بالاعا قاتىستى زورلىق-زومبىلىقتى, قاتىگەز قارىم-قاتىناستى, بۋللينگتى نەمەسە باسقا دا قۇقىقتارىنىڭ بۇزىلعانىن بايقاعاندا نە ىستەۋ كەرەك؟ بۇل سۇراققا وقۋ-اعارتۋ مينيسترلىگى جانىنداعى بالا قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا جاۋاپ بەردى, دەپ جازادى Egemen.kz.
ونىڭ ايتۋىنشا, ارقايسىمىز بالانى قورعاۋدا شەشۋشى ءرول اتقارا الامىز. باستىسى بالاعا قاتىستى كەز كەلگەن كەلەڭسىز جاعدايدا بەيجاي قالماعان ءجون. ويتكەنى ادامداردىڭ قىراعىلىعى مەن بەلسەندى ۇستانىمى قايعىلى جاعدايدىڭ الدىن الىپ, بالانىڭ دەنساۋلىعىن, ءتىپتى ءومىرىن ساقتاپ قالۋى مۇمكىن.
«قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 127-1-بابىنا سايكەس, كامەلەتكە تولماعاندارعا قاتىستى نەمەسە ولاردىڭ تاراپىنان جاسالعان قۇقىقبۇزۋشىلىقتار تۋرالى ءبىلىم بەرۋ, دەنساۋلىق ساقتاۋ, حالىقتى الەۋمەتتىك قورعاۋ ۇيىمدارى قىزمەتكەرلەرىنىڭ حابارلاماۋى جاۋاپكەرشىلىككە اكەلەدى. 2025 جىلدىڭ العاشقى 9 ايىندا وسى باپ بويىنشا 268 ادام اكىمشىلىك جاۋاپكەرشىلىككە تارتىلدى. 2024 جىلى 348 ادام جاۋاپقا تارتىلعان ەدى. بۇل سانداردىڭ ارقايسىسى – قورعاۋسىز قالعان ءبىر بالانىڭ تاعدىرى. بۇل بالالارعا سەنۋدىڭ, الاڭداتارلىق بەلگىلەردى ەلەۋسىز قالدىرماۋدىڭ, كومەكتى كەشىكتىرمەۋدىڭ قانشالىقتى ماڭىزدى ەكەنىن ەسكە سالادى. كەيدە ءبىر قوڭىراۋ بالانىڭ ءومىرىن ساقتاپ, ونى قاۋىپتەن اراشالاپ قالۋى مۇمكىن. حابارلاۋ – جاي عانا ءفورمالدى ارەكەت ەمەس, ازاماتتىق جاۋاپكەرشىلىك پەن ادامگەرشىلىكتىڭ كورىنىسى. «111» بايلانىس ورتالىعى تاۋلىك بويى, ءانونيمدى ءارى سەنىمدى تۇردە جۇمىس ىستەيدى. ەڭ باستىسى – ءۇنسىز قالماۋ جانە نەمقۇرايلى بولماۋ», دەدى كوميتەت باسشىسى.