رەسپۋبليكا كۇنىندە ەلىمىزدىڭ بىرقاتار وڭىرلەرىندە جاڭا ءبىلىم بەرۋ نىساندارى اشىلدى. بۇل تۋرالى وقۋ-اعارتۋ مينيسترلىگى حابارلادى, دەپ جازادى Egemen.kz.
جاڭا عيماراتتار جامبىل, تۇركىستان, ماڭعىستاۋ, اقمولا, قاراعاندى, باتىس قازاقستان جانە شىعىس قازاقستان وبلىستارى مەن الماتى قالاسىندا پايدالانۋعا بەرىلدى.
تارقاتىپ ايتساق, الماتى قالاسىندا بىردەن ءتورت جاڭا فورماتتاعى مەكتەپ ەسىگىن ايقارا اشتى. سولاردىڭ ءبىرى مەدەۋ اۋدانىنداعى 2 مىڭ وقۋشى ورنىنا ارنالعان №220 مەكتەپ. جاڭا عيمارات ءوز ميكرواۋدانى بويىنشا وقۋشى ورنى تاپشىلىعىن تولىق جويدى. مەكتەپتە 83 وقۋ كابينەتى, 4 سپورت زالى, كىتاپحانا, اسحانا جانە كوۆوركينگ ايماقتارى بار.
جامبىل وبلىسىندا قاراسۋ جانە قاراكەمەر اۋىلدارىندا ەكى جاڭا مەكتەپ ءوز ەسىگىن ايقارا اشتى. سولاردىڭ بىرىندە 28 وقۋ كابينەتى, كونفەرەنتس-زال, STEM-زەرتحانالار, روبوتوتەحنيكا كابينەتى, كوۆوركينگ ورتالىعى, سونداي-اق 3 شەبەرحانا مەن 3 عىلىمي زەرتحانا قاراستىرىلعان.
ماڭعىستاۋ وبلىسىنىڭ مۇنايلى اۋدانىندا «كەلەشەك مەكتەپتەرى» ۇلتتىق جوباسى اياسىندا 900 ورىندىق 11-ءشى مەكتەپ اشىلدى. وندا 45 وقۋ كابينەتى زاماناۋي ينتەراكتيۆتى تاقتالارمەن جابدىقتالعان.
سونداي-اق تۇركىستان وبلىسىنىڭ ساۋران اۋدانىندا مەرەكە قارساڭىندا «كەلەشەك مەكتەپتەرى» ۇلتتىق جوباسى شەڭبەرىندە №5 مەكتەپ پايدالانۋعا بەرىلدى. مەكتەپتە جاڭا ۇلگىدەگى كابينەتتەر, STEM-زەرتحانالار, 3 شەبەرحانا, كوۆوركينگ ايماقتارى, دەمالىس جانە ويىن الاڭدارى, سپورتتىق زالدار, اسحانا, كىتاپحانا جانە اكت زالى بار. قازىرگى تاڭدا وڭىردە التى مەكتەپتىڭ قۇرىلىسى ءجۇرىپ جاتىر.
باتىس قازاقستان وبلىسىنىڭ دوستىق اۋىلىندا 1200 وقۋشىعا ارنالعان جاڭا فورماتتاعى مەكتەپ اشىلدى. نىساننىڭ پايدالانۋعا بەرىلۋىمەن اپاتتى مەكتەپ ماسەلەسى شەشىلدى. ايتا كەتەيىك, بۇل – وڭىردە ۇلتتىق جوبا اياسىندا سالىنعان بەسىنشى مەكتەپ.
اقمولا وبلىسىنىڭ كوكشەتاۋ قالاسىندا اپاتتى عيماراتتىڭ ورنىنا سالىنعان №10 جاڭا مەكتەپتىڭ تەحنيكالىق اشىلۋى ءوتتى. مۇندا جايلى ءبىلىم الۋ ءۇشىن بارلىق جاعداي جاسالعان: كەڭ سىنىپتار, زەرتحانالار, روبوتوتەحنيكا كابينەتتەرى, زاماناۋي سپورت جانە كونفەرەنتس-زالدار بار.
قاراعاندى وبلىسىنىڭ جارىق اۋىلىندا ۇلتتىق جوبا اياسىندا جاڭا مەكتەپ اشىلدى. مۇندا STEM-زەرتحانا, جاراتىلىستانۋ-ماتەماتيكا باعىتىنداعى زاماناۋي جابدىقتارمەن جانە ادىستەمەلىك ماتەريالدارمەن قامتاماسىز ەتىلگەن كابينەتتەر, روبوتوتەحنيكا جانە گرافيكالىق ديزاين سىنىپتارى بار. مەكتەپتە جاساندى ينتەللەكت تەحنولوگياسىمەن جابدىقتالعان 22 ينتەراكتيۆتى تاقتا ورناتىلعان.
وسىعان قوسا شىعىس قازاقستان وبلىسىنىڭ يگىلىك اۋىلىندا جەرگىلىكتى بيۋدجەت ەسەبىنەن سالىنعان جاڭا مەكتەپ پايدالانۋعا بەرىلدى.
ايتا كەتەيىك, 2025–2026 وقۋ جىلىندا ەلىمىزدە جالپى 232 ءبىلىم بەرۋ ۇيىمى سالىنادى.