ەلىمىزدە كىندىك ازيانىڭ ەندوسكوپيست-دارىگەرلەرى بىلىكتىلىگىن ارتتىراتىن وزىق ەندوسكوپيالىق ورتالىق اشىلدى. قازاقستان, جاپونيا, پولشا, چەحيا ەلدەرىنىڭ ماماندارى بىرلەسە وتىرىپ, الماتىداعى كارديولوگيا جانە ىشكى اۋرۋلار عىلىمي زەرتتەۋ ينستيتۋتىنىڭ بازاسىندا وسى جاڭا ەندوسكوپيالىق وقۋ ورتالىعىنىڭ اشىلۋىنا ىقپال ەتتى.
كوپ كۇتتىرگەن كەشەن ەندى ەلىمىزدىڭ عانا ەمەس, ورتالىق ازيا ەلدەرىنەن كەلگەن ەندوسكوپيست-دارىگەرلەردىڭ دە كاسىبي ءبىلىم-بىلىگىن شىڭداپ, ەندوسكوپيالىق دياگنوستيكانى جاڭا دەڭگەيگە كوتەرەتىن زاماناۋي ءبىلىم بەرۋ حابىنا اينالادى.
ەندوسكوپيالىق ورتالىق Evis X1 ەندوسكوپيالىق جۇيەلەرى مەن جوعارى تەحنولوگيالى سيمۋلياتورلار سياقتى ەڭ سوڭعى قۇرال-جابدىقتارمەن قامتاماسىز ەتىلگەن. مۇنداي وزىق وقۋ ۇدەرىسى دارىگەرلەردىڭ حالىقارالىق ستاندارتتارعا ساي كاسىبي بىلىكتىلىگىن كوتەرۋگە سەپتەسەدى. ءارى بۇل جۇيە ەندوسكوپيانى جاساندى ينتەللەكتىمەن بىرگە جاڭا دەڭگەيگە كوتەرىپ, دارىگەرگە ءتىپتى وتە كىشكەنتاي, كوزگە كورىنۋى, جەتۋى قيىن ىسىكتەردى انىقتاۋعا كومەكتەسەدى.
– ورتالىقتىڭ اشىلۋىنا الەمدىك مەديتسينالىق جابدىقتار ءوندىرىسىنىڭ كوشباسشىسى – Olympus كومپانياسىمەن ستراتەگيالىق ارىپتەستىگىمىز ىقپال ەتتى. سەرىكتەستەرىمىزگە كورسەتكەن قولداۋى ءۇشىن شىنايى العىسىمدى بىلدىرەمىن, – دەدى كىاعزي باسقارما توراعاسى رۇستەم تولەۋتاەۆ.
ر.تولەۋتاەۆ جاڭا ورتالىقتىڭ ءوز دارىگەرلەرىمىزبەن قوسا, وزبەكستان, تاجىكستان, تۇرىكمەنستان, قىرعىزستاننان كەلگەن مامانداردى دا ماشىقتاندىرا وتىرىپ, وزىق تەحنولوگيالاردى مەڭگەرەتىن ماڭىزدى الاڭعا اينالاتىنىنا سەنىم بىلدىرە كەلە, ونىڭ دياگنوستيكا مەن مەديتسينالىق كومەكتىڭ ساپاسىن ارتتىرۋعا مۇمكىندىك بەرەتىنىن اتاپ ءوتتى.
جاپونياداعى Olympus Corporation وكىلى يوحي ماەدا: «ترەنينگ ورتالىعىن قۇرۋعا قازاقستان, جاپونيا, پولشا, چەحيا كوماندالارىنىڭ اتسالىسقانىنا قۋانىشتىمىز. ورتالىق مامانداردى دايارلاۋ, ءبىلىم الماسۋ, جوعارى ستاندارتتاردى ەنگىزۋ سالالارىندا جاڭا مۇمكىندىكتەر اشادى», دەيدى.
ءوز كەزەگىندە Olympus OCG ديرەكتورى توماش ستاۆيارسكي: «ماقساتىمىز – ادامداردى اجالدان اراشالاۋ. ءبىز دارىگەرلەردى جابدىقتى دۇرىس ءارى ءتيىمدى پايدالانۋعا ۇيرەتەمىز, سەبەبى ناۋقاستاردىڭ ءومىرى مەن دەنساۋلىعى وسىعان تاۋەلدى. وسى ماڭىزدى جوبانىڭ ءبىر بولىگى بولعانىمىزدى ماقتان تۇتامىز», دەدى.
باسقارما توراعاسىنىڭ عىلىمي-كلينيكالىق جانە يننوۆاتسيالىق قىزمەت جونىندەگى ورىنباسارى ءجاميلا قايبۋللاەۆا ەندوسكوپيالىق ورتالىقتىڭ دارىگەرلەرىمىزدى ساپالى كولونوسكوپيا ادىستەرىنە ۇيرەتىپ قانا قويماي, ADR كورسەتكىشىن ەسەپتەۋ جۇيەسى ەنگىزىلەتىنىن دە جەتكىزدى. بۇل كورسەتكىش – تىك ىشەك پەن توق ىشەك قاتەرلى ىسىگىمەن كۇرەستەگى تاعدىرشەشتى فاكتور. ونى قولدانۋ مىڭداعان ادامنىڭ ءومىرىن ساقتاپ قالۋعا مۇمكىندىك بەرەدى.
ەندوسكوپيا جانە ينتەرۆەنتسيالىق گاستروەنتەرولوگيا بولىمشەسىنىڭ مەڭگەرۋشىسى الما حابيجانوۆا دا ورتالىق ازيادا ەندوسكوپيالىق قىزمەتتىڭ دامۋىنا اتالعان ورتالىق ايتارلىقتاي ۇلەس قوساتىنىنا سەنىمدى.
وقۋ ورتالىعىنىڭ باعدارلامالارىنا تەوريالىق كۋرستارمەن قاتار, سيمۋلياتورلار مەن ناقتى ومىرلىك, كلينيكالىق جاعدايدا وتكىزىلەتىن كەڭ كولەمدى پراكتيكالىق ساباقتار دا كىرەدى. ولار وقۋ ۇدەرىسىنىڭ تيىمدىلىگىن بارىنشا ارتتىرۋعا جول اشادى. بۇل ماڭىزدى وقيعا ەلىمىزدە مەديتسينالىق ءبىلىم بەرۋ مەن تەحنولوگيالاردى دامىتۋدىڭ جاڭا كەزەڭى باستالعانىن بىلدىرەدى.
الماتى