قاراعاندى وبلىسىندا ارحەولوگتار ساق داۋىرىنە جاتاتىن جاۋىنگەردىڭ بۇزىلماعان قابىرىن انىقتادى, دەپ حابارلايدى Egemen.kz وبلىستىڭ ءباسپاسوز قىزمەتىنە سىلتەمە جاساپ.
ءبىر مەتردەن ءسال استام تەرەڭدىكتە زەرتتەۋشىلەر وڭ قولىندا قولا قىلىش ۇستاعان ەر ادامنىڭ قاڭقاسىن تاپقان. قاسىندا جەبە ۇشتارى مەن التىن سىرعا جاتقان.
بۇل بىرەگەي ولجا بيىل جازدا قاراعاندى وبلىستىق تاريحي-ولكەتانۋ مۇراجايىنىڭ ارحەولوگتارى اقتوعاي اۋدانىنداعى قارابيە قورىمىن قازۋ كەزىندە تابىلدى. №1 قورعاننىڭ تولىعىمەن ساقتالعانى بەلگىلى بولدى — مۇنداي جاعداي ساق ەسكەرتكىشتەرى ءۇشىن وتە سيرەك كەزدەسەدى.
«قابىردىڭ جابىندى تاستارىن العاننان كەيىن, ءبىز قاڭقانى تولىق اناتوميالىق قالپىندا تاپتىق. ونىڭ وڭ الاقانىندا قىلىش بولدى. مۇنداي ولجاعا جولىقپاعانىمىزعا كوپ جىل بولدى», دەيدى مۇراجايدىڭ جالپى تاريح, ارحەولوگيا جانە ەتنوگرافيا ءبولىمىنىڭ مەڭگەرۋشىسى داۋرەن ءجۇسىپوۆ.
جەرلەۋ ءبىزدىڭ داۋىرىمىزگە دەيىنگى VII–VI عاسىرلارعا جاتادى جانە عالىمداردىڭ پىكىرىنشە, ول ەليتالى جاۋىنگەرلەر وكىلىنە تيەسىلى. ەرەكشە نازار اۋدارتقانى – ۇزىندىعى شامامەن 30 سانتيمەتر بولاتىن قوس ءجۇزدى تۇتاس قۇيىلعان قولا اكيناك. قارۋ دالا جىرتقىش قۇستارىنىڭ بەينەلەرىمەن ورنەكتەلگەن.
«مۇنداي پىشىندەگى جانە بەزەندىرۋدەگى سەمسەر قازاقستان اۋماعىنان بۇرىن-سوڭدى تابىلعان ەمەس. بۇل جادىگەر ساق داۋىرىندەگى مەتالل وڭدەۋ ءىسى مەن كوركەمدىك تالعامنىڭ جوعارى دەڭگەيىن ايعاقتايدى», دەپ اتاپ ءوتتى ارحەولوگ, تاريح عىلىمدارىنىڭ كانديداتى ارمان بەيسەنوۆ.
قىلىشتىڭ جانىنان ارحەولوگتار بەس مەتالل جەبە ۇشىن جانە التىن سىرعا تاپقان. التىن اشەكەي جاۋىنگەردىڭ قوعامداعى جوعارى مارتەبەسىن ايعاقتايدى. زاتتاردىڭ كوركەمدىك ءستيلى تالدى-2 قورىمىنان تابىلعان «التىن ادام» جادىگەرلەرىمەن ۇندەس.
بارلىق تابىلعان بۇيىمدار وبلىستىق مۇراجايدىڭ قورىنا تاپسىرىلماق. عالىمدار ەجەلگى جەرلەۋدىڭ قۇپياسىن اشۋ ءۇشىن مەتاللوگرافيالىق, راديوكومىرتەكتى جانە انتروپولوگيالىق زەرتتەۋلەر جۇرگىزۋگە دايىندالىپ جاتىر. زەرتتەۋ ناتيجەلەرى كەلەسى جىلى قىستا تانىستىرىلادى.
ارحەولوگيالىق جۇمىستار قاراعاندى وبلىسى اكىمدىگىنىڭ جانە وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن جۇرگىزىلدى.