World Boxing (WB) كونگرەسىندە جاڭا پرەزيدەنت سايلاۋى ءوتىپ, ەلىمىزدىڭ ۇلتتىق وليمپيادا كوميتەتىنىڭ پرەزيدەنتى, ايگىلى بوكسشى گەننادي گولوۆكين, گرەكيا بوكس قاۋىمداستىعىنىڭ جەتەكشىسى حاريس ماريوليس, ۋكراينانىڭ اتاقتى سپورتشىسى ۆلاديمير كليچكو سول ۇيىمنىڭ باسشىلىق قىزمەتىنەن دامەلى ەكەنىن جازعان ەدىك. كۇنى كەشە كليچكونىڭ رايىنان قايتقانى بەلگىلى بولدى. ول باق وكىلدەرىنە بەرگەن سۇحباتىندا ريمدەگى كونگرەسستە سايلاۋعا تۇسپەيتىنىن رەسمي تۇردە مالىمدەدى.
22 قازاندا ءباا-ءنىڭ ءابۋ-دابي قالاسىندا ارالاس جەكپە-جەكتەن وتەتىن UAE Warriors تۋرنيرىندە سۇندەت ايتقۇل (11-2-0) كۇش سىناسادى. قازاق فايتەرى برازيليالىق گۆيدو سانتوسپەن (17-3-1) سايىسقا تۇسەدى. ەستەرىڭىزگە سالا كەتەيىك, وسى جارىستا جەڭىمپاز اتانعان سپورتشى الەمدەگى ەڭ بەلدى پروموۋشەن – UFC-دە ونەر كورسەتۋ قۇرمەتىنە يە بولادى.
الەمدىك رەيتينگتە 17-ورىندا تۇرعان الەكساندر بۋبليك 13–19 قازان ارالىعىندا الاتاۋ باۋرايىندا جالاۋى جەلبىرەيتىن «Almaty Open» تۋرنيرىنە قاتىسۋدان باس تارتتى. وتكەن اپتادا ول شانحايداعى «ماستەرس» جارىسىندا ۇزدىكتەر تىزىمىندە 202-ساتىعا جايعاسقان موناكو تەننيسشىسى ۆالەنتەن ۆاشەرودان ۇتىلعان ەدى. سودان كەيىن جەكە باپكەرى ەلىمىزدىڭ ءبىرىنشى راكەتكاسىنا ءبىراز ۋاقىت دەمالىس بەرۋدى ءجون كورىپتى.
شاڭعىمەن تۇعىردان سەكىرۋدەن پولشانىڭ ششيرك قالاسىندا ۇيىمداستىرىلعان حالىقارالىق تۋرنيردە دانيل ۆاسيلەۆ التىن السا, يليا ميزەرنىح كۇمىسپەن كۇپتەلدى. ۇزدىك ۇشتىكتى پولشالىق كلەمەنس ستاشەل تۇيىندەدى.
9–12 قازان ارالىعىندا كانادانىڭ مونرەال قالاسىندا شورت-ترەكتەن الەمدىك تۋردىڭ العاشقى ىرىكتەۋ كەزەڭى وتەدى. باسەكەدە ەلىمىزدىڭ نامىسىن دەنيس نيكيشا, ابزال اجىعاليەۆ, ءادىل عالياحمەتوۆ, گلەب يۆچەنكو, مەرسايد جاقسىباەۆ, نۇرتىلەك قاجىعالي, يانا حان, ولگا تيحونوۆا, زەينەپ قۇمارقان, الينا اجىعاليەۆا, ماليكا ەرمەك قورعايدى.