جانارماي قورى جەتكىلىكتى مە؟

«اتىراۋ مۇناي وڭدەۋ زا­ۋىتى» جشس ءباسپاسوز قىزمە­تىنىڭ مالى­مەتىنە سۇيەنسەك, وسى كەزەڭ­دە زاۋىت­تاعى قىسىممەن جۇمىس ىستەيتىن 1 174 ىدىس پەن اپپاراتقا, 46 پەشكە, تەحنولوگيالىق 1 458 قۇ­بىر جەلىسىنە مىندەتتى تەحنيكالىق كۋالان­دىرۋلار مەن ساراپتامالار جۇرگىزۋ كوزدەلگەن. سونداي-اق ءتۇرلى قوندىرعىدا 316 توننادان استام كاتاليزاتور اۋىستىرىلادى. ەڭ كۇردەلى ءارى نەگىزگى وپەراتسيا – باياۋ كوكستەۋ قوندىرعىسىنىڭ رەاكتورلارىنداعى كونۋستى تۇپتەردى اۋىستىرۋ. بۇل ءۇشىن زاۋىت اۋماعىندا جۇك كوتەرگىشتىگى 750 توننالىق 2 بىرەگەي كران ورناتىلعان. رەاكتورلاردا جابدىق سەنىمدىلىگىن ارتتىرۋ ءۇشىن يننوۆاتسيالىق بولجام­دى دياگنوستيكا جۇيەسى ىسكە قوسىلادى.

«بۇل جابدىقتاردىڭ سەنىمدىلىگىن, تەحنولوگيالىق ۇدەرىستەردىڭ تۇراق­تىلىعىن قامتاماسىز ەتۋگە, ءوندى­رىستىڭ تيىمدىلىگىن ارتتىرۋعا باعىت­تالىپ وتىر. جوسپارلانعان الدىن الۋ جۇمىسىن 1 880 مامان اتقارادى. جۇمىستى ساپالى اتقارۋ ءۇشىن 62 ار­نايى تەحنيكا تارتىلادى. وسى كەزەڭ­دە زاۋىت جابدىقتارىنا مىندەت­تى تەحنيكالىق كۋالاندىرۋ مەن ساراپتامالار جۇرگىزىلەدى. جوندەۋ كەزىندە ەڭبەكتى قورعاۋ, ونەركاسىپ جانە ءورت قاۋىپسىزدىگىنە ەرەكشە كوڭىل بولىنەدى», دەپ حابارلادى كاسىپ­ورىننىڭ ءباسپاسوز قىزمەتى.

وسى كەزەڭدە مۇناي ونىمدەرىن جونەلتۋدى توقتاتپاۋ ءۇشىن ەنەرگەتيكا مينيسترلىگىمەن كەلىسىلگەن كەستەگە سايكەس وتىن قورى جيناقتالىپ­تى. قازىر زاۋىتتىڭ رەزەرۆۋارلىق پاركىندە 37 مىڭ توننا جانارماي, 30 مىڭ توننا ديزەل وتىنى, 6,8 مىڭ توننا اۆياوتىن بار. بۇل قور ەلىمىزدىڭ باتىس وڭىرلەرىنە مۇناي ونىمدەرىنىڭ بىر­كەلكى ءارى ۋاقتىلى جونەلتۋىن قام­تا­­ماسىز ەتەدى.

زاۋىتتا جىل باسىنان بەرگى 8 ايدا جەڭىل مۇناي ونىمدەرى ءوندىرىسىنىڭ ۇلەسى 77,5%-دى قۇرادى. ال وڭدەۋ تەرەڭدىگى – 88,6%. ديزەل وتىنىنىڭ (+15%) جانە اۆياوتىننىڭ (+13%) ءوندىرىس جوسپارى ارتىعىمەن ورىندالىپتى. ناتيجەسىندە, كاسىپورىن بيۋدجەتكە 129 ملرد تەڭگە اۋدارىپ, جوس­پارلى كورسەتكىشتەن 24 ملرد تەڭگەگە ارتىق ءتۇسىم جىبەردى.

زاۋىتتىڭ جىلدىق مۇناي وڭدەۋ كولەمىن 6,1 ملن تونناعا دەيىن ارتتىرۋ جوسپارلانعان. ال جوندەۋارالىق كەزەڭدى 36 ايعا دەيىن ۇزارتۋ كوزدەلىپ وتىر.

اتىراۋ وبلىسى