استانا. 19 اقپان. بۇگىن پارلامەنت سەناتىنىڭ جالپى وتىرىسىندا پالاتا دەپۋتاتتارى قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنت سايلاۋىن وتكىزۋ تۋرالى ۇسىنىسىن قاراپ, پرەزيدەنت ن. نازارباەۆقا ۇندەۋ جولدادى. بۇل تۋرالى «قازاقپارات» حابارلادى.
«قۇرمەتتى نۇرسۇلتان ءابىش ۇلى! پارلامەنت سەناتى قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنت سايلاۋىن وتكىزۋ تۋرالى باستاماسىن تولىعىمەن قولدايدى. ۋاقىتتىڭ ءوزى تالاپ ەتىپ وتىرعان باستاما بارشا حالىقتىڭ قىزۋ قولداۋىنا يە بولدى, قازاقستاندىق قوعامدا وڭ پىكىرلەر قالىپتاستىردى. حالىقارالىق شيەلەنىستىڭ ارتىپ وتىرعان جاعدايىندا جاھاندىق ەكونوميكادا داعدارىس قۇبىلىستارى كۇشەيە تۇسكەن ۋاقىتتا ىشكى ساياسي تۇراقتىلىقتى قامتاماسىز ەتۋ, ءسىز ايقىنداعان الەمنىڭ وزىق وتىز ەلىنىڭ قاتارىنا ەنۋدى ماقسات ەتەتىن «قازاقستان-2050» ۇزاقمەرزىمدى ستراتەگياسىن, ماڭگىلىك ەل تۇجىرىمداماسىن, «نۇرلى جول» باعدارلاماسىن جۇزەگە اسىرۋعا جاعىمدى احۋال قالىپتاستىرۋ قاجەت.
ءسىزدىڭ دانا ءارى كۇشتى كوشباسشىلىعىڭىزبەن قازاقستان ءوزىنىڭ دامۋى مەن قالىپتاسۋىنا قاتىستى بارلىق قيىنشىلىقتاردى لايىقتى ەڭسەردى.
تاۋەلسىزدىك جىلدارى ءسىزدىڭ ساياساتىڭىزدىڭ ناتيجەسىندە نارىقتىق ەكونوميكاسى دامىعان, حالىقارالىق قاۋىمداستىق الدىندا بەدەلدى, قۋاتتى مەملەكەت قالىپتاستى. سوندىقتان دا, قازاقستاندىقتار بارلىق جەتىستىكتەردى ءسىزدىڭ اتىڭىزبەن بايلانىستىرادى», - دەدى پالاتا اتىنان ۇندەۋدى جاريالاعان سەنات توراعاسى قاسىم-جومارت توقاەۆ.
بۇدان بولەك, ۇندەۋدە قازاقستاننىڭ ءوز دامۋىنىڭ جاڭا ساتىسىنا اياق باسقانى ايتىلىپ, بەلگىلەنگەن رەفورمالاردى ودان ءارى ىلگەرىلەتۋگە باعىتتالعان ەلباسى باعدارىن تابىستى جۇزەگە اسىرۋدىڭ ءسوزسىز شارتى بولىپ تابىلاتىن تۇراقتىلىقتىڭ ماڭىزى زور ەكەنىنە نازار اۋدارىلادى.
«ءبىز پارلامەنت سەناتىنىڭ دەپۋتاتتارى پرەزيدەنتتىڭ كەزەكتەن تىس سايلاۋىن وتكىزۋ ەلىمىزدە بەيبىتشىلىكتى, بىرلىك پەن كەلىسىمدى نىعايتۋعا ىقپال ەتەتىندىگىنە سەنىمدىمىز. اسا قۇرمەتتى نۇرسۇلتان ءابىش ۇلى, سىزدەن قازاقستان حالقى اسسامبلەياسى كەڭەسىنىڭ باستاماسىن قولداپ, كەزەكتەن تىس پرەزيدەنت سايلاۋىن تاعايىنداۋ تۋرالى ماسەلەنى قاراستىرۋىڭىزدى سۇرايمىز», دەلىنگەن ۇندەۋدە.
مۇرات ايتقوجا.