بۇگىن ماجىلىس قۇرىلىس قىزمەتىن قاعازباستىلىقتان ارىلتاتىن قۇجاتتى قاراپ جاتىر. جالپى وتىرىستا ونەركاسىپ جانە قۇرىلىس ءمينيسترى ەرسايىن ناعاسپاەۆ قۇرىلىس كودەكسىنىڭ جاڭا جوباسىن تانىستىردى, دەپ حابارلايدى Egemen.kz.
مينيستر قۇرىلىس سالاسىندا ەنگىزىلىپ جاتقان جاڭا جۇيەنىڭ ءمان-جايىن ءتۇسىندىردى. ونىڭ ايتۋىنشا, بۇل جۇيە ءاربىر قۇرىلىس نىسانىنا «جسن-گە ۇقساس» بىرەگەي ءنومىر بەرۋدى كوزدەيدى.
«نىساننىڭ بىرەگەي ءنومىرى دەگەن شىنىمەن دە جاڭاشىلدىق دەپ ايتۋعا بولادى. كۇندەلىكتى ومىرمەن سالىستىرساق, ول ءار ادامدا بار جسن-گە ۇقسايدى. بىرەگەي ءنومىر مەملەكەتتىك قالا قۇرىلىسى كاداسترىندا جوبالاۋ كەزەڭىندە اۆتوماتتى تۇردە بەرىلەدى جانە نىساننىڭ بۇكىل ومىرلىك تسيكلىندا — جوسپارلاۋ, ساراپتاما, قۇرىلىس, ءتىپتى ۋتيلدەۋ كەزەڭىندە دە بىرگە جۇرەدى», دەدى ەرسايىن ناعاسپاەۆ.
ناعاسپاەۆتىڭ ايتۋىنشا, مۇنداي ءتاسىل قۇرىلىس ساپاسىن باقىلاۋدى جەڭىلدەتىپ قانا قويماي, بولاشاقتا نىساندى جاڭعىرتۋعا دا ىڭعايلى. بۇعان دەيىن كوپتەگەن عيماراتتى پايدالانۋ كەزىندە باستاپقى قۇجاتتاردى تابۋ قيىندىق تۋعىزعان. ەندى بىرەگەي ءنومىر ارقىلى جۇيەدەن بارلىق مالىمەتتى باستاپقى جوبادان باستاپ, پايدالانىلعان ماتەريالدار مەن قۇرىلىس تەحنولوگيالارىنا دەيىن تولىق كورۋگە مۇمكىندىك تۋادى.
«بىرەگەي ءنومىر ارقىلى تسيفرلىق فورماتتا نىساندى قاداعالاپ وتىرۋعا بولادى», دەدى ونەركاسىپ جانە قۇرىلىس ءمينيسترى.