بۇگىن ماجىلىستە تاريحي-مادەني مۇرا وبەكتىلەرىن ساقتاۋ جانە پايدالانۋ ماسەلەلەرىن قامتيتىن زاڭ جوباسى قارالىپ, ءبىرىنشى وقىلىمدا ماقۇلداندى. قۇجات مەملەكەت باسشىسىنىڭ ۇلتتىق قۇرىلتايدا بەرگەن ارحەولوگيالىق قىزمەتتى رەتتەۋ جونىندەگى تاپسىرماسىن جۇزەگە اسىرۋ ماقساتىندا دەپۋتاتتاردىڭ باستاماسىمەن دايىندالعان, دەپ حابارلايدى Egemen.kz.
«زاڭ جوباسىنىڭ ماقساتى – ارحەولوگيا سالاسىنداعى تاريحي-مادەني مۇرا نىساندارىن قورعاۋ جانە پايدالانۋ ماسەلەلەرى بويىنشا زاڭنامانى جەتىلدىرۋ. قۇجاتتا ارحەولوگيالىق جۇمىستار بارىسىندا انىقتالعان تاريحي-مادەني مۇرا وبەكتىلەرى تۋرالى بارلىق مالىمەتتى جيناقتاۋ ءۇشىن «ارحەولوگيالىق جۇمىستار جونىندەگى بىرىڭعاي اۆتوماتتاندىرىلعان اقپاراتتىق جۇيە» قۇرۋ قاراستىرىلعان», دەپ حابارلادى قر پارلامەنتى ءماجىلىسىنىڭ ءباسپاسوز قىزمەتى.
سونىمەن قاتار, ارحەولوگيالىق زەرتتەۋلەردى عىلىمي جانە اقپاراتتىق تۇرعىدا قولداۋ ءۇشىن ءا.ح.مارعۇلان اتىنداعى ارحەولوگيا ينستيتۋتىن ۇيلەستىرەتىن «ۇلتتىق ارحەولوگيالىق قىزمەتتىڭ» قۇزىرەتتەرىن ايقىنداۋ ۇسىنىلادى.
«عىلىمي-رەستاۆراتسيالىق جانە ارحەولوگيالىق جۇمىستارعا 5 جىلدىق مەرزىمگە ليتسەنزيا بەرۋدى ءبولۋ ارقىلى ارحەولوگيالىق جۇمىستارعا ليتسەنزيا بەرۋ جۇيەسىنە وزگەرىستەر ەنگىزىلەدى. سونداي-اق قارجىلاندىرۋ تەتىگىن ەسكەرە وتىرىپ, ارحەولوگيالىق جۇمىستار جوسپارلى جانە پروفيلاكتيكالىق (جوسپاردان تىس) بولىپ ەكىگە بولىنەدى. قازاقستاننىڭ بارلىق اۋماعىنان جينالعان جاپپاي ارحەولوگيالىق ولجالار مەن ماتەريالداردى ساقتاۋ ءۇشىن جاپپاي ارحەولوگيالىق ولجالار مەن ماتەريالداردىڭ ۇلتتىق دەپوزيتاريى قۇرىلادى», دەلىنگەن حابارلامادا.
قۇجاتتا ارحەولوگيالىق جۇمىستار ناتيجەسىندە بۇزىلعان جەر ۋچاسكەلەرى مەن باسقا دا تابيعي وبەكتىلەردى مىندەتتى تۇردە قالپىنا كەلتىرۋ ەرەجەلەرى ناقتىلانادى. بۇدان بولەك, ارحەولوگيالىق ىزدەستىرۋ كەزىندە مەتالل دەتەكتورلار, رادارلار مەن ماگنيتتىك قۇرىلعىلاردى زاڭسىز قولدانۋعا تىيىم سالىنادى.
سونىمەن قاتار تاريحي جانە مادەني ماڭىزى بار جەرلەر مەن ولاردىڭ قورعالاتىن ايماقتارى مەملەكەتتىك جەر كاداسترىنا ەنگىزىلەتىن بولادى.