ۇكىمەتتە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن كەڭەستە «بايتەرەك» حولدينگى جاڭا قۇرىلىمىنىڭ جوباسى قارالدى.
ترانسفورماتسيانىڭ نەگىزگى ماقساتى – حولدينگتى ينۆەستيتسيا تارتۋدىڭ باستى درايۆەرى مەن ەلىمىزدىڭ ىشكى جالپى ءونىمىن 2029 جىلعا قاراي ەكى ەسە ارتتىرۋعا باعىتتالعان پرواكتيۆتى ەكونوميكالىق ءوسۋ ساياساتىن ىسكە اسىراتىن نەگىزگى قۇرالعا اينالدىرۋ. ەلدىڭ جاڭا ەكونوميكالىق ءوسۋ ساياساتى ينۆەستيتسياعا باعىتتالعان ماقساتتى كوزقاراسىمەن – مەملەكەتتىڭ ناقتى قاجەتتىلىگىنە نەگىزدەلگەن «جوباعا تاپسىرىس» قاعيداتى ارقىلى ەرەكشەلەنەدى.
بۇل مودەلدى جۇزەگە اسىرۋدا باستى ءرول «بايتەرەك» حولدينگىنە جۇكتەلەدى. الداعى ءتورت جىلدا مەملەكەت جىل سايىن حولدينگتىڭ كاپيتالىن 1 ترلن تەڭگەگە ارتتىرىپ وتىرادى. ال «بايتەرەك» جىلىنا 8 ترلن تەڭگەگە دەيىن سىرتقى قارىز قاراجاتتارىن تارتىپ, باسىم جوبالاردى قارجىلاندىرادى. قازىرگى باسقارۋشى حولدينگ رەتىندەگى قۇرىلىم جاڭا ينۆەستيتسيالىق ميسسيانىڭ اۋقىمى مەن مىندەتتەرىنە ساي جاڭعىرادى.
نەگىزگى باسىمدىق – ينۆەستيتسياعا شوعىرلانۋ, سالالىق ماماندانۋ مەن نارىقتىق تالداۋدى كۇشەيتۋ. كەيىنگى 30 جىلداعى ەكونوميكانىڭ قۇرىلىمىن تالداۋ ناتيجەسى ەڭ جوعارى قوسىلعان قۇن مەتاللۋرگيا, ماشينا جاساۋ, حيميا, اگروونەركاسىپ پەن تاماق ونەركاسىبىندە قالىپتاساتىنىن كورسەتتى. بۇل سالالار ستراتەگيالىق باعىتتار بولىپ قالا بەرەدى. بۇعان قوسا, ساۋدا, قارجى مەن قۇرىلىس سالالارى دا جاڭا باسىمدىقتار قاتارىنا ەنەدى.
وسى سالالار نەگىزىندە ينۆەستيتسيالىق حولدينگتىڭ قۇرامىندا جەتى Investment Board (ينۆەستيتسيالىق قىزمەت) قۇرىلادى. ولار ناقتى سەكتوردىڭ ءوسۋ نۇكتەلەرىنە اينالىپ, جوعارى قوسىلعان قۇن قالىپتاستىراتىن جاڭا جوبالاردى ازىرلەۋ مەن ىسكە اسىرۋعا قاتىسادى. سونداي-اق بيزنەس تاراپىنان تۇسكەن جوبالىق ۇسىنىستاردى ەكونوميكالىق ءوسىم مىندەتتەرىنە سايكەستىگى تۇرعىسىنان ساراپتايدى.
«ينۆەستيتسيالىق جوبالاردىڭ بولاشاعى – ەكسپورتتا. ءبىز اۋىل شارۋاشىلىعىن قولداۋدىڭ ناقتى ناتيجەسىن كورىپ وتىرمىز: ونىمدىلىكتىڭ ارتۋى مەن ينۆەستيتسيالار ەسەبىنەن شەتەلدىك كومپانيالار قازاقستاندىق اوك-ءتىڭ الەۋەتىنە قىزىعۋشىلىق تانىتىپ, ءوز تەحنولوگيالارىن ەنگىزىپ جاتىر. «بايتەرەك» ەكسپورتقا باعىتتالعان كاسىپورىندار ەكوجۇيەسىن قالىپتاستىرىپ, ولاردىڭ ءونىم وتكىزۋ نارىعىن كەڭەيتۋىنە, قوسىلعان قۇن تىزبەگىن قۇرۋىنا ءارى سىرتقى نارىقتارعا شىعۋىنا ىقپال ەتەدى», دەدى حولدينگ باسقارماسىنىڭ توراعاسى رۋستام قاراعويشين.
ىشكى نارىقتى كەڭ تۇتىنۋ تاۋارلارىمەن قامتاماسىز ەتۋ ماقساتىندا, بۇگىندە كوبىسى يمپورتقا تاۋەلدى تاۋارلار بويىنشا «ينۆەستيتسياعا تاپسىرىس» باعدارلاماسى ىسكە قوسىلادى. بۇل باعدارلاما شەڭبەرىندە مەملەكەت ءوزى باسىم جوبالار مەن ولاردىڭ ورنالاساتىن وڭىرلەرىن ايقىنداپ, بيزنەستەن ولاردى جۇزەگە اسىرۋدى ۇسىنادى.
باعدارلاما اۋىل شارۋاشىلىعى سالاسىندا دايىندالعان, ەندى وسىنداي تاسىلدەر تۇرمىستىق حيميا, ازىق-ت ۇلىك پەن باسقا دا باعىتتار ءۇشىن ەنگىزىلمەك. بۇعان قوسا ديرەكتورلار كەڭەسىنىڭ قۇرامى كەڭەيتىلىپ, تاۋەلسىز مۇشەلەر قاتارىنا جەتەكشى حالىقارالىق سالالار مەن وڭىرلەردەن ينۆەستيتسيالىق كەڭەسشىلەر تارتىلادى. بۇل شەشىمدەردىڭ اشىقتىعىن, تاۋەكەلدەردى كەشەندى باعالاۋدى, جوبالاردىڭ تابىسىنا اسەر ەتەتىن بارلىق فاكتوردى ەسكەرۋدى قامتاماسىز ەتەدى.
حولدينگتى ترانسفورماتسيالاۋ جونىندەگى راسىمدەردىڭ بارلىعى جىل سوڭىنا دەيىن اياقتالىپ, كەلەسى جىلدىڭ باسىندا ەلىمىزدىڭ پرواكتيۆتى ەكونوميكالىق ءوسىم باعدارلاماسىن ىسكە اسىرۋ جۇمىسى باستالادى.