الماتى وبلىسىندا «تازا قازاقستان» ەكولوگيالىق اكتسياسى اياسىندا جيدە مەن شرەنك شىرشاسىنىڭ تۇقىمىن جيناۋ اپتالىعى باستالدى. شارانىڭ نەگىزگى ماقساتى – ورمان قورىن تولىقتىرۋ, تابيعي تۇقىم قورىن قالىپتاستىرۋ, جاستاردىڭ ەكولوگيالىق مادەنيەتىن ارتتىرۋ.
باقاناس ورمان شارۋاشىلىعىندا وتكەن ءىس-شاراعا ورمانشىلارمەن قاتار كوللەدج ستۋدەنتتەرى مەن مەكتەپ وقۋشىلارى قاتىستى. ناتيجەسىندە, ءبىر كۇن ىشىندە 200 كگ-دان استام جيدە تۇقىمى جينالدى. وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ مالىمەتىنشە, بيىل وڭىردە شامامەن 1,5 توننا جيدە مەن شرەنك شىرشاسىنىڭ تۇقىمىن جيناۋ جوسپارلانعان.
ء«اربىر جينالعان تۇقىم – ەرتەڭگى جاسىل ورماننىڭ باستاۋى. بۇل – ءوڭىردىڭ ەكولوگيالىق الەۋەتىن ارتتىرۋعا باعىتتالعان ماڭىزدى قادام», دەپ اتاپ ءوتتى باسقارما باسشىسى قانات نۇسىپباەۆ.
جينالعان تۇقىمدار كوكتەمدە وبلىستىق ورمان تۇقىمباقتارىنا جەتكىزىلىپ, كوشەتتەرگە اينالدىرىلادى. كەيىن ولار ورمان قورى جەرلەرىنە وتىرعىزىلىپ, ءوڭىردىڭ جاسىل ايماعىن كەڭەيتۋگە قىزمەت ەتەدى.
2021 جىلدان بەرى الماتى وبلىسىندا 17,4 مىڭ گا اۋماققا 38,3 ملن اعاش وتىرعىزىلدى. بۇل مەملەكەت باسشىسىنىڭ 2 ملرد اعاش وتىرعىزۋ جونىندەگى تاپسىرماسىن ورىنداۋداعى ءوڭىردىڭ ناقتى ۇلەسى سانالادى.
الماتى وبلىسى