قورعانىس ءمينيسترى داۋرەن قوسانوۆ پەن «وتباسى بانك» باسقارما توراعاسى ءلاززات يبراگيموۆا اسكەري قىزمەتكەرلەردى تۇرعىن ۇيمەن قامتاماسىز ەتۋ جانە «اسكەري باسپانا» باعدارلاماسىن قايتا جانداندىرۋ جولدارىن تالقىلادى. كەزدەسۋ بارىسىندا اسكەري يپوتەكانىڭ تيىمدىلىگىن ارتتىرۋ مەن تۇرعىن ۇيگە قولجەتىمدىلىكتى جەڭىلدەتۋ ماسەلەلەرى كوتەرىلدى, دەپ حابارلايدى Egemen.kz.
قورعانىس مينيسترلىگىندە وتكەن كەزدەسۋدە داۋرەن قوسانوۆ اسكەري قىزمەتشىلەردىڭ الەۋمەتتىك جاعدايى مينيسترلىكتىڭ باستى باسىمدىقتارىنىڭ ءبىرى ەكەنىن اتاپ ءوتتى.
كەزدەسۋدىڭ نەگىزگى تاقىرىپتارىنىڭ ءبىرى – «اسكەري باسپانا» باعدارلاماسىن قايتا ىسكە قوسۋ بولدى. بۇل باستاما اسكەري قىزمەتشىلەرگە جەڭىلدەتىلگەن شارتتارمەن باسپانا الۋعا مۇمكىندىك بەرىپ, تۇرعىن ءۇي تاپشىلىعىن ازايتۋعا باعىتتالادى.
«اسكەري قىزمەتشىلەر ءۇشىن جەڭىلدەتىلگەن يپوتەكالىق نەسيەلەرگە ناقتى قولجەتىمدىلىك ماڭىزدى. قازىرگى ۋاقىتتا ونداي مۇمكىندىك جوق, ال تۇرعىن ءۇي باعاسىنىڭ وسۋىنەن باستاپقى جارنا جيناۋ ءىس جۇزىندە مۇمكىن ەمەس», دەپ اتاپ ءوتتى قورعانىس ءمينيسترى.
سونىمەن قاتار مينيستر «وتباسى بانك» ءموبيلدى قوسىمشاسىنىڭ جۇمىسىن تۇراقتاندىرۋداعى جەدەل ارەكەتى ءۇشىن ءلاززات يبراگيموۆاعا العىسىن ءبىلدىردى. سونداي-اق «باسپانا.كز» پورتالىنداعى جاڭا تالاپتاردىڭ كەيبىر اسكەري قىزمەتشىلەر ءۇشىن قيىندىق تۋعىزاتىنىن اتاپ ءوتتى.
داۋرەن قوسانوۆ بۇرىنعىداي ەكىنشى دەڭگەيلى تۇرعىن ءۇي نارىعىنان باسپانا الۋ مۇمكىندىگىن قالپىنا كەلتىرۋدى دە ۇسىندى. ونىڭ پىكىرىنشە, اسكەري قىزمەتكەرلەر دايىن, ينفراقۇرىلىمى قالىپتاسقان جانە قىزمەت ورنىنا جاقىن پاتەرلەردى كوبىرەك قالايدى.
ءمينيستردىڭ ايتۋىنشا, 15 مىڭنان استام اسكەري قىزمەتشى وتباسى تۇرعىن ءۇي تولەمدەرى جۇيەسى مەن يپوتەكالىق باعدارلامالار, سونىڭ ىشىندە «اسكەري باسپانا» ارقىلى تۇرعىن ءۇي جاعدايىن جاقسارتقان.
كەزدەسۋ سوڭىندا قورعانىس مينيسترلىگى مەن «وتباسى بانك» اسكەري قىزمەتشىلەردىڭ تۇرعىن ءۇي ماسەلەسىن كەشەندى تۇردە شەشۋ ءۇشىن بىرلەسكەن ءىس-قيمىل جوسپارىن دايىنداۋعا ۋاعدالاستى.