ەلىمىزدە شاعىن جانە ورتا بيزنەستى قولداۋدىڭ باستى تەتىكتەرىنىڭ ءبىرى – «دامۋ» قورى. «بايتەرەك» حولدينگىنىڭ ەنشىلەس ۇيىمى كاسىپكەرلەرگە جەڭىلدەتىلگەن نەسيە, كەپىلدىك جانە سۋبسيديا تۇرىندە قولداۋ كورسەتىپ كەلەدى. بيىل قور قىزمەتى جاڭا فورماتقا كوشكەن. بۇل – كاسىپكەرلەرگە قارجى الۋ پروتسەسىن جەڭىلدەتىپ, قولداۋدىڭ تيىمدىلىگىن ارتتىرۋعا باعىتتالعان كورىنەدى, دەپ حابارلايدى Egemen.kz.
«دامۋ» قورىنىڭ بەرگەن مالىمەتىنە سۇيەنسەك, ماۋسىم ايىندا ىسكە قوسىلعان «ورلەۋ» باعدارلاماسى بيزنەستى ناقتى قولداۋدىڭ جاڭا مۇمكىندىگىنە اينالدى. باعدارلاما شەڭبەرىندە ينۆەستيتسيالىق جوبالار مەن اينالىم قاراجاتىن تولىقتىرۋعا 12,6 پايىز مولشەرلەمەسىمەن نەسيە بەرىلەدى. قارجىلاندىرۋ كولەمى دە قوماقتى: ينۆەستيتسياعا – 7 ملرد تەڭگەگە دەيىن, اينالىم قاراجاتىنا – 3,5 ملرد تەڭگەگە دەيىن, مەرزىمى 10 جىلعا دەيىن. اباي وبلىسىندا وسى باعدارلاما بويىنشا 47 جوباعا 7,8 ملرد تەڭگە نەسيە بەرىلگەن. بۇل تۋرالى سەمەي قالاسىندا بولعان ءباسپاسوز تۋرىندا ايتىلدى.
«بيىل مەملەكەت باسشىسىنىڭ تاپسىرماسىنا سايكەس جوبالار قۇنىنا قاراي ەكى كەپىلدىك قورى ىسكە قوسىلدى. ەندى كاسىپكەردە كەپىل مۇلكى جەتىسپەگەن جاعدايدا, «دامۋ» قورى ەكى جۇمىس كۇنى ىشىندە 7 ملرد تەڭگەگە دەيىنگى نەسيەگە كەپىلدىك بەرە الادى. بۇل مۇمكىندىك اۋىل شارۋاشىلىعى مەن وڭدەۋ ونەركاسىبى سياقتى سالالارداعى جۇزدەگەن جوبانىڭ جۇزەگە اسۋىنا جول اشتى», — دەدى «دامۋ» قورى اباي وبلىسىنداعى فيليالنىڭ ديرەكتورى مۇرات قايىمباەۆ.
ونىڭ ايتۋىنشا, قور قىزمەتى ءوڭىر ەكونوميكاسىن ارتاراپتاندىرۋعا دا سەرپىن بەرىپ وتىر. وڭدەۋ ونەركاسىبى, اگروونەركاسىپ, مەديتسينا جانە الەۋمەتتىك سالاداعى جوبالارعا ەرەكشە ءمان بەرىلۋدە. بۇل باعىتتار پرەزيدەنتتىڭ «ينۆەستيتسياعا ناقتى سۇرانىس قالىپتاستىرۋ» جونىندەگى تاپسىرماسىنا ساي كەلەدى.
– 1 قىركۇيەكتەگى مالىمەت بويىنشا اباي وبلىسىندا «دامۋ» قورىنىڭ قولداۋىمەن 39,8 ملرد تەڭگەگە 426 جوبا جۇزەگە اسىرىلىپ جاتىر. قولداۋدىڭ ناتيجەسىندە كوپتەگەن كاسىپكەرلەر ءوندىرىسىن ۇلعايتىپ, ميكروبيزنەس دەڭگەيىنەن شاعىن جانە ورتا بيزنەسكە ءوتىپ وتىر. بۇل ءوز كەزەگىندە ءوڭىردىڭ ەكونوميكالىق بەلسەندىلىگىن ارتتىرىپ, جاڭا جۇمىس ورىندارىنىڭ اشىلۋىنا ىقپال ەتتى, – دەيدى «دامۋ» قورى اباي وبلىسىنداعى فيليالنىڭ ديرەكتورى مۇرات قايىمباەۆ.
سەمەي ورمانىنىڭ قويناۋىنداعى «Eastwood» دەمالىس بازاسى كاسىپكەر فارحات بەكمەتوۆتىڭ تاباندىلىعىنىڭ ناتيجەسىندە وركەندەپ كەلەدى. ول نىساندى كەڭەيتۋ ءۇشىن «ورلەۋ» باعدارلاماسى ارقىلى جەڭىل نەسيە العان. «ماكاي» جشس 2002 جىلدان بەرى كۇنباعىس مايى مەن سويا ونىمدەرىن ءوندىرىپ, ءونىمىن شەتەلگە ەكسپورتتاپ وتىر. ال «اگروليدەر KAZ» كومپانياسى زىعىر مەن نوقات تۇقىمدارىن ەكسپورتقا شىعارىپ, ايىنا 2 مىڭ توننا ءونىم وندىرەدى. جوبا تولىق قۋاتقا شىققاندا 20 جاڭا جۇمىس ورنى اشىلادى.
اباي وبلىسىنداعى بۇل جوبالار – مەملەكەتتىك قولداۋدىڭ ناقتى ناتيجەسىن ايعاقتايدى. كاسىپكەرلىكتى دامىتۋدىڭ جاڭا تەتىكتەرى ءوڭىر ەكونوميكاسىن ءارتاراپتاندىرىپ, جاڭا وندىرىستەر مەن جۇمىس ورىندارىنىڭ كوبەيۋىنە جول اشىپ وتىر.
اباي وبلىسى