ۇلىتاۋ وبلىسىنىڭ ورتالىعى جەزقازعان قالاسىندا «حالىقتىق زاڭگەر» اتتى رەسپۋبليكالىق اكتسيا ءوتتى. بۇل باستامانىڭ ماقساتى – زاڭ ۇستەمدىگىن نىعايتۋ, ازاماتتاردىڭ قۇقىقتىق ساۋاتىن ارتتىرۋ جانە مەملەكەتتىك ءارى زاڭگەرلىك قىزمەتتەردىڭ قولجەتىمدىلىگىن قامتاماسىز ەتۋ.
اكتسيا اياسىندا ءاربىر ازامات تەگىن قۇقىقتىق كەڭەس الىپ, ماڭىزدى ماسەلەلەر بويىنشا تۇسىنىكتەمە جانە قۇقىقتارىن قورعاۋ جونىندە ناقتى كومەك الا الادى. ءىس-شاراعا پروكۋراتۋرا ورگاندارى, ادىلەت جانە پوليتسيا قىزمەتكەرلەرى, الەۋمەتتىك قورعاۋ, ءبىلىم جانە دەنساۋلىق ساقتاۋ سالاسىنىڭ وكىلدەرى, سونداي-اق تاجىريبەلى زاڭگەرلەر مەن ادۆوكاتتار قاتىستى.
ءىس-شارادا الەۋمەتتىك قولداۋ جانە الەۋمەتتىك تولەمدەر, وتباسى مەن بالالاردىڭ قۇقىقتارىن قورعاۋ, كاسىپكەرلەردىڭ قۇقىقتارىن قورعاۋ, ەڭبەك جانە جەر قاتىناستارى, الاياقتىقتىڭ الدىن الۋ جانە ازاماتتاردى قورعاۋ, سونداي-اق تۇرعىن ءۇي-كوممۋنالدىق ماسەلەلەرىنە ەرەكشە نازار اۋدارىلدى. كەلىپ تۇسكەن ءاربىر ءوتىنىش جەكە قارالىپ, ءتيىستى ورگاندارعا جولدانىپ, پروكۋرورلىق باقىلاۋعا الىنادى.
«باستى مىندەتىمىز – ءاربىر تۇرعىنعا كومەك كورسەتۋ, سۇراعىنا جاۋاپ بەرىپ, زاڭدى قۇقىقتارىن قورعاۋعا قولداۋ كورسەتۋ. ءبىز زاڭ ۇستەمدىگىن قامتاماسىز ەتۋگە, ازاماتتاردىڭ قۇقىقتارى مەن زاڭدى مۇددەلەرىن قورعاۋعا جانە قوعامداعى تۇراقتىلىقتى ساقتاۋعا باعىتتالعان جۇمىسىمىزدى تاباندى تۇردە جۇرگىزە بەرەمىز», دەيدى زاڭ وكىلدەرى.
ۇلىتاۋ وبلىسىنىڭ پروكۋراتۋراسى حالىقپەن اشىق ديالوگتى جالعاستىرا بەرەدى. اكتسيا اياسىندا جۇزدەگەن ادام تەگىن قۇقىقتىق كومەك الدى.
ۇلىتاۋ وبلىسى