اتىراۋدا تۇراتىن فيليپپ تسىپليونكوۆ بىرنەشە جىلدان بەرى مۇناي تاسىمالدايتىن كومپانيادا جۇمىس ىستەيدى. الايدا تابيعاتتىڭ اسەم كورىنىسىن, اسىرەسە قۇستاردى سۋرەتكە تۇسىرگەندى ۇناتادى.
ونىڭ فوتوعا تۇسىرۋگە اۋەستىگىنە جەرگىلىكتى تابيعات جاناشىرى يۋليا ۆاحميستروۆا وتكىزگەن ەكسكۋرسيا سەبەپ بولىپتى. ەكسكۋرسياعا قاتىسقان ول مۇنايلى ءوڭىردىڭ تابيعاتى اسەم ەكەنىنە كوز جەتكىزگەن.
ء«بىز تۋعان جەرىمىزدىڭ تابيعاتىنا ءمان بەرمەي جۇرە بەرەمىز. كۇن سايىن تورعايدى, كوگەرشىن مەن قارعانى ءجيى كورەمىز. وزگە دە قۇستاردىڭ بار ەكەنىنە نازار اۋدارمايمىز. قالاداعى بيىك ۇيلەرگە جاقىندامايتىن قوس قاناتتىلاردى كورۋ ءۇشىن تابيعات اياسىنا ءجيى شىعاتىن بولدىم», دەيدى ول.
فيليپپ جايىق وزەنىنىڭ جاعالاۋىنا ءجيى بارادى. ويتكەنى سۋ ايدىنىنىڭ شاھاردان تىسقارى جاعالاۋى قۇس بازارىنا اينالادى. اققۋدى دا, قوقيقاز بەن اققۇتاندى دا كورۋگە بولادى. بۇل ونىڭ قۇستار الەمىنە قىزىعۋشىلىعىن وياتتى.
ء«ار ادامنىڭ ۇناتاتىن نارسەسى ءارتۇرلى. بىرەۋلەر تابيعات اياسىندا سەرۋەندەيدى. كەيبىرى بالىق, اڭ اۋلايدى. ال مەن قۇستاردى سۋرەتكە تۇسىرەمىن. ويتكەنى قۇستاردىڭ وزىندىك الەمى, مىنەزى بار. تابيعاتتىڭ قۇستارسىز ءسانى بولۋى مۇمكىن بە؟ قوس قاناتتىلاردى سۋرەتكە ءتۇسىرىپ, اتىراۋ تابيعاتىنىڭ اسەم ەكەنىن كورسەتۋدى كوزدەدىم», دەيدى ف.تسىپليونكوۆ.
اۋەسقوي فوتوگرافتىڭ ايتۋىنشا, كەز كەزگەن كورىنىستى, ءتىپتى ادامنىڭ ارەكەتىن, نە تابيعاتتىڭ سۇلۋلىعىن سۋرەتكە ءتۇسىرۋدىڭ وزىندىك قيىندىعى بار. ەڭ باستىسى, شەبەرلىك پەن توزىمدىلىك قاجەت.
«اسىرەسە قۇستاردى سۋرەتكە تارتۋ ءۇشىن ءۇش قاعيدانى بەرىك ۇستانامىن. بۇل – ساقتىق, شىدامدىلىق, جەدەلدىك. ساقتىق دەيتىن سەبەبىم, قۇستاردى ۇركىتىپ الماۋ قاجەت. ءسال سىبدىردى ەستىسە, ۇشىپ كەتەدى. فوتواپپاراتىمدى دايىنداپ, ءساتتى سۋرەت ءۇشىن بىرنەشە مينۋت, كەيدە ورنىمنان تاپجىلماي, ساعاتتاپ وتىرامىن. قۇستاردىڭ ءار قيمىلىن قىزىقتايمىن. قاناتتىلاردىڭ دا ءتۇرلى مىنەزى بار. ءبىرى ۇنەمى ۇشىپ-قونىپ جۇرەدى. كەيبىرى قونعان جەرىنەن قوزعالماي, دەمالعانداي وتىرادى. سونداي كەزدە شىدامدى بولۋعا تىرىسامىن. قاناتىن قومداعان, ءتۇرلى جاندىكتى تىستەگەن ءساتىن ءتۇسىرۋ ءۇشىن جەدەلدىك كەرەك. بالاپانىن قورەكتەندىرگەن ءساتىن قالت جىبەرمەيمىن», دەيدى اۋەسقوي فوتوگراف.
ول تابيعات اياسىنا شىعار الدىندا ناقتى جوسپار قۇرمايدى. ماقساتى – تابيعاتقا سۇيىسپەنشىلىكتى ارتتىرۋ. بۇل ءۇشىن الەۋمەتتىك جەلىدەگى دوستارىنا ادەمى سۋرەت ۇسىنادى.
«قۇستاردىڭ سۋرەتىنەن كۇنتىزبە جاساۋدى ويلاستىرىپ ءجۇرمىن. ال كورمەلەرگە, نە بايقاۋلارعا قاتىسۋعا تاجىريبە جيناۋ, سۋرەتكە ءتۇسىرۋ شەبەرلىگىمدى شىڭداۋ قاجەت. بالكىم, وعان ءالى ەرتەلەۋ شىعار. قۇستاردى عانا سۋرەتكە تۇسىرۋمەن شەكتەلگىم كەلمەيدى. الداعى ۋاقىتتا دالا اڭدارىن تۇسىرگىم كەلەدى. تۇلكى, نە قاسقىر بولتىرىكتەرىمەن كەزدەسسە, ءتىپتى جاقسى بولار ەدى», دەيدى ول.