اتا ءداستۇر, اتا سالتىم – اق ارىم,
ءاز ناۋىرىز! امانسىز با, ارداعىم؟
كۇن مەن ءتۇندى تەڭ جەتەكتەپ دالامنىڭ,
جەتتىڭىز بە قۋاندىرىپ بار جانىن؟!
جەتتىڭىز بە, جەلمايامەن كونەدەن,
ءاز ناۋىرىز, ابىزىمسىڭ كورەگەن
جىلدان جىلعا جاسىمىزدى ۇزارتقان,
ءوزىڭىزدى كوك ءتاڭىرى جەبەگەن.
تورگە ءوتىڭىز تورىمدە بار سىي-قۇرمەت,
قادىرىڭدى ءبىز بىلمەسەك كىم بىلمەك.
باتا سۇراپ ۇلاندارى ۇلتىمنىڭ,
كەلەدى, اكە, تىلەگىڭىزدى ءبىلدىر دەپ.
ەرعوجا تىلەپبەرديەۆ.