2022 جىلدان بەرى 25 قازان – رەسپۋبليكا كۇنى ۇلتتىق مەرەكە رەتىندە كەڭىنەن اتالىپ وتەدى. 1990 جىلدىڭ ءدال وسى كۇنى قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلدانىپ, ەل تاۋەلسىزدىگىنە باستايتىن العاشقى ماڭىزدى قادام جاسالدى. بۇگىندە ەگەمەندىك ۇعىمى ءبىز ءۇشىن تابيعي, قالىپتى قۇبىلىس بولىپ كورىنگەنىمەن, ونىڭ استارىندا اتا-بابالارىمىزدىڭ عاسىرلار بويعى ارمان-مۇراتى مەن ەرەن ەڭبەگى جاتىر. سوندىقتان تاۋەلسىزدىكتىڭ قادىرىن ۇمىتپاي, ونى ساقتاۋ مەن نىعايتۋ – بۇگىنگى ۇرپاقتىڭ باستى بورىشى, دەپ جازادى Egemen.kz.
رەسپۋبليكا كۇنى — تاۋەلسىزدىككە دەگەن العاشقى ناقتى قادامنىڭ سيمۆولى. ەگەمەندىك دەكلاراتسياسىندا قازاقستاننىڭ اۋماقتىق تۇتاستىعى, ازاماتتاردىڭ قۇقىقتارى مەن بوستاندىقتارى, تابيعي رەسۋرستارعا يە بولۋ قۇقىعى جانە مەملەكەتتىك بيلىكتىڭ دەربەستىگى العاش رەت زاڭ جۇزىندە بەكىتىلدى.
1991 جىلى 16 جەلتوقساندا ەلىمىز تاۋەلسىزدىگىن جاريالاعانىمەن, 25 قازان سول تاۋەلسىزدىكتىڭ قۇقىقتىق جانە رۋحاني ىرگەتاسى سانالادى.
جىل سايىن رەسپۋبليكا كۇنىنە وراي ەلىمىزدىڭ بارلىق وڭىرىندە كەڭ اۋقىمدى مادەني جانە پاتريوتتىق شارالار وتەدى.
ماسەلەن, استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا قازاق كۇرەسىنەن XIV رەسپۋبليكالىق «Qazaqstan Barysy» ءتۋرنيرى وتەدى. بۇل – ەل نامىسىن ارقالاعان ەڭ مىقتى بالۋانداردىڭ بوزكىلەمدەگى شەشۋشى ايقاسى.
جارىس 18 قازان كۇنى ساعات 12:00-دە باستالادى.
اتالعان ايتۋلى دودا رەسپۋبليكا كۇنىنە وراي ۇيىمداستىرىلىپ وتىر. تۋرنيرگە وبلىستىق ىرىكتەۋ سايىستارىنىڭ جەڭىمپازدارى, سونداي-اق استانا, الماتى جانە شىمكەنت قالالارىنىڭ ۇزدىك سپورتشىلارى قاتىسادى.
بۇدان بولەك, وتكەن جىلعى «قازاقستان بارىسى» ءتۋرنيرىنىڭ جەڭىمپازى مەن «اسكەر بارىسى» جارىسىنىڭ ەكى بالۋانى دا بوزكىلەمگە شىعادى. جالپى, 43 بالۋان كۇش سىناسادى.
رەسپۋبليكا كۇنى — بۇل تەك تاريحي داتا ەمەس. ول — قازاقستاندىقتاردىڭ ەل بىرلىگىن, ەركىن وي مەن جاۋاپكەرشىلىكتى, مەملەكەت تاعدىرىنا دەگەن سۇيىسپەنشىلىكتى دارىپتەيتىن مەرەكە.
بۇل كۇن — ءاربىر ازاماتقا ەل تاعدىرىنىڭ ورتاق ەكەنىن, تاۋەلسىزدىك پەن ەگەمەندىك ءۇشىن ۇرپاقتار ەڭبەگىن قۇرمەتتەۋدىڭ قاجەتتىگىن ەسكە سالادى.