بيىل شىعىس قازاقستان وبلىسىنداعى ءشۇلبى سۋ قويماسىنان ەرتىس وزەنى ارقىلى ەكولوگيالىق ماقساتتا سۋ جىبەرۋ شارالارى شەڭبەرىندە شامامەن 6,32 ملرد تەكشە مەتر سۋ جىبەرىلىپ وتىر. سالا ءمينيسترى نۇرجان نۇرجىگىتوۆ ەرتىس باسسەيندىك ينسپەكتسياسىنىڭ بيىلعى توعىز ايىندا اتقارىلعان جۇمىسى تۋرالى ەسەبىن تىڭدادى, دەپ جازادى Egemen.kz.
اتالعان ينسپەكتسيا ماماندارى سۋ زاڭناماسىنىڭ ساقتالۋىن باقىلاۋ تۇرعىسىندا 58 تەكسەرۋ جۇرگىزىپ, 25 ملن تەڭگە سوماسىندا 52 اكىمشىلىك ايىپپۇل سالعان.
سۋدىڭ ەكولوگيالىق ماقساتتا جىبەرىلۋى ناتيجەسىندە پاۆلودار وبلىسىندا شامامەن 305 مىڭ گەكتار جەر سۋارىلعان. بۇل 2024 جىلمەن سالىستىرعاندا 27,5 مىڭ گەكتارعا ارتىق.
2025-2027 جىلدارعا ارنالعان وزەندەر مەن كولدەردى ساناتسيالاۋ جونىندەگى جول كارتاسى اياسىندا اباي وبلىسىندا 15 شاقىرىمدىق كىندىكتى, كوكپەكتى وزەندەرى ۋچاسكەلەرىن تازارتۋ جۇمىستارى اياقتالعان.
ەرتىس باسسەيندىك ينسپەكتسياسىنىڭ باسشىسى مەدەت جادىگەر ۇلىنىڭ ايتۋىنشا ەكولوگيالىق ماقساتتا سۋ جىبەرۋ جۇمىستارى جىل سايىن ەكوجۇيەلەر مەن بيولوگيالىق الۋان تۇرلىلىكتى ساقتاۋ, سونداي-اق سۋ نىساندارىن لاستانۋدان جانە تاۋسىلۋدان قورعاۋ ماقساتىندا جۇزەگە اسىرىلادى.
«بۇدان بولەك, سۋ جىبەرۋ ارقىلى شالعىندىقتار مەن تابيعي جايىلىمدار سۋارىلادى. بۇل مال شارۋاشىلىعىنىڭ جەم-ءشوپ قورىن قامتاماسىز ەتىپ, اۋىل شارۋاشىلىعىنىڭ دامۋىنا ىقپال ەتەدى», دەدى م.جادىگەر ۇلى.