ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى نارتاي ارالباي ۇلى ىشكى ىستەر ءمينيسترى ەرجان سادەنوۆ پەن مادەنيەت جانە اقپارات ءمينيسترى ايدا بالاەۆاعا الەۋمەتتىك جەلىلەردە بەلەڭ العان قاۋىپتى پرانكتەرگە قاتىستى دەپۋتاتتىق ساۋال جولداپ, مۇنداي ارەكەتتەرگە زاڭدى تۇردە توسقاۋىل قويۋ قاجەتتىگىن ايتتى, دەپ جازادى Egemen.kz.
دەپۋتات قوعامدا كەڭىنەن تاراعان قاۋىپتى پرانكتەر مەن جاۋاپسىز بلوگەرلەردىڭ ارەكەتتەرىنە الاڭداۋشىلىعىن ءبىلدىرىپ, ولاردىڭ قوعامدىق سانا مەن تارتىپكە تيگىزىپ جاتقان تەرىس ىقپالىنا توقتالدى.
«قازىر قوعامدا پرانكپەن پاراقشاسىنداعى ءلۇپىلدىڭ سانىن ارتتىرعانمەن پاراسات بيىگىنەن وماقاسا قۇلاعاندار قاپتاپ كەتتى. ادامدى قورقىتۋدى, قوعامدىق ورىندا اقىماقتىق جاساۋدى قىزىق كورىپ ءازىلدىڭ شەكاراسىنان شىعىپ كەتكەن اركىمدەر الەۋمەتتىك جەلىدە الەك سالۋدى دوعارماي تۇر», دەدى دەپۋتات.
نارتاي ارالباي ۇلىنىڭ ايتۋىنشا, ەلوردا مەن وزگە وڭىرلەردە تۇسىرىلگەن پرانكتەردىڭ كوپشىلىگى قوعامدا قورقىنىش پەن نارازىلىق تۋدىرىپ وتىر. ول مىسال رەتىندە ليفت ىشىندە «جالعان ءمايىت» قويىپ ادامداردى شوشىتقان, تاپانشامەن قورقىتىپ ۆيدەو تۇسىرگەن جانە اۋلا سىپىرۋشىلاردى مازاق ەتكەن بلوگەرلەردىڭ ارەكەتتەرىن اتادى.
«ول ول ما, ءبىزدىڭ بلوگەر-سىماقتار شەتەلگە بارىپ ابىرويدى ايرانداي توگىپ ءجۇر. ماسەلەن, قازاقستاندىق بلوگەر ارۋجان ايبەكوۆا قىتايدا «ۇرلىق جاساپ جاتقانداي» روليك تۇسىرگەن. ارتى ۇلكەن شۋ بولىپ, اقىرى الگى قىز جەرگىلىكتى پوليتسياعا شاقىرىلدى. ءتۇسىندىرۋ جۇمىستارى جۇرگىزىلدى. بىراق ول ءتۇسىندى مە؟ ويتكەنى ءدال وسى بلوگەردىڭ ارادا از ۋاقىت وتكەندە تاشكەنت مەتروسىندا جىگىتتەردىڭ قولىنان ۇستاپ تيىسكەنى تۋرالى بەينەجازبا تاعى تارادى. «ويىننان دا ومىرتقا سىناتىنىن» بىلمەيتىن مۇنداي بلوگەر-سىماقتاردى قاتاڭ جاۋاپقا تارتاتىن كەز كەلدى. سەبەبى بۇل ادامنىڭ جەكە ومىرىنە قول سۇعۋ, قوعامدىق ءتارتىپتى بۇزۋ», دەدى ول.
دەپۋتات جاساندى ينتەللەكتىنى تەرىس ماقساتتا پايدالانۋ ارقىلى جاسالاتىن جاڭا تۇردەگى پرانكتەرگە دە نازار اۋداردى. ونىڭ ايتۋىنشا, مەملەكەتتىك تۇلعالاردىڭ جالعان بەينەلەرىمەن نەمەسە ازاماتتاردى شاتاستىراتىن بەينەروليكتەرمەن قوعامدى اداستىرۋ قاۋىپتى قۇبىلىسقا اينالىپ بارادى.
«تاعى ءبىر پرانكتە بالالار اتا-انالارىنا «تانىمايتىن ادام ۇيگە كەلىپ تۇر, نە ىستەيمىز؟» دەپ جاساندى ينتەلەكت ارقىلى بەيمالىم ادامنىڭ ۇيگە كىرىپ كەتكەن, پاتەردى ارالىپ جۇرگەن سۋرەتتەرىن جىبەرەدى. زارەسى ۇشقان اتا-انا پوليتسياعا تەلەفون شالادى, جۇمىسىن تاستاپ ۇيىنە بارادى. اقىرىندا بۇل پرانك دەپ بالا-شاعا بەيقام وتىرادى. ءدال سول ۋاقىتتا پوليتسيا شىن مۇقتاج ادامعا كومەككە بارۋعا ۇلگەرمەي قالۋى مۇمكىن, ونى ينتەرنەتتىڭ ينەسىنە وتىرعاندار ۇقپايدى», دەدى دەپۋتات.
سونداي-اق دەپۋتات سوڭعى ۋاقىتتا ەل ىشىندە «تابىتتا 24 ساعات وتكىزۋ» سەكىلدى ادام شوشىتارلىق چەللەندجدەردىڭ تارالۋىن سىنعا الدى.
«حاكىم اباي: «ىشپەك, جەمەك, كيمەك, كۇلمەك, كوڭىل كوتەرمەك – بۇل نارسەلەردىڭ ءبارىنىڭ دە ولشەۋى بار. ولشەۋىنەن اسىرسا, زيانى تيمەك» دەگەن ۋاعىندا. سوندىقتان ولشەمگە ورەسى جەتپەيتىندەردى زاڭمەن تۇسايتىن كەز كەلدى», دەدى نارتاي ارالباي ۇلى.
دەپۋتات ءوز سوزىندە بىرقاتار ناقتى ۇسىنىستاردى دا ورتاعا سالدى:
پرانك بارىسىندا قوعامدىق ءتارتىپتى بۇزعان, جەكە ادامنىڭ ومىرىنە قول سۇققانداردى انىقتاپ, ولاردىڭ بىرىڭعاي ءتىزىمىن جاساپ جاريالاۋ قاجەت. قاۋىپتى پرانك ارقىلى ادامنىڭ ار-نامىسى مەن ابىرويىنا قول سۇققانداردىڭ الەۋمەتتىك جەلىدەگى پاراقشالارىن دەرەۋ بۇعاتتاۋ كەرەك; الەۋمەتتىك جەلى اكىمشىلەرىنەن قاۋىپتى پرانكتەر مەن بەينەجازبا جاريالانعان پاراقشالاردى انىقتاپ, ۋاكىلەتتى ورگانعا جەدەل حابارلاۋدى تالاپ ەتۋ قاجەت; مۇنداي تەرىس قۇبىلىستىڭ الدىن الۋ ماقساتىندا اقپاراتتىق-ءتۇسىندىرۋ جۇمىستارىن جۇيەلى تۇردە, ناتيجە بەرەتىن كونتەنت رەتىندە جۇرگىزۋ كەرەك.