جارىستى Nomad ۇستەل تەننيسى اكادەمياسى تۋريزم جانە سپورت مينيسترلىگى مەن قازاقستاننىڭ ۇستەل تەننيسى فەدەراتسياسىنىڭ قولداۋىمەن ۇيىمداستىرىپ وتىر, دەپ جازادى Egemen.kz.
NOMAD اكادەمياسىنىڭ ديرەكتورى رۋسلان جەتۋباەۆ بولاشاقتا پرەزيدەنتتىك كۋبوكتى ءداستۇرلى تۋرنيرگە اينالدىرۋ كوزدەلىپ وتىرعانىن ايتتى:
«بۇل تۋرنير قازاقستاننىڭ برەندىنە اينالىپ, جىل سايىن جاس تالانتتار مەن تانىمال شەبەرلەر باس قوساتىن الاڭ بولعانىن قالايمىز. بۇل جاي عانا جارىس ەمەس – ۇستەل تەننيسىن دامىتۋ مەن حالىقارالىق سپورتتىق ىنتىماقتاستىقتى نىعايتۋعا جاسالعان قادام», دەدى ول.
بيىلعى دوداعا 14 ەلدەن 300-دەن استام سپورتشى قاتىسادى. ولاردىڭ قاتارىندا قازاقستاننىڭ استانا, الماتى, شىمكەنت, قاراعاندى قالالارىنان كەلگەن سپورتشىلارمەن بىرگە وڭتۇستىك كورەيا, قىتاي, ۆەنگريا, مىسىر, مالايزيا, يران, ساۋد ارابياسى جانە وزگە مەملەكەتتەردىڭ تەننيسشىلەرى بار. ءتۋرنيردىڭ جۇلدە قورى – 115 مىڭ اقش دوللارى.
ايتۋلى ءىس-شاراعا ITTF الەمدىك رەيتينگىنىڭ توپ-100 سپورتشىلارىنىڭ قاتىسۋى ونىڭ حالىقارالىق مارتەبەسىن ايقىنداي تۇسەدى.
كورەيالىق سپورت اڭىزى Joo Sae-hyuk ۇيىمداستىرۋشىلارعا العىسىن ءبىلدىرىپ, قازاقستاندا ۇستەل تەننيسىن دامىتۋعا نيەتتى ەكەنىن جەتكىزدى:
«مۇندا بولىپ, وسىنداي اۋقىمدى شارانىڭ ءبىر بولىگى بولعانىما قۋانىشتىمىن. 2027 جىلى قازاقستان جاڭا, جەڭىستى دەڭگەيگە شىعادى دەپ سەنەمىن. مەن بار كۇشىمدى سالىپ كومەكتەسەمىن – كەلىپ تۇرامىن, قاتىسامىن جانە ەلدەرىڭىزدە ۇستەل تەننيسىنىڭ دامۋىن قولدايمىن».
كۋبوكتىڭ باستى تارتىستارىنىڭ ءبىرى – الەمدىك جۇلدىزداردىڭ قاتىسۋىمەن وتەتىن شوۋ-ماتچ بولماق. وعان قىتايدىڭ ايگىلى تەننيسشىلەرى سيۋي سين (الەمنىڭ ەكس-ءبىرىنشى راكەتكاسى), فان بو (الەم چەمپيوناتىنىڭ كۇمىس جۇلدەگەرى), اۆستريانىڭ 2003 جىلعى الەم چەمپيونى ۆەرنەر شلاگەر, سونداي-اق كورەيانىڭ ايگىلى ويىنشىسى دجۋ سە حۋك قاتىسادى.
تۋريزم جانە سپورت ۆيتسە-ءمينيسترى سەرىك مارات ۇلى جاراسباەۆ ءتۋرنيردىڭ ەل سپورتى ءۇشىن ماڭىزدىلىعىن اتاپ ءوتتى:
«2027 جىلى قازاقستان ۇستەل تەننيسىنەن الەم چەمپيوناتىن قابىلدايدى. سوندىقتان مۇنداي دەڭگەيدەگى جارىستى وتكىزۋ – ۇلكەن مارتەبە. بۇل ءىس-شارا الەمدىك دوداعا دايىندىق رەتىندە ۇيىمداستىرىلىپ وتىر. جارىسقا شەتەلدىك مىقتى سپورتشىلار كەلەدى دەپ جوسپارلانعان. سولاردىڭ ويىنىن تاماشالاعان جاس جەتكىنشەكتەرىمىز مول تاجىريبە جينايدى. وسى تۋرنير ارقىلى ەل ۇزدىكتەرىن جانە ۇستەل تەننيسىنىڭ رەزەرۆىن بايقاۋعا بولادى», دەدى ول.
پرەزيدەنتتىك كۋبوك – ەلىمىزدىڭ سپورتتاعى بەدەلىن ارتتىرىپ, ەلوردامىزدى حالىقارالىق ۇستەل تەننيسى كارتاسىنا ەنگىزەتىن ماڭىزدى قادام بولماق.