قازاقستان الداعى ۋاقىتتا دا تەڭگەرىمدى ءارى سىندارلى سىرتقى ساياسات جۇرگىزەدى - پرەزيدەنت

ء«بارىمىز ءبىر ەل بولىپ قولعا العان رەفورمالاردىڭ تۇپكى ماقساتى – قازاقستاندى جاڭا جاعدايعا بەيىمدەۋ, سول ارقىلى ەلىمىزدىڭ ەگەمەندىگىن نىعايتىپ, باسەكەگە قابىلەتىن ارتتىرۋ. مەملەكەت باسشىسى رەتىندە مەن جەرىمىزدىڭ تۇتاستىعىن, ەلىمىزدىڭ دەربەستىگىن جانە ەكونوميكالىق دامۋىن قامتاماسىز ەتۋىم كەرەك. بۇل – مەنىڭ ازاماتتىق بورىشىم», دەدى پرەزيدەنت.

قاسىم-جومارت توقاەۆتىڭ ايتۋىنشا, قازىر الەم تۇبەگەيلى جاڭا تاريحي كەزەڭگە قادام باستى. ءبىر جاعىنان, قاقتىعىستار مەن سوعىستار ازايماي تۇر, باسقا جاعىنان, جوعارى تەحنولوگيالار, جاساندى ينتەللەكت تەز دامىپ كەلەدى.

«وسىنداي كۇردەلى جاعدايدا ەلىمىز دامۋدىڭ داڭعىل جولىنا ءتۇستى. بارشا ەلمەن دوستىق قاتىناس ورناتىپ, مەملەكەتىمىزدى سەنىمدى سەرىكتەس رەتىندە تانىتتىق. سونىڭ ارقاسىندا ەنەرگەتيكا, كولىك, لوگيستيكا, اقپاراتتىق تەحنولوگيا, اۋىل شارۋاشىلىعى جانە باسقا دا سالالارعا قوماقتى ينۆەستيتسيا تارتىپ جاتىرمىز. قازىرگى الماعايىپ زاماندا ساليقالى ديپلوماتيا داستۇرىنە نەگىزدەلگەن سىرتقى ساياساتتى ۇستانۋ ايرىقشا ماڭىزدى. ءبىز مەملەكەتتەردىڭ ءبارى ءوزارا ءتىل تابىسىپ, ورتاق مامىلەگە كەلە بىلگەنى ءجون دەپ سانايمىز. ءوزارا سەنىم مەن قۇرمەتتى نىعايتىپ, ارىپتەستىك قارىم-قاتىناستى دامىتۋ قاجەت دەپ ەسەپتەيمىز», دەدى پرەزيدەنت.

مەملەكەت باسشىسى جاقىندا الماتىدا بىرىككەن ۇلتتار ۇيىمىنىڭ ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى وڭىرلىك ورتالىعى اشىلعانىن اتاپ ءوتتى. سونداي-اق مۇنى زور جەتىستىك دەپ ايتۋعا بولاتىنىن مالىمدەدى.

«مەن بىرىككەن ۇلتتار ۇيىمى باس اسسامبلەياسىنىڭ مەرەيتويلىق سەسسياسىندا نەگىزگى حالىقارالىق ماسەلەلەرگە باسا نازار اۋداردىم, بىرقاتار ۇسىنىس ايتتىم. الەمدە بارلىق ەلدىڭ مۇددەسى ەسكەرىلەتىن ءادىل حالىقارالىق قاتىناستار جۇيەسىن ورناتۋ كەرەك. قازاقستان دۇنيە ءجۇزى قاۋىمداستىعىنىڭ جاۋاپتى ءارى ىقپالدى مۇشەسى رەتىندە الداعى ۋاقىتتا دا تەڭگەرىمدى ءارى سىندارلى سىرتقى ساياسات جۇرگىزەدى», دەدى قاسىم-جومارت توقاەۆ.