جەتىسۋ وبلىسىندا بيكەن ريموۆا اتىنداعى دراما تەاتردا قازاق ساحنا ونەرىندەگى جۇلدىزدى جۇپ – قازاقستاننىڭ حالىق ءارتىسى الماحان كەنجەبەكوۆا مەن قازاقستاننىڭ ەڭبەك سىڭىرگەن قايراتكەرى كەندەباي تەمىرباي ۇلىنىڭ 75 جىلدىق مەرەيتويىنا ارنالعان «ونەردە – 50, ومىردە – 75» اتتى شىعارماشىلىق كەشى ءوتتى. كەشكە وبلىس اكىمى بەيبىت يساباەۆ, سونداي-اق تۇڭعىشباي جامانقۇلوۆ, نۇرقانات جاقىپباي, داريعا تۇرانقۇلوۆا باستاعان ونەردەگى ارىپتەستەرى, زيالى قاۋىم وكىلدەرى, ونەرسۇيەر جۇرتشىلىق قاتىستى.
كەش قوناقتارى ساحنا ساڭلاقتارىنىڭ شىعارماشىلىعىنا ارنالعان كورمەنى ارالادى. وندا ساحنالىق كيىمدەرى, سپەكتاكلدەردەگى رولدەرىنەن فوتوسۋرەتتەر, جالپى ونەرلەرىنە قاتىستى باسقا دا بۇيىمدار قويىلدى.
ساحنادا قۇتتىقتاۋ ءسوز سويلەگەن بەيبىت يساباەۆ قازاق ونەرىنىڭ دامۋىنا ولشەۋسىز ۇلەس قوسقان قوس ساڭلاقتىڭ ەڭبەگىن ەرەكشە اتاپ ءوتتى.
«سىزدەردىڭ ءومىر جولدارىڭىزدى بيكەن ريموۆا اتىنداعى تەاتردان ءبولىپ قاراۋ مۇمكىن ەمەس. ەڭ العاش وسى تەاتردىڭ ىرگەتاسىن قالاسىپ, ساحنا شىمىلدىعىن اشقان, تابان اۋدارماي جارتى عاسىر بويى ونەرگە قىزمەت ەتىپ كەلە جاتقان سىزدەرگە جەتىسۋلىقتاردىڭ اتىنان ەرەكشە ريزاشىلىعىمدى بىلدىرەمىن», دەدى بەيبىت يساباەۆ.
اباي اتىنداعى وپەرا جانە بالەت تەاترىنىڭ ونەرپازدارى, «يل-كانتو» كۆارتەتى, «قوڭىر» توبى اننەن شاشۋ شاشتى. جەتىسۋلىق ونەر ۇجىمدارى ارتىستەرىنىڭ ورىنداۋىندا الماحان نۇرپەيىسقىزىنىڭ ولەڭدەرى وقىلىپ, «دانەش اعا», «فاريزا», «قىزىما» سەكىلدى بىرقاتار ءانى ورىندالدى. قوس اكتەر تۇسكەن «كوشپەندىلەر», ء«بىر ۋىس بيداي», باسقا دا فيلمدەردەن, تەلەحابارلاردان ۇزىندىلەر بەرىلدى.
ەسكە سالساق, قوس اكتەر شولپان جانداربەكوۆانىڭ سىنىبىن ءبىتىرىپ, العاشقى ەڭبەك جولىن جاڭا قۇرىلعان تالدىقورعان تەاترىندا باستاپ, ەلۋ جىل ساحناعا ادال قىزمەت ەتىپ كەلەدى. تەاتر ۇجىمى وتكىزگەن بۇل مەرەيتويلىق ءىس-شارا ۇلتتىق ساحنا ونەرىنىڭ دامۋىنا زور ۇلەس قوسقان مايتالمان تۇلعالاردى دارىپتەۋ, ولاردىڭ باي شىعارماشىلىق مۇراسىن كەيىنگى ۇرپاققا ناسيحاتتاۋ جانە جاس اكتەرلەرگە ونەگە ەتۋدى ماقسات ەتتى.