ۇلىتاۋ وبلىسى, ۇلىتاۋ اۋدانىندا جول ينفراقۇرىلىمىن جاقسارتۋعا باعىتتالعان جۇمىس ءجۇرىپ جاتىر. يگى ءىس اۋداننىڭ تۋريزم الەۋەتىن ارتتىرۋ مەن اۋىل تۇرعىندارىنىڭ قولايلى ءومىر ءسۇرۋى ءۇشىن قولعا الىنعان كەشەندى شارانىڭ ءبىرى, دەپ جازادى Egemen.kz.
سارلىق اۋىلىنا كىرەر تۇستاعى 9,6 شاقىرىمدىق اۆتوكولىك جولىنا ورتاشا جوندەۋ جۇمىسى جۇرگىزىلدى. اتالعان جوبا وبلىستىق جانە اۋداندىق بيۋدجەت ەسەبىنەن قارجىلاندىرىلىپ, بەلگىلەنگەن جۇمىس كەستەسىنە سايكەس جۇزەگە استى. جولدى تەگىستەۋ جۇمىسى جۇرگىزىلىپ, اسفالت جابىندىسى توسەلدى.
وسى جول – التىن شوقى, حان ورداسى سىندى كيەلى تاريحي ورىندارعا اپاراتىن نەگىزگى باعىتتىڭ ءبىر بولىگى. جولدىڭ جاڭارتىلۋى ءتۋريزمدى دامىتۋعا, ءوڭىردىڭ تاريحي-مادەني الەۋەتىن كەڭىنەن تانىتۋعا جانە جول قوزعالىسىنىڭ قاۋىپسىزدىگىن قامتاماسىز ەتۋگە مۇمكىندىك بەرەدى.
بۇدان بولەك, اۋدان ورتالىعىنا ىرگەلەس ورنالاسقان ايىرتاۋ ەلدى مەكەنىنە اپاراتىن 5,5 شاقىرىمدىق كىرەبەرىس جولدا دا ورتاشا جوندەۋ جۇمىسى جۇرگىزىلىپ جاتىر. قۇرىلىس بارىسىندا ەسكى جول جابىندىسى سۋىق فرەزەرلەۋ ادىسىمەن الىنىپ تاستالىپ, جاڭادان سۋ وتكىزۋ قۇبىرلارى ورناتىلدى. جول ۇستىنە قيىرشىق تاس توسەلىپ, تەگىستەۋ جۇمىستارى اياقتالدى. قازىرگى تاڭدا 700 مەتر جول ۋچاسكەسىنە اسفالت توسەۋ جۇمىسى قارقىن الدى. تەگىستەلگەن جولعا تولىق اسفالت جابىندىسىن توسەۋ جۇمىستارى كەستەگە سايكەس 2026 جىلى اياقتالادى.
سونىمەن قاتار, ۇلىتاۋ اۋىلىنداعى «رامىزدەر الاڭىنا» دەيىنگى 0,25 شاقىرىمدىق كوتەرمە جول جاڭادان سالىندى. جول جابىنى جارتاس توپىراعىمەن نىعىزدالىپ, سۋ تاسقىنىنىڭ الدىن الۋ ءۇشىن ۇزىندىعى 11 مەتر بولاتىن ەكى نۇكتەلى سۋ وتكىزگىش قۇبىرلار ورناتىلدى.
اتالعان جوبا اياسىندا الاڭ ماڭىنداعى 350 شارشى مەتردى قامتيتىن اۆتوتۇراققا اسفالت توسەلدى.
ۇلىتاۋ وبلىسى