الماتىداعى ەرەكشە كۇتىمگە مۇقتاج بالالار باسقا مەكتەپ-ينتەرناتقا نەگە كوشىرىلدى؟

بۇگىندە ورتالىقتا 100 بالا بولسا, ولاردىڭ 13-ءى مەكتەپكە دەيىنگى جاستا, 87-ءسى مەكتەپ وقۋشىلارى.

بۇعان دەيىن دە مەملەكەت باسشىسىنىڭ پارمەنىمەن ورتالىق عيماراتى تولىق جوندەۋدەن وتەتىنى حابارلانعان ەدى. «ينتەگرا» جشس الەۋمەتتىك جاۋاپكەرشىلىك اياسىندا جوندەۋ جۇمىستارىن ءوز ەسەبىنەن جۇرگىزۋگە مىندەتتەمە الىپ, بالالار كوشكەن سوڭ قۇرىلىس-مونتاج جۇمىستارىنا دەرەۋ كىرىسۋگە دايىن ەكەنىن مالىمدەگەن بولاتىن.

الماتى قالالىق ءبىلىم باسقارماسىنىڭ باسشىسى سايران سايفەدەنوۆتىڭ ايتۋىنشا, تاربيەلەنۋشىلەردى ورنالاستىرۋ ماسەلەسى ەرەكشە باقىلاۋدا تۇر.

«قازىرگى تاڭدا جوندەۋ جۇمىستارىنىڭ جوبالىق-سمەتالىق قۇجاتتاماسى ازىرلەنىپ, نەگىزگى عيماراتتى قايتا جاڭارتۋ جانە ەسكى شارۋاشىلىق قۇرىلىستارىن ءىشىنارا بۇزۋ قاراستىرىلعان. سونداي-اق جاڭا اكىمشىلىك كورپۋس سالۋ جوسپارلانعان», - دەيدى ول.

سايران سايفەدەنوۆ ۋاقىتشا كوشىرۋ ماسەلەسى شەشىلگەنىن ايتا كەلە: "بالالار ۋاقىتشا ورنالاسقان №1 ارنايى مەكتەپ-ينتەرناتى دا ءبىلىم باسقارماسىنىڭ قاراماعىندا. ەكى اپتا بۇرىن مۇندا «جانۇيا» مامانداندىرىلعان ءۇيىنىڭ 90-نان استام تاربيەلەنۋشىسى تۇرعان بولاتىن. بالالاردىڭ يەلىگىندە 1100 شارشى مەتردەن استام اۋماق بار - بۇل 18 بولمە, وندا اعىمداعى جوندەۋ جۇرگىزىلگەن. اپتا سوڭىنا قاراي عيمارات تولىق بوساتىلعاننان كەيىن مەردىگەر ۇيىم قايتا جاڭعىرتۋ جۇمىسىنا كىرىسەدى", دەدى.

ەرەكشە الەۋمەتتىك قىزمەتتەرگە مۇقتاج بالالارعا ارنالعان №2 قولداۋ كورسەتۋ ورتالىعىنىڭ ديرەكتورى جۇلدىز مەڭلىبەكوۆا: "1962 جىلى سالىنعان عيماراتىمىز قايتا جوندەۋدەن وتكىزۋ ءۇشىن ۋاقىتشا جابىلعاندىقتان, قازىر ءبىز تورايعىروۆ كوشەسىندەگى عيماراتقا كوشتىك. بالالار ريزا, بولمەلەر كەڭ, جارىق, بارلىق جاعداي جاسالعان. بىزگە وسىنداي جاقسى عيمارات ۇسىنعانى ءۇشىن ءبىلىم باسقارماسىنا جانە الماتى اكىمدىگىنە العىس بىلدىرەمىز», دەيدى.

بۇگىندە الماتىدا ەرەكشە ءبىلىم بەرۋ قاجەتتىلىگى بار بالالارعا ارنالعان سەگىز ارنايى مەكتەپ-ينتەرنات جۇمىس ىستەيدى, وندا 2 668 وقۋشى ءبىلىم الادى. ونىڭ ىشىندە 1 794 بالا ينتەرناتتا تۇرادى, ال 874-ءى ۇيدە وقيدى. بۇدان بولەك, ومىرىندە قيىندىق بولىپ جاتقان كامەلەتكە تولماعاندارعا كومەك كورسەتەتىن ءتورت ۇيىم بار. بۇل مەكەمەلەردە 446 بالا تاربيەلەنىپ جاتىر.

وعان قوسا بيىل 20 قىركۇيەكتە الماتىدا قۇرىلىس كومپانيالارىنىڭ ءبىرى 6 ملرد تەڭگە قاراجات بولگەن جاڭا «جانۇيا» مامانداندىرىلعان كەشەنى اشىلعان ەدى.