ەلىمىزدىڭ پرەمەر-ليگاسى مارەگە جەتتى. ەرتە كوكتەمدە باستالىپ, قوڭىر كۇزگە دەيىن جالعاسقان جارىستا الماتىنىڭ «قايراتى» الدىنا جان سالمادى.
چەمپيوندىق ءتاجدىڭ تاعدىرى سوڭعى 26-تۋردا شەشىلدى. شەشۋشى ويىندى تاماشالاۋعا جانكۇيەرلەر الماتىداعى ورتالىق ستاديونعا كوپتەپ جينالدى. ماتچتىڭ 15-مينۋتىندا قوناقتار ەسەپ اشتى. نازمي گريپشيدىڭ بەرگەن پاسىن مارتين توماسوۆ قاقپاعا ءدوپ ءتۇسىردى – 0:1. ودان كەيىن الاڭ يەلەرى جانۇشىرا العا ۇمتىلدى. استانالىقتار دا قالىسپادى. ولاردىڭ دا ەسەپتى ەسەلەۋگە بىرنەشە مۇمكىندىگى بولدى. بىراق ەلوردالىق فۋتبولشىلاردىڭ ءار شابۋىلىنا «قايراتتىڭ» قورعاۋشىلارى تويتارىس بەردى.
ۇزىلىستەن سوڭ رافاەل ءورازباحتيننىڭ شاكىرتتەرى باسىمدىق تانىتا باستادى. سونداي ءبىر قارقىندى شابۋىلدىڭ اقىرى داستان ساتپاەۆتىڭ ادەمى گول سوعۋىمەن اياقتالدى – 1:1. تەڭ ويىن باستى قارسىلاسىنان ەكى ۇپاي الدا تۇرعان «قايراتتى» قاناعاتتاندىراتىن ەدى. سودان كەيىن «استانانىڭ» ويىنشىلارى تەگەۋىرىنىن كۇشەيتىپ, ءجيى العا ۇمتىلدى. الايدا وتە ساۋاتتى قورعانعان الماتىلىقتار تەڭ ەسەپتى ساقتاپ قالدى.
ءسويتىپ, 59 ۇپايدى قورجىنعا سالعان «قايرات» قاتارىنان ەكىنشى جىل ەل چەمپيونى اتاندى. چەمپيوننان ەكى ۇپاي كەم جيعان «استانا» كۇمىس مەدالدى يەلەنسە, «توبىل» قولا جۇلدەنى ولجالادى. قوستانايلىق كلۋب 54 ۇپاي جينادى. ودان كەيىنگى ورىندارعا مىنا كوماندالار جايعاستى: 4. «ەلىماي» (48 ۇپاي), 5. «اقتوبە» (43), 6. «جەڭىس» (36), 7. «ورداباسى» (35), 8. «وقجەتپەس» (35), 9. «قىزىلجار» (27), 10. « ۇلىتاۋ» (23), 11. «قايسار» (22), 12. «جەتىسۋ» (21), 13. «اتىراۋ» (19), 14. «تۇران» (16).