تسيفرلىق شتاب مەملەكەتتىك سەرۆيستەردى بىرىڭعاي پلاتفورماعا بىرىكتىرۋدى تاپسىردى

اتاپ ايتقاندا, Astana Hub حالىقارالىق IT-ستارتاپتار تەحنوپاركى وڭىرلىك يننوۆاتسيالىق جانە كاسىپكەرلىك ورتالىق رەتىندە نىعايتىلاتىن بولادى. قارجى, ۇلتتىق ەكونوميكا, جاساندى ينتەللەكت جانە تسيفرلىق دامۋ مينيسترلىكتەرىنە 2025 جىلعى 10 قاراشاعا دەيىن اتالعان تەحنوپارك قىزمەتىنىڭ باسىم باعىتتارىن كەڭەيتۋ تاپسىرىلدى. جاڭا تىزىمگە مۋلتيمەديا, ويىن ديزاينى, باعدارلامالىق قامتاماسىز ەتۋدى تۇرلەندىرۋ جانە كيبەرسپورت سالالارى ەنگىزىلەدى. سونداي-اق شەتەلدىك كومپانيالارعا ارنالعان بيزنەس-پروتسەستەر اۋتسورسينگى مەن اعىلشىن ءتىلىن وقىتۋ قىزمەتتەرى دە قوسىلادى. بۇدان باسقا, اتالعان تىزبە قر رەزيدەنتى ەمەستەرگە باعدارلامالىق قامتۋدى پايدالانا وتىرىپ, بيزنەس-پروتسەستەر اۋتسورسينگى, اعىلشىن ءتىلىن وقىتۋ سياقتى قىزمەتتەرمەن تولىقتىرىلدى. قىزمەتتەر اياسىن كەڭەيتۋ Astana Hub-تىڭ جاھاندىق تەحنولوگيالىق قوعامداستىقتى تارتۋ ورتالىعى رەتىندەگى ۇستانىمىن كۇشەيتە تۇسەدى.

سونىمەن قاتار, بارلىق مەملەكەتتىك ءموبيلدى سەرۆيستەر SuperApp قاعيداتى بويىنشا eGov جانە Aitu پلاتفورمالارىنا بىرىكتىرىلەدى. بۇل قادام ءار ۆەدومستۆونىڭ جەكە قوسىمشالارىن قىسقارتىپ, ازاماتتار ءۇشىن ىڭعايلى ءارى قاۋىپسىز تسيفرلىق كەڭىستىك قالىپتاستىرۋعا مۇمكىندىك بەرەدى.

ال Alem.cloud ۇلتتىق سۋپەركومپيۋتەرلىك ورتالىعىندا ەسەپتەۋ رەسۋرستارىن ءبولۋ ەرەجەلەرى بەكىتىلەدى. بۇل ەرەجە Astana Hub ستارتاپتارى, عىلىمي ۇيىمدار, ۋنيۆەرسيتەتتەر جانە جەكە سەكتور ءۇشىن جوعارى ءونىمدى ەسەپتەۋ قۋاتتارىن ءادىل بولۋگە جاعداي جاسايدى.

Alem.cloud ينفراقۇرىلىمى جاساندى ينتەللەكت تەحنولوگيالارىن دامىتۋعا باعىتتالادى جانە ءبىلىم بەرۋ, مەديتسينا, اۋىل شارۋاشىلىعى, ەنەرگەتيكا, گەولوگيالىق بارلاۋ, كولىك, لوگيستيكا جانە ونەركاسىپ سياقتى ماڭىزدى سالالاردا قولدانىلادى.