قازاقستان اۋماعىنىڭ جارتىسىنا جۋىعى جويقىن جەر سىلكىنىسى قاۋپى بار وڭىرلەرگە جاتاتىندىقتان, جاڭا قۇرىلىس كودەكسىندە سەيسميكالىق قاۋىپسىزدىككە ارنالعان جەكە تاراۋ ەنگىزىلەدى. بۇل تۋرالى ونەركاسىپ جانە قۇرىلىس ءمينيسترى ەرسايىن ناعاسپاەۆ ماجىلىستەگى زاڭ جوباسىن تالقىلاۋ كەزىندە مالىمدەدى, دەپ جازادى Egemen.kz.
ءمينيستردىڭ ايتۋىنشا, ەڭ جوعارى سەيسميكالىق قاتەر الماتى قالاسى مەن الماتى وبلىسىنا, سونداي-اق حالىق پەن ينفراقۇرىلىم تىعىز ورنالاسقان جامبىل, تۇركىستان جانە شىعىس قازاقستان وبلىستارىنا ءتان.
«ۇلتتىق قاۋىپسىزدىك پەن ورنىقتى دامۋدى قامتاماسىز ەتۋ ماقساتىندا جاڭا قۇرىلىس كودەكسىندە وسى ماسەلەگە ارنالعان جەكە تاراۋ ەنگىزىلەدى. نورمالار كەشەندى تۇردە سەيسميكالىق قاتەردى باعالاۋدى, جاڭا نىسانداردى سەيسمو-وقشاۋلاۋ تەحنولوگياسىمەن جوبالاۋدى, قۇرىلىس الاڭدارىن تاڭداۋ مەن ءبىرىنشى دەڭگەيدەگى ماڭىزدى نىساندارعا ينجەنەرلىك-سەيسمومەتريالىق باقىلاۋ جۇرگىزۋدى كوزدەيدى», دەدى ەرسايىن ناعاسپاەۆ.
سونىمەن قاتار, مينيستر قۇرىلىس سالاسىندا ساپا مەن قاۋىپسىزدىكتى قامتاماسىز ەتۋ ءۇشىن نارىقتاعى قاتىسۋشىلاردىڭ بىلىكتىلىگىن ارتتىرۋ قاجەتتىگىن اتاپ ءوتتى. بۇگىندە سالادا شامامەن 80 مىڭ ليتسەنزيا تىركەلگەنىمەن, ولاردىڭ ەداۋىر بولىگى قاعاز جۇزىندە عانا بار ەكەنى انىقتالعان. كوپتەگەن كومپانيانىڭ وندىرىستىك بازاسى دا, تاجىريبەلى ينجەنەرلەرى دە جوق بولىپ شىقتى.
«ولاردىڭ باسىم بولىگىندە وندىرىستىك بازا دا, بىلىكتى ينجەنەرلەر دە, ناقتى جوبالارعا قاتىسۋ تاجىريبەسى دە جوق. مۇنداي جاعداي ساپا مەن قاۋىپسىزدىكتى تومەندەتىپ قانا قويماي, مەملەكەتتىك تاپسىرىستارعا جالعان كومپانيالاردىڭ قاتىسۋىنا جول اشىپ, سالاداعى ەڭبەك نارىعىنىڭ شىنايى جاعدايىن كورسەتپەي وتىر.اتالعان ماسەلەنى شەشۋ ءۇشىن مەملەكەتتىك اقپاراتتىق جۇيەلەرمەن ءوزارا بىرىككەن ليتسەنزياتتاردىڭ ەلەكتروندى ءتىزىلىمى قۇرىلادى», دەدى ەرسايىن ناعاسپاەۆ.