قاراعاندى وبلىسىنىڭ ونەركاسىپ وزەگىنە اينالعان ساران يندۋستريالىق ايماعىندا زاماناۋي قۇبىر شىعاراتىن جاڭا زاۋىت ىسكە قوسىلادى. جوبا يمپورتقا تاۋەلدىلىكتى ازايتىپ, ىشكى-سىرتقى نارىقتاعى باسەكەگە قابىلەتتىلىكتى كۇشەيتەدى, 500 جاڭا جۇمىس ورنى اشىلادى, دەپ حابارلايدى Egemen.kz.
ساران يندۋستريالىق ايماعى ماشينا جاساۋ مەن وڭدەۋ ونەركاسىبىنىڭ ءوسۋ نۇكتەسىنە اينالدى: بۇگىندە مۇندا الەمدىك ستاندارتتارعا ساي ءونىم شىعاراتىن بىرنەشە كاسىپورىن جۇمىس ىستەيدى, مىڭداعان جۇمىس ورنى قۇرىلدى. سول جوبالاردىڭ ىشىندە قازاقستاندا بالاماسى جوق «تەمپو-قازاقستان» قۇبىر زاۋىتىنىڭ قۇرىلىسى اياقتالۋعا جاقىن. قازىر وندىرىستىك الاڭدا ىسكە قوسۋ-رەتتەۋ جۇمىستارىنا دايىندىق ءجۇرىپ جاتىر. كاسىپورىننىڭ جوبالىق قۋاتى – جىلىنا 300 مىڭ تونناعا دەيىن. زاۋىت ديامەترى 57-630 مم ارالىعىنداعى ەلەكتردانەكەرلەنگەن جانە ءپروفيلدى بولات قۇبىرلاردى شىعارادى. ءونىم مۇناي-گاز, قۇرىلىس يندۋسترياسى جانە تكش سالالارىندا قولدانىلادى. كوممۋنالدىق سەكتور ءۇشىن جىلۋ جوعالتۋدى ازايتاتىن الدىن الا وقشاۋلانعان قۇبىرلار ءوندىرىسى جولعا قويىلادى.
زاۋىت ىسكە قوسىلعانعا دەيىن-اق كادر ىرىكتەۋ ءجۇرىپ جاتىر: ينجەنەرلەر, وپەراتورلار, لوگيستيكا جانە ساتۋ ماماندارى قاجەت. ۇمىتكەرلەر تۇيىندەمەسىن hr@tempo.kz پوشتاسىنا جولداي الادى. كومپانيا قاراعاندى وبلىسىنىڭ ءبىلىم باسقارماسىمەن مەموراندۋم جاساسىپ, ستۋدەنتتەرگە ناقتى ماماندىقتار بويىنشا وقىتۋ مەن وندىرىستىك تاجىريبە ۇيىمداستىرادى. تۇلەكتەرگە جۇمىسقا ورنالاسۋدا باسىمدىق بەرىلەدى.
قاراعاندى وبلىسىساران قالاسى