ستارتاپتىڭ پرەزەنتاتسياسى قارالىپ, الەۋەتى بار جوبالارعا تاجىريبەلى ماماندار مەن ينۆەستورلار تارتىلادى. باعلاننىڭ ايتۋىنشا, جۋىردا Pul.vc جانىنان جاس ستارتاپەرلەردى تەگىن قولداۋعا باعىتتالعان ارنايى قور قۇرىلماق.
ايتا كەتەيىك, مەملەكەت باسشىسى قاسىم-جومارت توقاەۆ بيىلعى جولداۋىندا ەلىمىزدە جاساندى ينتەللەكت پەن يننوۆاتسيالىق كاسىپكەرلىكتى دامىتۋ, جاستاردىڭ تەحنولوگيالىق ءبىلىمىن ارتتىرۋ جانە ۆەنچۋرلىك ەكوجۇيەنى قولداۋ باعىتتارىنا ەرەكشە نازار اۋدارعان بولاتىن. ونىڭ جاستاردى كاسىپكەرلىككە, يننوۆاتسيا مەن IT سالاسىنا تارتۋ جونىندەگى ساياساتى ەلىمىزدە جاڭا بۋىن كاسىپكەرلەرىنىڭ قالىپتاسۋىنا جول اشتى.
الماتى وبلىسىنان شىققان جاس كاسىپكەر باعلان ولجاباەۆتىڭ باستاماسى – وسى باعىتتاعى ناقتى ناتيجەلەردىڭ ءبىرى. وڭىرلىك دەڭگەيدە جۇزەگە اسىپ جاتقان Pul.vc سياقتى جوبالار مەملەكەت پەن جەكە سەكتوردىڭ ءتيىمدى سەرىكتەستىگىن كورسەتەدى. مۇنداي باستامالار ارقىلى الماتى وبلىسى تەك ءوندىرىس پەن اۋىل شارۋاشىلىعى ەمەس, يننوۆاتسيا مەن تەحنولوگيا سالاسىندا دا الدىڭعى قاتارعا شىعۋعا بەت الدى.
بۇگىندە Astana Hub تەحنوپاركىندە الماتى وبلىسىنان تىركەلگەن 11 IT-كومپانيا جۇمىس ىستەيدى. ولاردىڭ قاتارىندا باعلان ولجاباەۆتىڭ كومپانياسى دا بار. بۇل كاسىپورىندار سالىق جانە ۆيزا جەڭىلدىكتەرىن پايدالانادى, سونداي-اق سەرىكتەستىك رەسۋرستار مەن بيزنەستى كەڭەيتۋ مۇمكىندىكتەرىنە قول جەتكىزەدى.
جالپى, الماتى وبلىسىندا جاستار كاسىپكەرلىگىن قولداۋ باعدارلامالارى بەلسەندى جۇزەگە اسىرىلىپ جاتىر. بيىل شامامەن 100-گە جۋىق جاس كاسىپكەر ءوز ءىسىن اشۋ ءۇشىن قايتارىمسىز گرانتتار العان.
الماتى وبلىسى