قاراساي اۋدانىنىڭ «ۇشقوڭىر» سپورت كەشەنىندە كسرو سپورت شەبەرى, جامبىل اۋدانىنىڭ قۇرمەتتى ازاماتى باقىتجان ابدىباەۆتىڭ 80 جىلدىعىنا ارنالعان رەسپۋبليكالىق تۋرنير ءوتتى.
تۋرنير باسكەتبول قوعامداستىعى ءۇشىن ەرەكشە مانگە يە. 18 جىل بۇرىن اۋداندىق دەڭگەيدە باستاۋ العان بۇل جارىس, ۋاقىت وتە كەلە كەڭ تانىمالدىلىققا يە بولىپ, وبلىستىق دارەجەگە جەتتى. بيىلعى جىلى العاش رەت رەسپۋبليكالىق دەڭگەيدە ۇيىمداستىرىلىپ وتىر.
ءتۋرنيردىڭ نەگىزىن قالاۋشىلاردىڭ قاتارىندا ەلىمىزگە بەلگىلى قوعام قايراتكەرى, پەداگوگيكا عىلىمدارىنىڭ دوكتورى امالبەك تشانوۆ, وليمپيادا چەمپيونى مەن جۇلدەگەرلەرى ەرماحان يبرايموۆ, داۋلەت تۇرلىحانوۆ, نۇرباقىت تەڭىزباەۆ, دەمەۋ جادىراەۆ سىندى تانىمال تۇلعالار بار. ءتۋرنيردىڭ اشىلۋ سالتاناتىنا باقىتجان ابدىباەۆتىڭ جاقىن تۋىستارى مەن دوستارى, سونداي-اق بىرقاتار قۇرمەتتى قوناقتار قاتىستى.
«باقىتجان ابدىباەۆ سوعىستان كەيىنگى جىلدارى ءوسىپ, قيىن جاعدايدا سپورتپەن اينالىسقان. ەلىمىزدىڭ الدىڭعى قاتارلى باسكەتبولشىلاردىڭ ءبىرى بولىپ, كسرو قۇراماسىنىڭ قاتارىنا ەندى. سپورتشى رەتىندە عانا ەمەس, جاس بۋىن ويىنشىلاردىڭ تالىمگەرى رەتىندە دە تانىلدى. تۋرنير جاي عانا جارىس ەمەس, بۇل – ءداستۇر مەن رۋحتىڭ جالعاسى. مۇنداي ءىس-شارالار ارقىلى جاستار ەل سپورتىنىڭ تاريحىمەن تانىسىپ, ەرىك-جىگەرىن شىڭدايدى», دەدى الماتى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى اقجۇرەك تاڭاتاروۆ.
تۋرنيرگە شىعىس قازاقستان, باتىس قازاقستان, تۇركىستان, جامبىل, پاۆلودار, قاراعاندى, اقتوبە, اتىراۋ, جەتىسۋ وبلىستارى, استانا, الماتى, شىمكەنت قالالارىنان, 2010–2011 جىلدارى تۋعان بالالاردان قۇرالعان 20 كوماندا, 250-دەن استام جاس سپورتشى قاتىستى. جارىس ناتيجەسىندە الماتى وبلىسىنىڭ قۇراماسى جەڭىسكە جەتتى. جۇلدەلى 2-ورىندى تالعار اۋدانىنىڭ كومانداسى, 3-ورىندى جەتىسۋ وبلىسىنىڭ كومانداسى ەنشىلەدى. جەڭىمپازدارعا كۋبوكتار, مەدالدار مەن قۇرمەت گراموتالارى تابىس تالدى.
الماتى وبلىسى