2025-2026 وقۋ جىلىندا قابىلدانعان 189 مىڭ تالاپكەردىڭ 145 مىڭى – مەملەكەتتىك تاپسىرىس بويىنشا ەكەن. 9-سىنىپ تۇلەكتەرىنىڭ بارلىعى ماشينا جاساۋ, IT, ەنەرگەتيكا, قۇرىلىس سياقتى سۇرانىسقا يە ماماندىقتار بويىنشا تەگىن وقۋمەن قامتىلعان, دەپ حابارلايدى Egemen.kz.
ءدۋالدى ءبىلىم بەرۋ جۇيەسى بويىنشا 108 مىڭ ستۋدەنت وقيدى, جىل سوڭىنا دەيىن بۇل كورسەتكىشتى 135 مىڭعا جەتكىزۋ جوسپارلانىپ وتىر.
ۇكىمەتتىڭ ءباسپاسوز قىزمەتىنىڭ مالىمدەۋىنشە قىتاي, گەرمانيا, فرانتسيا, تۇركيا, وڭتۇستىك كورەيا, فينليانديا, كانادا, سينگاپۋر, يتاليا, ۇلىبريتانيا, شۆەيتساريا كوللەدجدەرىمەن اكادەميالىق موبيلدىلىك, حالىقارالىق سالالىق اككرەديتاتسيا جانە ستراتەگيالىق ارىپتەستىكتىڭ وزگە دە تۇرلەرى بويىنشا جاسالعان 50-دەن استام حالىقارالىق كەلىسىم ءبىلىم ساپاسىن ارتتىرۋعا جانە تۇلەكتەردىڭ جۇمىسقا ورنالاسۋىن قامتاماسىز ەتۋگە ىقپال ەتەدى.
بۇل جۇمىستاردىڭ بارلىعى ايتارلىقتاي ناتيجەلەر بەرىپ وتىر. دانيادا وتكەن Euroskills Herning 2025 حالىقارالىق كاسىبي شەبەرلىك چەمپيوناتىندا قازاقستاننىڭ ۇلتتىق قۇراماسى ۆەب-تەحنولوگيا, مەحاترونيكا, گرافيكالىق ديزاين, جەلىلىك جانە جۇيەلىك اكىمشىلەندىرۋ, ينجەنەرلىك CAD ديزاين سياقتى 5 باعىت بويىنشا 7 ۇزدىك شەبەرلىك مەدالونىن جەڭىپ الىپ, «ۇلت ۇزدىگى» اتالىمىندا ماراپاتتالدى.
جۇمىسشى مامانداردى قولداۋ ماقساتىندا جەڭىلدەتىلگەن شارتتارىمەن «ناۋرىز جۇمىسكەر» يپوتەكالىق باعدارلاماسى ىسكە قوسىلدى. 22 قىركۇيەكتەگى جاعداي بويىنشا باعدارلاما اياسىندا جالپى سوماسى 46,5 ملرد تەڭگە بولاتىن 1,9 مىڭنان استام نەسيە بەرىلدى.