كورنەكتى مايدانگەر جازۋشى كەمەل توقاەۆ اتىنداعى ءداستۇرلى دەتەكتيۆ شىعارمالار بايقاۋى 2018 جىلدان بەرى تۇراقتى ءوتىپ كەلەدى. «زاڭ مەديا» كورپوراتسياسى قولعا العان بايقاۋدىڭ قورىتىندى ءىس-شاراسى سوڭعى جىلدارى ەلىمىزدىڭ ءار قالاسىندا ۇيىمداستىرىلىپ جۇرگەنىن كوپشىلىك بىلەدى. بيىل ادەبي بايقاۋدىڭ ۇزدىكتەرى تاراز تورىندە انىقتالدى.
«زاڭ مەديا» كورپوراتسياسىنىڭ ديرەكتورى, بەلگىلى جۋرناليست دوسىمبەك وتەعاليدىڭ ايتۋىنشا, وسى جىلعى بايقاۋعا ءۇش اي بەدەرىندە ەلىمىزدىڭ ءار قيىرىنان 72 اۆتوردان شىعارمالار كەلىپ تۇسكەن. ولاردىڭ اراسىنان ىرىكتەلىپ الىنعان تۋىندىلار قازىلار القاسىنىڭ قاراۋىنا ۇسىنىلعان. جالپى, ءداستۇرلى بايقاۋعا قاتىسۋشىلار سانى جىل وتكەن سايىن ارتا تۇسكەن.
«بايقاۋدىڭ نەگىزگى ماقساتى – سالالىق كوركەم ادەبيەتتى دامىتۋ, ۇلتتىق دەتەكتيۆ جانرىنىڭ نەگىزىن قالاعان كەمەل توقاەۆ مۇراسىن ۇرپاق جادىندا جاڭعىرتۋ. كەيىنگى جىلدارى وسى جانردا قالام سىلتەيتىن جازۋشىلار قاتارى ارتا تۇسكەنىن بايقاپ, قۋانىپ وتىرمىز.
جامبىل ءوڭىرى وسى جىلى «اۋليەاتا – كىتاپ وقيتىن ءوڭىر» جوباسىن قولعا العانى ءمالىم. سول تۇرعىدان العاندا ءبىزدىڭ بايقاۋىمىز بەن جامبىل جەرىندەگى جوبا اراسىندا ۇيلەسىم بار دەپ پايىمدايمىز. ادەبي بايقاۋعا بارىنشا قولداۋ بىلدىرگەن ءوڭىر باسشىسى ەربول قاراشوكەەۆكە, وبلىستىق سوت پەن وزگە دە قۇقىق قورعاۋ ورگاندارىنىڭ ازاماتتارىنا ايتار العىسىم شەكسىز», دەيدى د.وتەعالي.
ماراپاتتاۋ راسىمىندە ءسوز سويلەگەن وبلىس اكىمىنىڭ ورىنباسارى سەرىك سالەموۆ كەمەل توقاەۆتىڭ ۇلت ادەبيەتىندەگى ورنى مەن تاعىلىمعا تولى تۋىندىلارى قاي كەزدە دە جاستاردىڭ, جالپى وقىرمان قاۋىمنىڭ نازارىنان تىس قالمايتىنىن تىلگە تيەك ەتتى.
سەناتور نۇرتورە ءجۇسىپ, بەلگىلى جۋرناليست سەرىك ابىكەن ۇلى باستاعان قازىلار القاسى بايقاۋعا تۇسكەن شىعارمالاردى جان-جاقتى زەردەلەپ, جازۋشىلاردىڭ شىتىرمان وقيعالاردى شەبەرلىكپەن جەتكىزە بىلۋىنە ايرىقشا دەن قويىپتى. س.ابىكەن ۇلىنىڭ ايتۋىنشا, قاتىسۋشى قالامگەرلەر بۇرناعى جىلدارعا قاراعاندا كاسىبي تۇرعىدا وسكەن كورىنەدى. ونى شىعارمالارداعى سيۋجەتتىڭ كوركەمدىك دەڭگەيىنەن بايقاۋعا بولادى.
بايقاۋ قورىتىندىسىندا «مىلقاۋ ءتۇن» تۋىندىسى ءۇشىن الماتىلىق گۇلدەن جىلكەلديەۆا باس جۇلدەگە (1,5 ملن تەڭگە) لايىق دەپ تانىلسا, ءبىرىنشى ورىن (1 ملن تەڭگە) «قيىس جول» شىعارماسى ءۇشىن جامبىلدىق ايزادا كەنجەمولداەۆاعا بۇيىردى. ەكى ەكىنشى ورىن الداجار ءابىلوۆ پەن بولاي بەرديەۆاعا (ارقايسىسىنا 750 مىڭ تەڭگە), ءۇش ءۇشىنشى ورىندى (ارقايسىسىنا 500 مىڭ تەڭگە) ميراس مۇقاش, شەرنياز جالعاسبەك ۇلى جانە باقىت جاليەۆا يەلەندى. سونداي-اق بىرنەشە قالامگەرگە 300 مىڭ تەڭگە كولەمىندە ىنتالاندىرۋ سىياقىسى جانە وبلىستىق سوتتىڭ ارنايى سىيلىعى تابىستالدى.
تاراز