دۇنيەجۇزىلىك بانك دەرەكتەرىنە سۇيەنسەك, بۇگىندە دۇنيەجۇزىندە شامامەن 700 ميلليونعا جۋىق ادام, ياعني جەر شارىنداعى حالىقتىڭ 8,5 پايىزى, كۇنىنە نەبارى 2,15 دوللاردان از قاراجاتقا كۇنەلتەدى, دەپ حابارلايدى Egemen.kz Anadolu-عا سىلتەمە جاساپ.
الەم بويىنشا تاعى شامامەن 3,5 ميلليارد ادام كۇنىنە 6,85 دوللاردان از تابىس تابادى ەكەن. بۇل كورسەتكىش كوپتەگەن ورتا تابىستى ەلدەر ءۇشىن دە كەدەيلىك شەگىنەن تومەن سانالادى.
بىرىككەن ۇلتتار ۇيىمىنىڭ باس اسسامبلەياسى 17 قازاندى — كەدەيلىكپەن كۇرەسۋدىڭ دۇنيەجۇزىلىك كۇنى دەپ جاريالاعان. جىل سايىن بۇل كۇنى الەم ەلدەرىندە كەدەيلىكتىڭ سالدارى مەن ونىڭ الدىن الۋ جولدارىنا قوعام نازارىن اۋدارتۋعا باعىتتالعان ءىس-شارالار وتەدى.
بۇۇ ەسەبىنە سايكەس, COVID-19 پاندەمياسىنان كەيىن كەدەيلىك دەڭگەيى قايتا ءوسىپ, 2019 جىلدان بەرى ايتارلىقتاي تومەندەمەگەن. قازىر جەر شارىنداعى حالىقتىڭ شامامەن جارتىسى ءوز ەلدەرىندە كەدەيلىك شەگىنەن تومەن ءومىر ءسۇرىپ جاتىر.
Visual Capitalist ونلاين-پلاتفورماسى مەن حالىقارالىق ۆاليۋتا قورىنىڭ 2025 جىلعى «الەمدىك ەكونوميكالىق بولجامدار» ەسەبىنە ساي, الەمنىڭ ەڭ كەدەي مەملەكەتتەرىنىڭ كوبى افريكا قۇرلىعىنىڭ ساحارانىڭ وڭتۇستىگىندەگى ايماقتارىندا ورنالاسقان.
بۇل ءتىزىمنىڭ باسىندا وڭتۇستىك سۋدان تۇر. مۇندا جان باسىنا شاققانداعى ءجىو نەبارى 251 دوللار. ودان كەيىن يەمەن (417 دوللار), بۇل تىزىمدەگى تاياۋ شىعىستاعى جالعىز ەل. ءۇشىنشى ورىندا بۋرۋندي (490 دوللار), ءتورتىنشى ورىندا ورتالىق افريكا رەسپۋبليكاسى (532 دوللار), ودان ءارى مالاۆي (580), ماداگاسكار (595), سۋدان (625), موزامبيك (663), كونگو دەموكراتيالىق رەسپۋبليكاسى (743) جانە نيگەر (751 دوللار).
سوڭعى 25 جىلدا كەدەيلىكتى ازايتۋدا ەڭ ۇلكەن جەتىستىككە شىعىس جانە وڭتۇستىك ازيا ەلدەرى جەتكەن. دەگەنمەن, بۇۇ بولجامىنشا, 2030 جىلعا قاراي الەم حالقىنىڭ 7,3 پايىزى ءالى دە كۇنىنە 2,15 دوللاردان از تابىس تاباتىن بولادى. بۇل شامامەن 69 ميلليون ادام عانا كەدەيلىكتەن شىعا الادى دەگەن ءسوز.
كەدەيلىكتى جويۋ بۇۇ-نىڭ 2030 جىلعا دەيىنگى تۇراقتى دامۋ ماقساتتارىنىڭ ەڭ باستى باعىتى. ۇيىم بۇل ماسەلەنى شەشۋ تەك ەكونوميكالىق ەمەس, الەۋمەتتىك ادىلەتتىلىك پەن تۇراقتى دامۋ ءۇشىن دە ماڭىزدى ەكەنىن اتاپ وتەدى.